Wednesday, June 28, 2017
មាសឡើងថ្លៃវិញក្នុងថ្ងៃនេះ
ការជួញដូរមាសនៅថ្ងៃពុធនេះបានឡើងថ្លៃវិញក្រោយធ្លាក់ថ្លៃជាបន្តបន្ទាប់នៅក្នុងរយៈពេលប៉ុន្មានថ្ងៃជាប់ៗគ្នា
ស្របពេលដែលស្ថានភាពជួញដូរនៅលើទីផ្សារភាគហ៊ុន
និងប្រាក់ដុល្លារបានធ្លាក់ចុះបន្ទាប់ពីលោក Mario Draghi
ប្រមុខធនាគារកណ្តាលអឺរ៉ុបបានមានប្រសាសន៍ថា
ស្ថាប័នកំពូលមួយនេះអាចកាត់បន្ថយសកម្មភាពរបស់ខ្លួនមួយចំនួនលើគោលនយោបាយហិរញ្ញវត្ថុនៅក្នុងឆ្នាំនេះ។
ការជួញដូរមាសតាមស្បតបានឡើងថ្លៃ ០,២%
ត្រូវបានជួញដូរក្នុងតម្លៃ ១ ២៤៩,១៧ ដុល្លារក្នុងមួយអោន។
ចំណែកទីផ្សារមាសរបស់អាមេរិកបានឡើងថ្លៃ ០,២% ដែរ
ហើយត្រូវបានជួញដូរក្នុងតម្លៃ ១ ២៤៩,៤០ ដុល្លារក្នុងមួយអោន។
ការជួញដូរប្រាក់ដុល្លារអាមេរិកបានធ្លាក់ចុះដល់កម្រិតទាបបំផុតមិនធ្លាប់មាននៅក្នុងរយៈពេល
១០
ខែកន្លងទៅនេះបើធៀបទៅនឹងលុយអឺរ៉ូកាលពីថ្ងៃអង្គារម្សិលមិញបន្ទាប់ពីលោក
Draghi ប្រមុខធនាគារកណ្តាលអឺរ៉ុប
បានប្រកាសបើកផ្លូវមួយនូវអ្វីដែលលោកយល់ថាជាជំហានឆ្ពោះទៅកាន់នៃការកាត់បន្ថយសកម្មភាពខ្លះៗរបស់ធនាគារកណ្តាលលើវិស័យហិរញ្ញវត្ថុ។
នៅលើទីផ្សារភាគហ៊ុនអាស៊ីវិញ
ក៏បានធ្លាក់ចុះដែរនៅថ្ងៃពុធនេះបន្ទាប់ពីផ្សារភាគហ៊ុន Wall
Street
របស់អាមេរិកត្រូវបានជួញដូរក្នុងតម្លៃធ្លាក់ថ្លៃយ៉ាងខ្លាំងបន្ទាប់ពីមានការពន្យារពេលក្នុងការបោះឆ្នោតលើកម្មវិធីកំណែទម្រង់វិស័យសុខាភិបាលរបស់អាមេរិក។
ងាកទៅមើលប្រសាសន៍របស់លោកស្រី Janet Yellen
ប្រមុខធនាគារកណ្តាលអាមេរិកវិញបានលើកឡើង
កាលពីថ្ងៃអង្គារម្សិលមិញថា
លោកស្រីមិនជឿថាពិភពលោកនឹងជួបវិបត្តិហិរញ្ញវត្ថុម្តងទៀតនោះឡើយដរាបណាលោកស្រីនៅមានជីវិតនៅឡើយ។
នេះបានធ្វើឲ្យលោកស្រីអរគុណទៅដល់ការកំណែទម្រង់ប្រព័ន្ធធនាគារដែលបានធ្វើឡើងចាប់តាំងពីមានវិបត្តិហិរញ្ញវត្ថុសាកលលោកកាលពីឆ្នាំ
២០០៧ ដល់ឆ្នាំ ២០០៩ ។
នៅថ្ងៃអង្គារម្សិលមិញនេះដែរ មូលនិធិរូបិយវត្ថុអន្តរជាតិ (IMF)
បានកាត់បន្ថយការព្យាករណ៍កំណើនសេដ្ឋកិច្ចរបស់ខ្លួនសម្រាប់សេដ្ឋកិច្ចអាមេរិករហូតដល់
២,១% សម្រាប់ឆ្នាំ ២០១៧ និង២០១៨
ដោយទម្លាក់ការព្យាករណ៍ពីមុនដែរថា
គោលនយោបាយពន្ធដារថ្មីរបស់ប្រធានាធិបតី Trump
និងផែនការចំណាយសារពើពន្ធរបស់លោកនឹងជំរុញឲ្យប្រទេសនេះមានកំណើនសេដ្ឋកិច្ច៕
ប្រភព៖ cnbc
ផ្សារភាគហ៊ុនអាស៊ីភាគច្រើនត្រូវបានជួញដូរធ្លាក់ថ្លៃ
សន្ទស្សន៍ជួញដូរនៅលើផ្សារភាគហ៊ុនអាស៊ីភាគច្រើនថ្ងៃនេះ
ត្រូវបានជួញដូរធ្លាក់ថ្លៃបន្ទាប់ពីទីផ្សារភាគហ៊ុន Wall Street
របស់អាមេរិកបានបិទបញ្ចប់ការជួញដូរក្នុងតម្លៃធ្លាក់ថ្លៃកាលពីយប់មិញដោយសារការបោះឆ្នោតទម្លាក់ចោលកម្មវិធីគាំពារសុខភាពចាស់
(Obamacare) ត្រូវបានពន្យារពេល។
សន្ទស្សន៍ជួញដូរនៅលើផ្សារភាគហ៊ុន Nikkei 225
របស់ជប៉ុនបានធ្លាក់ថ្លៃអស់ ០,៥% ខណៈដែលផ្សារភាគហ៊ុនKospi
របស់កូរ៉េខាងត្បូងបានធ្លាក់ធ្លាក់ថ្លៃដូចគ្នាក្នុងចំនួន ០,១២%។
សម្រាប់សន្ទស្សន៍ជួញដូរនៅលើផ្សារភាគហ៊ុនអូស្ត្រាលី S&P/ASX
200
បានងាកចេញវិញពីការខាតបង់នៅពេលជួញដូរប៉ុន្មានថ្ងៃមុនដោយត្រូវបានជួញដូរក្នុងតម្លៃឡើងថ្លៃ
០,២៥%នៅព្រឹកនេះ។
ងាកទៅមើលទីផ្សារភាគហ៊ុនរបស់ចិនវិញ
កំពុងមាននិន្នាការជួញដូរក្នុងដំណើរធ្លាក់ថ្លៃ
ដោយក្នុងនោះសន្ទស្សន៍ជួញដូរភាគហ៊ុននៅលើផ្សារភាគហ៊ុនហុងកុង Hang
Seng បានធ្លាក់ថ្លៃ ០,១៥%។
រីឯការជួញដូរនៅលើផ្សារភាគហ៊ុនសៀងហៃវិញបានធ្លាក់ថ្លៃអស់ ០,៣៩%
ខណៈដែលផ្សារភាគហ៊ុន Shenzhen បានធ្លាក់ថ្លៃអស់ ០,៣៧៤%
នៅពេលចាប់ផ្តើមជួញដូរព្រឹកនេះ។
លោក Mitch McConnell
ប្រមុខសមាជិកសភាអាមេរិកបាននិយាយកាលពីថ្ងៃអង្គារម្សិលមិញថា
ការបោះឆ្នោតលើកម្មវិធីក្រឹត្យគាំពារសុខភាព
Obamacareនឹងត្រូវបានពន្យារពេលរហូតដល់ថ្ងៃទី ៤ ខែកក្កដាខាងមុខ។
ក្រឹត្យគាំពារសុខភាពថ្មីដ៏ចម្រូងចម្រាសនឹងលុបចោលកម្មវិធីគាំពារ
Obamacare ជំនួសដោយរចនាសម្ព័ន្ធឧបត្ថម្ភធនថ្មី។
អ្នកជួញដូរនៅលើទីផ្សារអន្តរជាតិក៏បានផ្តោតផងដែរលើប្រសាសន៍របស់ប្រមុខកណ្តាលអឺរ៉ុបលោក
Mario Draghi ផងដែរដែលថា
ធនាគារកណ្ដាលមានសមត្ថភាពគ្រាន់គ្រាប់នៅក្នុងការកែសម្រួលគោលនយោបាយហិរញ្ញវត្ថុរបស់ខ្លួនដើម្បីឆ្លើយតបទៅនឹងលក្ខខណ្ឌនានាដែលធ្វើឲ្យសេដ្ឋកិច្ចនៅក្នុងតំបន់នេះកាន់តែប្រសើរឡើង
។
ចំណែកផ្សារភាគហ៊ុនអាមេរិកនៅ Wall Street ឯណោះវិញ
បានបិទបញ្ចប់កាលជួញដូរក្នុងតម្លៃធ្លាក់ថ្លៃខ្លាំងកាលពីយប់មិញបន្ទាប់ពីមានការសម្រេចចិត្តរបស់ព្រឹទ្ធសភាក្នុងការពន្យារពេលបោះឆ្នោតគាំទ្រលើក្រឹត្យគាំពារសុខភាពថ្មី។
គេសង្កេតឃើញថា
ភាគហ៊ុនរបស់ក្រុមហ៊ុនបច្ចេកវិទ្យាក៏មានការធ្លាក់ចុះផងដែរដោយដែលមានរហូតដល់ជាង
២% តួយ៉ាងដូចជាភាគហ៊ុនGoogle បានធ្លាក់ថ្លៃដល់ទៅ ២,៧%
ក្រោយចាញ់ក្តីលើសំណុំរឿងកម្មសិទ្ធិបញ្ញានៅក្នុងអាជីវកម្មរបស់ខ្លួន៕
ប្រភព៖ cnbc
ប្រាក់អឺរ៉ូឡើងថ្លៃ ខណៈដែលប្រាក់ដុល្លារកំពុងមានសម្ពាធ
ការជួញដូរប្រាក់អឺរ៉ូនៅថ្ងៃនេះមានសញ្ញាណល្អក្នុងតម្លៃមួយមិនធ្លាប់មានគិតត្រឹមរយៈពេល១០ខែកន្លងទៅនេះ
បន្ទាប់ពីប្រមុខអនាគារកណ្តាលអឺរ៉ុបបានព្រមានពីវិធានការនានារបស់ខ្លួននៅពេលខាងមុខ
ស្របដែលប្រាក់ដុល្លារត្រូវបានរងសម្ពាធជាថ្មីបន្ទាប់ពីការបោះឆ្នោតលើក្រឹត្យគាំពារសុខភាពថ្មីរបស់អាមេរិកត្រូវបានពន្យារពេល។
ប្រាក់អឺរ៉ូត្រូវបានជួញដូរក្នុងតម្លៃ ១,១៣៣៨ ដុល្លារ
បន្ទាប់ពីបានហក់ឡើងថ្លៃបាន ១,៤% កាលពីម្សិលមិញ និង
បានឆ្មក់ឱកាសឡើងថ្លៃដល់ ១,១៣៤៩ ដុល្លារ
ដែលជាតម្លៃឡើងថ្លៃខ្ពស់បំផុតមិនធ្លាប់ឃើញមានគិតចាប់តាំងពីខែសីហាឆ្នាំ
២០១៦ មក។
ការឡើងថ្លៃនេះបានកើតមានឡើងបន្ទាប់ពីលោក Mario Draghi
ប្រធានធនាគារកណ្តាលអឺរ៉ុបបានមានប្រសាសន៍នៅក្នុងសន្និសីទមួយនៅព័រទុយហ្គាល់កាលពីថ្ងៃអង្គារថា
ស្ថានភាពបរិត្តផរណាត្រូវបានជំនួសដោយកំណើនអតិផរណា។
ប៉ុន្តែការផ្លាស់ប្ដូរគោលជំហររបស់ធនាគារកណ្តាលអឺរ៉ុប
ត្រូវបានគេលើកឡើងថា គួរតែមានភាពល្អិតល្អន់ជាងនេះ
ខណៈដែលគោលនយោបាយគាំទ្ររូបិយវត្ថុគួរឲ្យកត់សម្គាល់មួយ
នៅតែត្រូវការជាចាំបាច់
ហើយការស្ទុះងើបឡើងវិញនៃអតិផរណាក៏ពឹងផ្អែកលើលក្ខខណ្ឌហិរញ្ញប្បទានសកលផងដែរ។
អ្នកជួញដូរយល់ឃើញថា
ប្រាក់អឺរ៉ូនឹងអាចឡើងថ្លៃបន្ថែមទៀតនៅពេលឆាប់ៗខាងមុខនេះ។
នៅថ្ងៃនេះវាកំពុងត្រូវបានជួញដូរក្នុងតម្លៃជុំវិញ ១,១៤ ដុល្លារ
ហើយអាចបន្តឡើងថ្លៃទៀតប្រសិនកម្រិតតម្លៃ Resistance
របស់វាអាចស្ទុះងើបផុតពីតម្លៃនេះ។ ធៀបទៅនឹងលុយយ៉េន
កាលពីម្សិលមិញ ប្រាក់អឺរ៉ូត្រូវបានជួញដូរក្នុងតម្លៃ ១២៧,៤៧
យ៉េនដែលជាតម្លៃឡើងថ្លៃខ្ពស់បំផុតមិនធ្លាប់មានគិតចាប់តាំងពីខែមេសាឆ្នាំ
២០១៦មក ដែលកាលនោះវាត្រូវបានជួញដូរក្នុងតម្លៃ ១២៧,១៨ យ៉េន.
ងាកទៅមើលការជួញដូរប្រាក់ដុល្លារបានរងសម្ពាធខ្លាំងកាលពីយប់មិញបន្ទាប់ពីប្រមុខសមាជិកព្រឹទ្ធសភាភាគច្រើនរបស់អាមេរិកលោក
Mitch
McConnellបានពន្យារពេលបោះឆ្នោតលើក្រឹត្យគាំពារសុខភាពថ្មីដោយសង្ឃឹមថា
នឹងទទួលបានការគាំទ្របន្ថែមពីសមាជិកព្រឹទ្ធសភាមកពីគណបក្សសាធារណរដ្ឋ។
អ្នកជួញដូរនៅលើទីផ្សារអន្តរជាតិកំពុងមានការព្រួយបារម្ភថា
រដ្ឋបាលរបស់លោក Trump
នឹងជួបការលំបាកក្នុងការអនុវត្តតាមគោលនយោបាយកាត់បន្ថយពន្ធដារ
និងវិធានការលើកម្មវិធីសារពើពន្ធរបស់លោកប្រសិនបើអវត្តមាននៃក្រឹត្យគាំពារសុខភាពថ្មីនេះ។
នៅថ្ងៃនេះសន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណសំខាន់ៗចំនួន
បានផ្លាស់ប្ដូរបន្តិចបន្តួចបណ្ដោះនៅក្នុងសន្ទស្សន៍តម្លៃ ៩៦,៤៤៣
បន្ទាប់ពីបានធ្លាក់ថ្លៃប្រហែល ១% កាលពីម្សិលមិញ។
ធៀបទៅនឹងលុយយ៉េន របស់ជប៉ុន ប្រាក់ដុល្លារបានធ្លាក់ថ្លៃអស់ ០,១%
ត្រូវបានជួញដូរក្នុងតម្លៃត្រឹម ១១២,១៨ យ៉េន៕
ប្រភព៖ cnbc
ទីផ្សារប្រេងឆៅនៅបន្តធ្លាក់ថ្លៃជាថ្មីទៀត
តម្លៃប្រេងឆៅបានធ្លាក់ថ្លៃជាថ្មីទៀតនៅថ្ងៃ
ពុធនេះបន្ទាប់ពីមានរបាយការណ៍បានបង្ហាញឲ្យឃើញពីកំណើននៃការស្តុកប្រេងឆៅរបស់អាមេរិក
នាំឲ្យមានការព្រួយបារម្ភដែលថា
ទីផ្សារប្រេងឆៅសាកលលោកដែលអាចស្រោចស្រង់តម្លៃឡើងវិញកាលពាក់កណ្តាលឆ្នាំ
២០១៦ មក អាចនឹងត្រូវប្រឈមមុខធ្លាក់ថ្លៃមកវិញ។
នៅថ្ងៃនេះតម្លៃជួញដូរប្រេងឆៅនៅលើទីផ្សារអន្តរជាតិត្រូវបានជួញដូរក្នុងតម្លៃ
៤៦,៣២ ដុល្លារក្នុងមួយបារ៉ែល ឬ បានធ្លាក់ចុះអស់ ៣៣ សេន ស្មើនឹង
០,៧% ពីតម្លៃបិទការជួញដូរចុងក្រោយកាលពីយប់មិញ។
ចំណែកតម្លៃប្រេងឆៅនៅលើ ទីផ្សារជួញដូរ West Texas Intermediate
(WTI) អាមេរិកបានធ្លាក់ថ្លៃខ្ពស់ជាងបន្តិចអស់ ៣៨ សេន ឬស្មើនឹង
០,៩% ត្រូវបានជួញដូរក្នុងតម្លៃ ៤៣,៨៦ ដុល្លារក្នុងមួយបារ៉ែល។
ទីផ្សារប្រេងឆៅបានស្ទុះងើបឡើងវិញកាលពីប៉ុន្មានសប្តាហ៍មុនបន្ទាប់ពីបានធ្លាក់ថ្លៃអស់ជិត
២០% ចាប់តាំងពីមុនពាក់កណ្តាលខែឧសភាឆ្នាំ ២០១៦មក។
ក៏ប៉ុន្តែរបាយការណ៍របស់វិទ្យាស្ថានប្រេងកាតអាមេរិកបានបង្ហាញថា
ការស្តុកប្រេងឆៅរបស់ខ្លួនបានកើនឡើងចំនួន ៨៥១
០០០បារ៉ែលក្នុងសប្តាហ៍ថ្ងៃ ២៣ មិថុនាកន្លងទៅក្នុងចំនួនសរុប
៥០៩,៥ លានបារ៉ែល។
តម្លៃប្រេងឆៅនៅតែធ្លាក់ចុះបើទោះបីជាមានការខិតខំប្រឹងប្រែងជាបន្តបន្ទាប់របស់អង្គការ
OPEC យ៉ាងណាក៏ដោយដើម្បីកាត់បន្ថយផលិតកម្មប្រេងឲ្យបានចំនួន ១,៨
លានបារ៉ែលក្នុងមួយថ្ងៃរវាងខែមករាឆ្នាំ ២០១៧ ដល់ខែមីនាឆ្នាំ
២០១៨។
លោក Ian Taylor អនុប្រធានក្រុមហ៊ុនប្រេងVitol
ឯករាជ្យដ៏ធំបំផុតមួយរបស់ពិភពលោកបានលើកឡើងថា
តម្លៃប្រេងឆៅនៅលើទីផ្សារអន្តរជាតិអាចនឹងស្ថិតនៅក្នុងចន្លោះតម្លៃពី
៤០ ទៅ ៥៥ ដុល្លារក្នុងមួយបារ៉ែល
នៅក្នុងរយៈពេលប៉ុន្មានត្រីមាសទៅមុខទៀតដោយសារតែផលិតកម្មប្រេងឆៅរបស់អាមេរិកមានកំណើនស្របទៅតាមតុល្យភាពប្រើប្រាស់ក្នុងទីផ្សារសាកល៕
ប្រភព៖ cnbc
