ស្ថានភាពជួញដូរភាគហ៊ុនប្រែប្រួលអ្វីខ្លះក្នុងថ្ងៃនេះ?

ការជួញដូរទីផ្សារភាគហ៊ុននៅក្នុងតំបន់អាស៊ីនៅព្រឹកនេះ ត្រូវបានគេមើលឃើញថា បានធ្លាក់ថ្លៃភាគច្រើន បន្ទាប់ពីបានឡើងថ្លៃក្នុងរយៈពេល៥ថ្ងៃកន្លងមកនេះ ខណៈដែលអ្នកវិនិយោគកំពុងរង់ចាំលទ្ធផលសេចក្តីសម្រេចរបស់ធនាគារកណ្តាលអឺរ៉ុបនៅល្ងាចនេះ និង កម្មវិធីកំណែទម្រង់ពន្ធដារថ្មីរបស់លោក Donald Trump។

ផ្សារភាគហ៊ុនជប៉ុនបានធ្លាក់ថ្លៃជាលើកដំបូងក្នុងរយៈពេល៦ថ្ងៃ ស្របពេលដែលផ្សារភាគហ៊ុនចិន សៀងហៃក៏មិនមានសញ្ញាណល្អដូចគ្នា ដោយសារតែសេដ្ឋកិច្ចរបស់ខ្លួនកំពុងជួបបញ្ហា។

ផ្សារភាគហ៊ុន MSCI Asia Pacific បានធ្លាក់ថ្លៃអស់ ០,១% ពីតម្លៃ ខ្ពស់បំផុតរបស់វាដែលមិនធ្លាប់មានគិតចាប់តាំងពីខែមិថុនាឆ្នាំ ២០១៥ នៅម៉ោង ៩ ព្រឹកនេះ។ ចំណែកផ្សារភាគហ៊ុនជប៉ុន Topix បានធ្លាក់ថ្លៃអស់ ០,១% ដែរ ខណៈដែលផ្សារភាគហ៊ុនអូស្ត្រាលី S&P/ASX 200 មិនមានការប្រែប្រួលនោះឡើយ។

នៅលើទឹកដីចិន ផ្សារភាគហ៊ុនសៀងហៃ បានធ្លាក់ចុះអស់ ១% ខណៈដែលផ្សារភាគហ៊ុនហុងកុងបានធ្លាក់ថ្លៃអស់ ០,២%។ ចំណែកនៅកូរ៉េខាងត្បូងវិញ ផ្សារភាគហ៊ុន Kospi ក៏បានធ្លាក់ថ្លៃអស់០,២% ដែរ ផ្ទុយពីភាគហ៊ុនរបស់ក្រុមហ៊ុន Samsung ដែលបានឡើងថ្លៃដល់ទៅ ១,៧% នៅពេលដែលមានការព្យាករណ៍ថា ប្រាក់ចំណូលរបស់ខ្លួនអាចនឹងកើនឡើងនៅពេលខាងមុខ។

ងាកទៅមើលស្ថានភាពជួញដូរនៅលើផ្សារភាគហ៊ុនអាមេរិកវិញ បានបិទបញ្ចប់ទៅក្នុងតម្លៃឡើងថ្លៃ ពោលគឺផ្សារភាគហ៊ុន S&P 500 បានឡើងថ្លៃ ០,១%។ នៅតំបន់អឺរ៉ុប ផ្សារភាគហ៊ុន Stoxx Europe 600 បានឡើងថ្លៃដែរក្នុងតម្លៃខ្ពស់ជាង ពោលគឺ ០,៥% ក្នុងថ្ងៃទី ៦ ដែលគេមិនធ្លាប់ឃើញតាំងពី ខែសីហា ឆ្នាំ ២០១៥ មក៕

ប្រភព៖ cnbc