ដុល្លារហាក់ងើបបន្តិចវិញ ក្រោយធ្លាក់ថ្លៃប៉ុន្មានថ្ងៃជាប់ៗគ្នា

តម្លៃប្រាក់ដុល្លារនៅថ្ងៃនេះហាក់ងើបឡើងបន្តិចវិញមិនដូចកាលពីប៉ុន្មានថ្ងៃមុននោះឡើយ បើធៀបទៅនឹងលុយយ៉េនរបស់ជប៉ុន ។ ក៏ប៉ុន្តែវានៅស្ថិតនៅក្នុងសម្ពាធមួយនៅឡើយ បន្ទាប់ពី កូរ៉េខាងជើងបានផ្គើនបាញ់មីស៊ីលជាថ្មីទៀតចូលទៅកាន់ដែនសមុទ្ររបស់ខ្លួន។

ព្រឹត្តិការណ៍នេះបានកើតមានឡើងនៅមុនពេលជំនួបផ្លូវការរវាងលោក Donald Trump ប្រធានាធិបតីអាមេរិក និង លោក Xi Jinping ប្រធានាធិបតីចិនដែលនឹងធ្វើឡើងនៅថ្ងៃព្រហស្បតិ៍ និង ថ្ងៃសុក្រសប្តាហ៍នេះ។

ការជួញដូរប្រាក់ដុល្លារធៀបទៅនឹងលុយយ៉េន គឺបានឡើងថ្លៃ ០,១% ស្ថិតនៅក្នុងតម្លៃជួញដូរ ១១០,៨៥ យ៉េនក្នុងមួយដុល្លារ ពោលគឺបានងើបឡើងពីតម្លៃ ១១០,២៧ ដុល្លារកាលពីយប់មិញ។ យ៉ាងណាមិញ សន្ទស្សន៍តម្លៃទិញដូរនៃប្រាក់ដុល្លារធៀបទៅនឹងរូបិយប័ណ្ណសំខាន់ៗចំនួន ៦ គឺស្ថិតនៅទីតាំងតម្លៃធ្លាក់ចុះមកត្រឹម ១០០,៥០។

ចំណែកការជួញដូរប្រាក់អឺរ៉ូវិញ បានឡើងថ្លៃ ០,១% ស្ថិតនៅក្នុងតម្លៃជួញដូរ ១,០៦៨១ ដុល្លារបន្ទាប់ពីបានធ្លាក់ថ្លៃដល់តម្លៃទាបបំផុត ១,០៦៣៦ ដុល្លារកាលពីម្សិលមិញ ដែលមិនធ្លាប់មានក្នុងរយៈពេល៣សប្តាហ៍កន្លងទៅ។

សម្រាប់ដុល្លារអូស្ត្រាលីវិញ ក៏បានឡើងថ្លៃដែរក្នុងចំនួន ០,១% ដូចគ្នា ស្ថិតនៅក្នុងតម្លៃជួញដូរ ០,៧៥៦៩ ដុល្លារ ឃ្លាតពីតម្លៃទាបបំផុត ០,៧៥៤៥ ដុល្លារកាលពីម្សិលមិញ៕

ប្រភព៖ cnbc