ដុល្លារធ្លាក់ថ្លៃនៅថ្ងៃនេះ

ការជួញដូរប្រាក់ដុល្លារនៅថ្ងៃច័ន្ទដើមសប្តាហ៍នេះត្រូវបានគេមើលឃើញថា បានធ្លាក់ថ្លៃវិញប្រៀបធៀបទៅនឹងលុយយ៉េនរបស់ជប៉ុនពីតម្លៃជួញដូរខ្ពស់បំផុតមិនធ្លាប់មាននៅក្នុងរយៈពេល១២សប្តាហ៍កន្លងទៅកាលពីសប្តាហ៍មុន ដោយសារតែភាពតានតឹងផ្នែកនយោបាយដែលថា កូរ៉េខាងជើងទំនងត្រៀមខ្លួនបាញ់មីស៊ីលជាថ្មីទៀតនៅពេលខាងមុខ។

ដុល្លារធ្លាក់ថ្លៃនៅថ្ងៃនេះ

យោងតាមអ្នកនាំពាក្យរុស្ស៊ីម្នាក់ដែលបានវិលត្រឡប់ពីដំណើរទស្សនកិច្ចទៅទីក្រុងព្យុងយ៉ាងត្រូវបានដកស្រង់សម្ដីដោយភ្នាក់ងារសារព័ត៌មាន RIA របស់រុស្ស៊ីកាលពីថ្ងៃសុក្របាននិយាយថា កូរ៉េខាងជើងកំពុងរៀបចំសាកល្បងបាញ់មីស៊ីលរយៈចម្ងាយឆ្ងាយដែលខ្លួនជឿថា អាចហោះទៅដល់ឆ្នេរសមុទ្រភាគខាងលិចនៃទឹកដីអាមេរិក។

ការផ្ដោតការយកចិត្តទុកដាក់ជាថ្មីទៅលើភាពតានតឹងនៃភូមិសាស្ត្រនយោបាយនៅក្នុងឧបទ្វីបកូរ៉េបានជួយគាំទ្រដល់ប្រាក់យ៉េន និងបានជួយទាញប្រាក់ដុល្លារធ្លាក់ថ្លៃ។ នៅព្រឹកនេះ ប្រាក់ដុល្លារត្រូវបានជួញដូរក្នុងតម្លៃ ១១២,៥៨ យ៉េនក្នុងមួយដុល្លារ បន្ទាប់ពីត្រូវបានជួញដូរក្នុងតម្លៃ ១១៣,៤៤ យ៉េនក្នុងមួយដុល្លារ ដែលជាតម្លៃជួញដូរខ្ពស់បំផុតមិនធ្លាប់មានគិតចាប់តាំងពីថ្ងៃទី ១៤ កក្កដាមក។

ចំណែកសន្ទស្សន៍ប្រាក់ដុល្លារធៀបទៅនឹងរូបិយប័ណ្ណនានាវិញ បានធ្លាក់ថ្លៃអស់ ០,១% ស្ថិតនៅទីតាំងតម្លៃ ៩៣,៧៣៣។ កាលពីថ្ងៃសុក្រវាបានឡើងថ្លៃដល់ទីតាំងតម្លៃ ៩៤,២៦៧ ដែលជាទីតាំងតម្លៃឡើងថ្លៃខ្ពស់បំផុតមិនធ្លាប់មាននៅក្នុងរយៈពេល២ខែកន្លងទៅ។

ទិន្នន័យប្រាក់ឈ្នួលពីរបាយការណ៍ទីផ្សារការងារនៅខែកញ្ញារបស់អាមេរិកត្រូវបានគេមើលឃើញថា ជាសញ្ញាមួយបង្ហាញពីកំណើនអតិផរណា និងធ្វើឱ្យប្រាក់ដុល្លារហក់ឡើងកាលពីថ្ងៃ សុក្រខណៈដែលមានការរំពឹងទុកលើការដំឡើងអត្រាការប្រាក់របស់ធនាគារកណ្តាលអាមេរិកជាថ្មីម្តងទៀតនៅក្នុងខែធ្នូខាងមុខ។

ក្រឡេកមើលប្រាក់ឈ្នួលជាមធ្យមបានកើនឡើង ០,៥% នៅក្នុងខែកញ្ញាកន្លងទៅបន្ទាប់ពីមានកំណើន ០,២% កាលពី ខែសីហា។ ការកើនឡើងនេះបានកើតមានឡើងនៅខណៈពេលដែលទីផ្សារការងាររបស់ខ្លួនបានធ្លាក់ចុះអស់ ៣៣ ០០០ កន្លែងកាលពីខែមុនបន្ទាប់ពីព្យុះ Hurvey និង Irma បានបោកបក់ចូលប្រទេសនេះ។

សម្រាប់លុយផោនរបស់អង់គ្លេសវិញបានឡើងថ្លៃ ០,២% ត្រូវបានជួញដូរក្នុងតម្លៃ ១,៣០៨៤ ដុល្លារ។ កាលពីសប្តាហ៍មុនវាបានធ្លាក់ថ្លៃអស់ ២,៥% ធៀបទៅនឹងលុយដុល្លារកាលពីសប្តាហ៍មុន ដែលជាការធ្លាក់ថ្លៃប្រចាំសប្តាហ៍ដ៏អាក្រក់បំផុតមិនធ្លាប់មាននៅក្នុងឆ្នាំនេះ។ ការធ្លាក់ថ្លៃនេះគឺដោយសារតែវិបត្តិនយោបាយនៅក្នុងប្រទេសនេះស្ថិតនៅក្នុងភាពចម្រូងចម្រាសនៅឡើយ។

រីឯប្រាក់អឺរ៉ូវិញបានឡើងថ្លៃ ០,១% ត្រូវបានជួញដូរក្នុងតម្លៃ ១,១៧៤៣ ដុល្លារ ពោលគឺបានឡើងថ្លៃខ្ពស់ជាងតម្លៃជួញដូរ ១,១៦៦៩ ដែលជាតម្លៃជួញដូរទាបបំផុតមិនធ្លាប់មានគិតចាប់តាំងពីថ្ងៃទី ១៧ សីហាមក៕

ប្រភព៖ cnbc