ឡើងថ្លៃមិនទាន់បានប៉ុន្មានផង ប្រាក់អឺរ៉ូធ្លាក់ថ្លៃវិញ

ការជួញដូរប្រាក់អឺរ៉ូគិតមកដល់ថ្ងៃអង្គារនេះកំពុងបង្ហាញសញ្ញាណអវិជ្ជមាន ក្រោយឡើងថ្លៃខ្ពស់កាលពីម្សិលមិញបន្ទាប់ពីលទ្ធផលឆ្នោតនៅបារាំងបង្ហាញជាផ្លូវការ ខណៈដែលលុយដុល្លារកាណាដាបានធ្លាក់ថ្លៃដែរ។

សន្ទស្សន៍តម្លៃជួញដូរប្រាក់អឺរ៉ូបានធ្លាក់ថ្លៃអស់ ០,១% ស្ថិតនៅក្នុងតម្លៃជួញដូរ ១,០៨៦០ ដុល្លារ ក្រោយហក់ឡើងដល់ទៅ ១,០៩៤០ ដុល្លារកាលពីម្សិលមិញ ដែលជាតម្លៃខ្ពស់បំផុតមិនធ្លាប់មានគិតចាប់តាំងពីថ្ងៃ ទី ១០ ខែវិច្ឆិកាមក។

លទ្ធផលឆ្នោតនៅជុំទី១បានបង្ហាញថា លោក Macron ទទួលបានសម្លេងឆ្នោតនាំមុខលោកស្រី Marine Le Pen ដែលប្រកាន់គោលនយោបាយចង់ផ្តាច់បារាំងចេញពីសហភាពអឺរ៉ុបដូចទៅនឹងអង់គ្លេសដែរប្រសិនបើលោកស្រីឈ្នះឆ្នោត។ ក្នុងខណៈដែលជុំទី២នឹងធ្វើឡើងនៅថ្ងៃទី ៧ ឧសភាខាងមុខ ប្រាក់អឺរ៉ូបានរងសម្ពាធនៅពេលដែលប្រជាប្រិយភាពរបស់លោកស្រីមានការកើនឡើង ដែលជាក្តី បារម្ភមួយសម្រាប់អ្នកវិនិយោគ។

ងាកទៅមើលប្រាក់ដុល្លារកាណាដាវិញ បានធ្លាក់ថ្លៃអស់ ០,៤% នៅពេលចាប់ផ្តើមបើកការជួញដូរនៅលើទីផ្សារអាស៊ី បន្ទាប់ពីរដ្ឋលេខាធិការរបស់ក្រសួងពាណិជ្ជកម្មអាមេរិក Wilbur Ross បានលើកឡើងថា ស្ថាប័នរបស់លោកនឹងដាក់ពន្ធថ្មីប្រឆាំងទៅនឹងការឧបត្ថម្ភធនថ្មីជាមធ្យមចំនួន ២០%។

ដូច្នេះធៀបទៅនឹងលុយដុល្លារ លុយដុល្លារកាណាដាត្រូវបានជួញដូរក្នុងតម្លៃ ១,៣៥៥៩ ដុល្លារ ដែលជាតម្លៃមួយទាបបំផុតមិនធ្លាប់ឃើញមានចាប់តាំងពីចុងខែធ្នូកន្លងទៅ។ ចំណែកការជួញដូរលុយដុល្លារធៀបទៅនឹងលុយយ៉េនវិញ គឺបានឡើងថ្លៃ ០,១% ស្ថិតនៅក្នុងតម្លៃជួញដូរ ១០៩,៨៩ យ៉េនក្នុងមួយដុល្លារ។ ក៏ប៉ុន្តែតម្លៃ នេះ នៅទាបជាងតម្លៃឡើងថ្លៃកាលពីម្សិលមិញ ដែលត្រូវបានជួញដូរក្នុងតម្លៃ ១១០,៦៤ យ៉េន។

អ្នកវិភាគជាច្រើនបានលើកឡើងថា លុយយ៉េនអាចឡើងថ្លៃម្តងទៀត ប្រសិនបើស្ថានភាពភូមិសាស្ត្រនយោបាយនៅឧបទ្វីបកូរ៉េបានកើនឡើងជាថ្មី។ ការប្រកាសរបស់លោក Donald Trump កាលពីម្សិលមិញដែលស្នើសុំឲ្យក្រុមប្រឹក្សាសន្តិសុខអង្គការសហប្រជាជាតិដាក់ទណ្ឌកម្មជាថ្មីដល់កូរ៉េខាងជើង គឺជាសញ្ញាណល្អមួយសម្រាប់ការជួញដូរលុយយ៉េននេះ៕

ប្រភព៖ cnbc