មាសនៅតែមិនប្រែប្រួលខ្លាំង ក្រោយឡើងថ្លៃខ្ពស់ម្សិលមិញ

ការជួញដូរមាសនៅថ្ងៃនេះហាក់ស្ងប់ស្ងាត់បន្តិចវិញ បន្ទាប់ពីបានឡើងថ្លៃខ្ពស់កាលពីម្សិលមិញ ដែលបានហក់ឡើងដល់ ២% ស្របពេលដែលស្ថានការណ៍នយោបាយរបស់អាមេរិកកំពុងធ្វើឲ្យមានការបារម្ភពីអ្នកវិនិយោគនៅមុនពេលការដំឡើងអត្រាការប្រាក់របស់ធនាគារកណ្តាលចូលមកដល់នៅខែ ក្រោយនេះ។

ការជួញដូរមាសតាមស្បតបានត្រូវជួញដូរក្នុងតម្លៃ ១ ២៥៩,៩៩ ដុល្លារក្នុងមួយ អោននៅ ព្រឹកនេះ បន្ទាប់ពីបានឡើងថ្លៃដល់តម្លៃខ្ពស់បំផុតមួយគឺ ១ ២៦៣,០២ ដុល្លារកាលពីម្សិលមិញ ដែលជាតម្លៃខ្ពស់មិនធ្លាប់មានគិតចាប់តាំងពីថ្ងៃទី ១ ឧសភាមក។ យ៉ាងណាមិញ ការឡើងថ្លៃដល់ទៅ ២% កាលពីម្សិលមិញ គឺជាការឡើងថ្លៃខ្ពស់បំផុតប្រចាំថ្ងៃដែលមិនធ្លាប់មានគិតចាប់តាំងពីខែ មិថុនាឆ្នាំមុនមក។ ចំណែកការជួញដូរមាសនៅលើទីផ្សារអាមេរិកវិញ គឺបានឡើងថ្លៃ ០,១% ស្ថិតនៅក្នុងតម្លៃ ១ ២៦០ ដុល្លារក្នុងមួយអោន។

កាលពីម្សិលមិញស្ថានការណ៍តឹងតែងនៅក្នុងនយោបាយអាមេរិក ពោលគឺការតែងតាំងលោក Robert Mueller អតីតប្រមុខស្ថាប័ន FBI ពីក្រសួងយុត្តិធម៌ឲ្យដឹងនាំស៊ើបអង្កេតលើរឿងអាស្រូវលួចចូលជ្រៀតជ្រែកទិន្នន័យនៅអំឡុងពេលយុទ្ធនាការបោះឆ្នោតប្រធានាធិបតីដោយរុស្ស៊ីគឺជាប្រធានបទសំខាន់បានប៉ះពាល់ដល់ការជួញដូរនៅលើទីផ្សារអន្តរជាតិ។

ស្ថានការណ៍នេះធ្វើឲ្យបាត់បង់ជំនឿចិត្តពីសាធារណជនដែលថា គោលនយោបាយកំណែទម្រង់ពន្ធដាររបស់លោក Trump កំពុងស្ថិតនៅក្នុងផ្លូវទាល់ច្រក នាំឲ្យមានការរិះគន់ថា លោកមិនបានធ្វើវាតាមការសន្យារបស់លោកដូចនៅមុនពេលបោះឆ្នោត។ បញ្ហានេះ ក៏បានធ្វើឲ្យរដ្ឋបាលលោក Trump និង រដ្ឋបាលលោកពូទីនមើលមុខគ្នាមិនចំដែរ ស្របពេលដែលស្ថានការណ៍នយោបាយនៅតំបន់អាស៊ីក៏មិនទាន់ធូរស្រាលផងនោះ៕

ប្រភព៖ cnbc 