មាសបន្តឡើងថ្លៃទៀតក្នុងថ្ងៃនេះ

ការជួញដូរមាសមកដល់ថ្ងៃអង្គារនេះត្រូវបានគេមើលឃើញថា បានហក់ឡើងបន្តិចវិញ ស្របពេលដែលអ្នកជួញដូរកំពុងផ្តោតលើភាពជ្រួលច្របល់នៃការវាយប្រហារដោយការបំផ្ទុះគ្រាប់បែកនៅក្នុងព្រឹត្តិការណ៍ប្រគំតន្ត្រីដ៏ធំមួយនៅទីក្រុង Manchester ចក្រភពអង់គ្លេសកាលពីយប់មិញ។

តម្លៃមាសត្រូវបានជួយជ្រោមជ្រែងដោយសារតែស្ថានភាពជួញដូរប្រាក់ដុល្លារមិនសូវល្អ ធៀបទៅនឹងប្រាក់អឺរ៉ូនៅស្របពេលដែលស្ថានការណ៍នយោបាយអាមេរិកក៏កំពុងកើនកម្តៅនៅឡើយទាក់ទិនទៅនឹងព្រឹត្តិការណ៍បោះឆ្នោតជ្រើសរើសប្រធានាធិបតីថ្មី។

ការជួញដូរមាសនៅលើទីផ្សារអាស៊ីបានឡើងថ្លៃ ០,១% ស្ថិតនៅក្នុងតម្លៃជួញដូរ ១ ២៦១,៦២ ដុល្លារក្នុងមួយអោន។ ចំណែកតម្លៃមាសសម្រាប់ទីផ្សារអាមេរិកវិញ ស្ថិតនៅក្នុងតម្លៃជួញដូរទាបជាងបន្តិចពោលគឺ ១ ២៦១ ដុល្លារក្នុងមួយអោន។

ងាកទៅមើលការលម្អិតព្រឹត្តិការណ៍បំផ្ទុះគ្រាប់បែកនៅទីក្រុង Manchester របស់អង់គ្លេសកាលពីយប់មិញបានឲ្យដឹងថា មានមនុស្ស ១៩ នាក់បានស្លាប់ និង ៥០ នាក់ផ្សេងទៀតបានរងរបួស។ បើយោងតាមការស៊ើបអង្កេតបឋមរបស់ប៉ូលិសបានឲ្យដឹងថា ការបំផ្ទុះគ្រាប់បែកនេះគឺពិតជាធ្វើឡើងដោយក្រុមភេរវកម្ម៕

ប្រភព៖ cnbc