ប្រាក់អឺរ៉ូធ្លាក់ថ្លៃបន្តិចវិញថ្ងៃនេះ

ការជួញដូរប្រាក់អឺរ៉ូនៅព្រឹកនេះមិនមានសញ្ញាណល្អដូចកាលពីម្សិលមិញនោះឡើយ ប៉ុន្តែវានៅតែស្ថិតនៅក្នុងទីតាំងតម្លៃដ៏ល្អមួយ ខណៈដែលអ្នកជួញដូរកំពុងតាមដានទៅនឹងស្ថានភាពនយោបាយនៅក្នុងតំបន់អឺរ៉ុប និង សញ្ញាណនានាដែលបង្ហាញពីភាពវិជ្ជមាននៃសេដ្ឋកិច្ចនៅក្នុងតំបន់នេះ។

ការជួញដូរប្រាក់អឺរ៉ូធៀបទៅនឹងប្រាក់ដុល្លារបានធ្លាក់ថ្លៃពីតម្លៃ ១,១០២៤ ដុល្លារកាលពីម្សិលមិញ មកត្រឹមតម្លៃ ១,០៩២១ ដុល្លារនៅក្នុងថ្ងៃនេះ។ ទោះបីជាបែបនេះក្តីតម្លៃខាងលើ គឺជាតម្លៃខ្ពស់បំផុតមួយដែលមិនធ្លាប់មាននៅក្នុងរយៈពេល ៦ខែកន្លងទៅ។ ការឡើងថ្លៃនៃប្រាក់អឺរ៉ូបានកើតមានឡើងបន្ទាប់ពីជ័យជំនៈបោះឆ្នោតនៅបារាំងបានធ្លាក់ទៅលើលោក Emmanuel Macron។

ធៀបទៅនឹងលុយយ៉េន ប្រាក់អឺរ៉ូត្រូវបានជួញដូរក្នុងតម្លៃ ១២៣,៧៤ យ៉េនក្នុងមួយអឺរ៉ូ បន្ទាប់ពីវាបានឡើងថ្លៃដល់ ទៅ ១២៤,៥៨ យ៉េនក្នុងមួយអឺរ៉ូកាលពីម្សិលមិញ។ ស្របពេលដែលស្ថានការណ៍បោះឆ្នោតនៅបារាំងត្រូវបានបញ្ចប់ អ្នកវិនិយោគបានបង្វែរមកចាប់អារម្មណ៍ទៅនឹងថា តើនៅពេលណាដែលធនាគារកណ្តាលអឺរ៉ុបនឹងចាត់វិធានការណ៍ថ្មីលើគោលនយោបាយរូបិយប័ណ្ណរបស់ខ្លួននៅក្នុងតំបន់នេះ។

ចំណែកការជួញដូរប្រាក់ដុល្លារធៀបទៅនឹងលុយយ៉េនវិញ ក៏មានការឡើងថ្លៃដែរ ពោលគឺត្រូវបានជួញដូរក្នុងតម្លៃ ១១៣,២៧ យ៉េនក្នុងមួយដុល្លារ ដែលជាតម្លៃខ្ពស់បំផុតមិនធ្លាប់គិតចាប់តាំងពីពាក់កណ្តាលខែមិនាកន្លងទៅ។ ការឡើងថ្លៃនៃប្រាក់ដុល្លារនេះគឺដោយសារតែមានទិន្នន័យបង្ហាញពី សុទិដ្ឋិនិយមនៃសេដ្ឋកិច្ចអាមេរិកដើមឆ្នាំ ២០១៧នេះ។

ងាកទៅមើលការជួញដូរប្រាក់ដុល្លារអូស្រ្តាលីវិញ បានធ្លាក់ថ្លៃដល់ ០,៧៣៦៤ ដុល្លារ ដែលជាតម្លៃមួយទាបបំផុតមិនធ្លាប់ក្នុងរយៈពេល៤ខែកន្លងទៅនេះ បន្ទាប់ពីទិន្នន័យលក់រាយនៅក្នុងស្រុកបានធ្លាក់ចុះអស់ ០,១% នៅពាក់កណ្តាលខែមិនា ផ្ទុយពីការព្យាករណ៍ថា វានឹងកើនឡើង ០,៣%។ ការធ្លាក់ថ្លៃនៃប្រាក់ដុល្លារអូស្ត្រាលី ក៏ដោយសារតែតម្លៃភាគហ៊ុនរបស់ក្រុមហ៊ុននានារបស់ខ្លួនធ្លាក់ចុះដែរ៕

ប្រភព៖ cnbc