Friday, May 5, 2017

Home Financial News មាសបន្តធ្លាក់ថ្លៃទៀត ស្របពេលដែលការនាំចូលមាសរបស់ឥណ្ឌាមានការកើនឡើង

មាសបន្តធ្លាក់ថ្លៃទៀត ស្របពេលដែលការនាំចូលមាសរបស់ឥណ្ឌាមានការកើនឡើង

ការជួញដូរមាសនៅថ្ងៃសុក្រនេះ បានបង្ហាញសញ្ញាណអវិជ្ជមានទៀត ក្រោយធ្លាក់ថ្លៃប៉ុន្មានថ្ងៃចុងក្រោយជាប់ៗគ្នា។ ការជួញដូរមាសនៅលើទីផ្សារអន្តរជាតិបានស្ថិតនៅក្នុងទីតាំងតម្លៃ ១ ២២៨ ដុល្លារ បន្ទាប់ពីត្រូវបានជួញដូរដល់តម្លៃ ១ ២៣៧ ដុល្លារកាលពីថ្ងៃទី ៣ ឧសភាកន្លងទៅ។

ការធ្លាក់ថ្លៃនេះបានកើតមានឡើងស្របពេលដែលធនាគារកណ្តាលអាមេរិកបានធ្វើសេចក្តីសម្រេចនៅក្នុងកិច្ចប្រជុំ២ថ្ងៃរបស់ខ្លួនកន្លងទៅដោយរក្សាអត្រាការប្រាក់ឲ្យនៅដដែល ធ្វើឲ្យមានការព្យាករណ៍ទុកជាមុនថា ការដំឡើងអត្រាការប្រាក់នឹងធ្វើឡើងជាថ្មីនៅក្នុងខែមិថុនាក្រោយនេះ។

យ៉ាងណាមិញ ស្របពេលដែលទីផ្សារមាសមានសញ្ញាណមិនសូវល្អបែបនេះ ងាកទោមើលឥណ្ឌាវិញដែលជាមហាយក្សនាំចូលមាសធំបំផុតលំដាប់ទី២បន្ទាប់ពីចិននោះ ត្រូវបានគេរកឃើញថា បាននាំចូលមាសច្រើនបំផុតនៅក្នុងរយៈពេល២ឆ្នាំចុងក្រោយនេះ។

ទិន្នន័យនាំចូលមាសរបស់ឥណ្ឌាបានបង្ហាញថា ការនាំចូលមាសមានការកើនឡើងពី ១២៧,៤ តោនកាលពីឆ្នាំមុន ដល់ ២៧០,១ តោននៅត្រីមាសដំបូងឆ្នាំ ២០១៧នេះ ។ នេះគឺជាចំនួនមួយដ៏ច្រើនបំផុត ពោលគឺមានចំនួនប្រហាក់ប្រហែលទៅនឹងត្រីមាសទី ៤ ឆ្នាំ ២០១៤ កន្លងទៅដែលមានចំនួន ២៧៩,៥ តោន។

តម្រូវការមាសនៅក្នុងស្រុកបានកើនឡើង ១៥% ក្នុងចំនួន ១២៣,៥ តោននៅត្រីមាសដំបូងឆ្នាំ ២០១៧ នេះ ហើយបើតម្រូវការនេះនៅតែបន្តកើនឡើងទៀតនោះ វាគ្មានអ្វីដែលធ្វើឲ្យប៉ះពាល់ដល់តម្លៃរបស់វានោះឡើយ។ ផ្អែកលើការលើកឡើងរបស់ក្រុមហ៊ុន P.R. Somasundaram របស់ឥណ្ឌា គេសន្និដ្ឋានថា ឆ្នាំ ២០១៧នេះ ការនាំចូលមាសសរុបអាចកើនឡើងចន្លោះពី ៦៥០ តោនទៅ ៧៥០ តោន។

តម្រូវការមាសដ៏ច្រើននេះមិនមែនជារឿងចៃដន្យនោះទេសម្រាប់ឥណ្ឌា ពីព្រោះតែវាពេញនិយមសម្រាប់ការប្រើប្រាស់នៅក្នុងប្រទេសនេះជាពិសេសការយកទៅធ្វើជាគ្រឿងអលង្ការសម្រាប់ចូលរួមនៅក្នុងពិធីបុណ្យផ្សេងៗ ជាពិសេសសម្រាប់ពិធីរៀបអាពាហ៍ពិពាហ៍តែម្តង៕