Monday, May 8, 2017

Home Financial News ផ្សារភាគហ៊ុនអាស៊ីឡើងថ្លៃខ្ពស់ ក្រោយបារាំងបោះឆ្នោតរកឃើញប្រធានាធិបតីថ្មី

ផ្សារភាគហ៊ុនអាស៊ីឡើងថ្លៃខ្ពស់ ក្រោយបារាំងបោះឆ្នោតរកឃើញប្រធានាធិបតីថ្មី

ការជួញដូរនៅលើផ្សារភាគហ៊ុនអាស៊ីនៅព្រឹកថ្ងៃច័ន្ទនេះត្រូវបានគេមើលឃើញថា បានឡើងថ្លៃខ្ពស់បន្ទាប់ពីការបោះឆ្នោតនៅបារាំងកាលពីថ្ងៃអាទិត្យម្សិលមិញបានបង្ហាញជ័យជំនះយ៉ាងភ្លូកទឹកភ្លូកដីទៅលើលោកEmmanuel Macron ហើយក្នុងនោះផ្សារភាគហ៊ុនជប៉ុន Nikkei បានឡើងថ្លៃដល់តម្លៃខ្ពស់បំផុតមួយដែលមិនធ្លាប់មានគិតចាប់តាំងពីខែធ្នូឆ្នាំ ២០១៥មក។

លោក Emmanuel Macron បានយកឈ្នះលើគូប្រជែងរបស់លោកគឺលោកស្រី Marine Le Pen ដោយទទួលបានសម្លេងឆ្នោត ៦៥,១%។ ជ័យជំនះនេះ បានធ្វើឲ្យលោកក្លាយជាប្រធានាធិបតីក្មេងជាងគេបំផុតនៅក្នុងប្រវត្តិសាស្ត្ររបស់បារាំងដែលមាវ័យត្រឹមតែ ៣៩ ឆ្នាំប៉ុណ្ណោះ។

លទ្ធផលនេះបានធ្វើឲ្យសន្ទស្សន៍ជួញដូរភាគហ៊ុននៅលើទឹកដីអាស៊ី ពោលគឺផ្សារភាគហ៊ុនជប៉ុន Nikkei 225 បានឡើងថ្លៃដល់ទៅ ១,៦៨% ដែលជាការឡើងថ្លៃដល់តម្លៃខ្ពស់បំផុតមួយមិនធ្លាប់មានគិតចាប់តាំងពីឆ្នាំ ២០១៥មក។ ចំណែកការជួញដូរភាគហ៊ុននៅលើទឹកដី កូរ៉េខាងត្បូងវិញ បានបង្ហាញថា ផ្សារភាគហ៊ុន Kospi បានឡើងថ្លៃ ០,៥៦%។

ងាកទៅមើលផ្សារភាគហ៊ុនអូស្ត្រាលីឯណោះវិញ ផ្សារភាគហ៊ុន ASX 200 បានឡើងថ្លៃ ០,៦៩% ដោយក្នុងនោះភាគហ៊ុនរបស់ក្រុមហ៊ុនថាមពល និង ក្រុមហ៊ុនរ៉ែ បានឡើងថ្លៃខ្ពស់ដល់ទៅ ១,៨៧% និង ១,៦៣%។ ចំណែកការជួញដូរផ្សារភាគហ៊ុនចិនវិញ ផ្សារភាគហ៊ុនសៀងហៃ និង Shenzhen បានធ្លាក់ថ្លៃពីគេ ពោលគឺធ្លាក់ថ្លៃអស់ ០,៥១ %និង ០,៤២% ខណៈដែលផ្សារភាគហ៊ុនហុងកុង បានឡើងថ្លៃ ០៣២%។

នៅព្រឹកនេះ គេរំពឹងថា របាយការណ៍ពាណិជ្ជកម្មរបស់ចិនសម្រាប់ខែមេសានឹងត្រូវបញ្ចេញឲ្យដឹង។ ចំណែករបាយការណ៍ពាណិជ្ជកម្មរបស់ជប៉ុនក៏ត្រូវបានគេរំពឹងថា នឹងបង្ហាញឲ្យដឹងនៅពេលឆាប់ៗនេះដែរ។ ផ្សារភាគហ៊ុនអាមេរិកមិនទាន់បើកឲ្យមានការជួញដូរនៅឡើយទេ ក្រោយបិទការជួញដូរក្នុងតម្លៃឡើងថ្លៃកាលពីថ្ងៃសុក្រសប្តាហ៍មុន៕

ប្រភព៖ cnbc