ធៀបទៅនឹងលុយដុល្លារ ប្រាក់អឺរ៉ូត្រូវបានជួញដូរក្នុងតម្លៃជាង ១,១២៥០ ដុល្លារបន្ទាប់ពីបានហក់ដល់ ១,១២៦៤ ដុល្លារកាលពីយប់មិញ ដែលជាតម្លៃឡើងថ្លៃខ្ពស់បំផុតមិនធ្លាប់មានគិតចាប់តាំងពីថ្ងៃទី ៩ វិច្ឆិកាឆ្នាំ ២០១៦មក។ ការឡើងថ្លៃនេះបានជាប់ពាក់ព័ន្ធទៅនឹង គោលនយោបាយធនាគារកណ្តាលអឺរ៉ុប (ECB) ដែលគេរំពឹងទុកថា នឹងដាក់គោលនយោបាយរូបិយប័ណ្ណថ្មីជួយឲ្យតម្លៃប្រាក់អឺរ៉ូមានស្ថិរភាពល្អឡើងវិញ។
ការជួញដូរប្រាក់អឺរ៉ូនៅលើទីផ្សារអាស៊ីត្រូវបានគេមើលឃើញថា បានហក់ឡើងដល់តម្លៃមួយខ្ពស់បំផុត ក្រោយព្រឹត្តិការណ៍បំផ្ទុះគ្រាប់បែកនៅក្នុងព្រឹត្តិការណ៍ប្រគំតន្ត្រីដ៏ធំមួយនាទីក្រុង Manchesterចក្រភពអង់គ្លេសកាលពីយប់មិញបានបណ្តាលឲ្យមនុស្ស ១៩ នាក់ស្លាប់ និង ៥០នាក់ផ្សេងទៀតរងរបួស។ ការឡើងថ្លៃនេះក៏កើតមានព្រមគ្នាផងដែរបន្ទាប់ពីលោកស្រី អធិការបតីអាល្លឺម៉ង់គឺលោកស្រី Angela Merkel បានលើកឡើងថា តម្លៃប្រាក់អឺរ៉ូគឺនៅទាបនៅឡើយ។
ងាកទៅមើលការជួញដូរលុយផោនរបស់អង់គ្លេសធៀបទៅនឹងលុយយ៉េនជប៉ុនវិញ បានធ្លាក់ថ្លៃអស់ ០,៤៥ % ត្រូវបានជួញដូរក្នុងតម្លៃ ១៤៤,០៧ យ៉េន។ ក៏ប៉ុន្តែបើធៀបទៅនឹងរូបិយប័ណ្ណជួញដូរសំខាន់ៗផ្សេងទៀតគេសង្កេតឃើញថា វាមានសញ្ញាណល្អនៅឡើយ។ ធៀបទៅនឹងលុយដុល្លារវិញ វាមានការប្រែប្រួលតិចតួចដោយត្រូវបានជួញដូរក្នុងតម្លៃ ១,២៩៩៤ ដុល្លារ។
ចំណែកការជួញដូរប្រាក់ដុល្លារធៀបទៅនឹងលុយយ៉េនជប៉ុនវិញបានធ្លាក់ថ្លៃអស់ ០,២% ត្រូវបានជួញដូរក្នុងតម្លៃ ១១១,០៥៥ យ៉េនបន្ទាប់ពីបានធ្លាក់ថ្លៃដល់ ១១០,៨៦០ យ៉េន។ អឺរ៉ូក៏ធ្លាក់ថ្លៃបន្តិចដែរ អស់ ០,២% បើធៀបទៅនឹងលុយយ៉េន ស្ថិតនៅក្នុងតម្លៃជួញដូរ ១២៤,៨៣០ យ៉េនក្នុងមួយអឺរ៉ូ។ លុយដុល្លារអូស្ត្រាលីធ្លាក់ថ្លៃអស់ ០,២% ស្ថិតនៅក្នុងតម្លៃជួញដូរ ០,៧៤៧០ ដុល្លារ ខណៈដែលលុយដុល្លារនូវែលហ្សេឡង់ឆ្លៀតឡើងថ្លៃបាន ០,១% ត្រូវបានជួញដូរក្នុងតម្លៃ ០,៧០០៤ ដុល្លារ៕
ប្រភព៖ cnbc
No comments:
Post a Comment