មាសងើបឡើងវិញ ក្រោយធ្លាក់ថ្លៃជាប់ៗគ្នាប៉ុន្មានសប្តាហ៍ចុងក្រោយ

ការជួញដូរមាសនៅថ្ងៃច័ន្ទនេះ មានសញ្ញាណល្អឡើងវិញ ក្រោយធ្លាក់ថ្លៃជាបន្តបន្ទាប់នៅក្នុងរយៈពេលប៉ុន្មានសប្តាហ៍ចុងក្រោយ។ ការជួញដូរមាសតាមស្បត (Spot Gold Trading) បានឡើងថ្លៃ ០,២% ស្ថិតនៅក្នុងតម្លៃជួញដូរ ១ ២២៩,៩០ ដុល្លារក្នុងមួយអោន ក្រោយធ្លាក់ថ្លៃដល់ ១ ២២៤,៨៦ ដុល្លារក្នុងមួយអោនកាលពីថ្ងៃសុក្រកន្លងទៅ។

នៅទីផ្សារអាមេរិកវិញ តម្លៃជួញដូរថ្ងៃនេះគឺ ១ ២៣០,៥០ ដុល្លារក្នុងមួយអោន ពោលគឺបានឡើងថ្លៃ ០,៣%។ កាលពីសប្តាហ៍មុន ហាងឆេងមាសបានធ្លាក់ចុះក្នុងភាគរយមួយខ្ពស់បំផុតប្រចាំសប្តាហ៍ ពោលគឺប្រមាណ ៣% ដែលចំនួននេះគេមិនធ្លាប់ឃើញមាននោះ ឡើយគិតចាប់តាំងពីថ្ងៃទី ១១ វិច្ឆិកាឆ្នាំ ២០១៦មក។

ងាកទៅមើលតម្រូវការមាសនៅឥណ្ឌាគិតត្រឹមពាក់កណ្តាល ២០១៧ នេះ មានការកើនឡើងខ្ពស់ ហើយក្រុមហ៊ុនជួញដូរមាសកំពុងតាមដានបន្តទៅទៀតលើគោលនយោបាយពន្ធនាំចូលលើទំនិញមាសរបស់រដ្ឋាភិបាលប្រទេសនេះសម្រាប់ពាក់កណ្តាលឆ្នាំទៅមុខទៀត។

ចំណែកចិនដែលជាមហាអំណាចនាំចូលមាសច្រើនជាងគេបំផុតក្នុងលោកនោះ បានបង្ហាញថា ការនាំចូលមាសរបស់ខ្លួនប្រចាំខែមេសាកន្លងទៅមិនមានការប្រែប្រួលខ្លាំងនោះឡើយ ពោលគឺមានចំនួន ៥៩,២៤ លានអោន នេះបើយោងតាមរបាយការណ៍របស់ធនាគារកណ្តាលរបស់ខ្លួន។ តម្រូវការមាសនៅលើទីផ្សារអាស៊ីកាលពីសប្តាហ៍បានកើនឡើង ក៏ប៉ុន្តែអ្នកជួញដូរបានឈប់ទិញមាសទុក ហើយពួកគេបានរង់ចាំឲ្យទីផ្សារមាសធ្លាក់ថ្លៃទាបជាងនេះទៀត៕

ប្រភព៖ cnbc