Thursday, May 18, 2017

Home Financial News ដុល្លារមានសង្ឃឹមតិចតួចវិញក្នុងថ្ងៃនេះ ក្រោយដាំក្បាលចុះប៉ុន្មានថ្ងៃជាប់ៗគ្នា

ដុល្លារមានសង្ឃឹមតិចតួចវិញក្នុងថ្ងៃនេះ ក្រោយដាំក្បាលចុះប៉ុន្មានថ្ងៃជាប់ៗគ្នា

ការជួញដូរប្រាក់ដុល្លារនៅថ្ងៃព្រហស្បតិ៍នេះ ត្រូវបានគេមើលឃើញថា ហាក់មិនមានសញ្ញាណវិជ្ជមានខ្លាំងនោះឡើយបើធៀបទៅនឹងរូបិយប័ណ្ណសំខាន់ៗផ្សេងទៀត ខណៈដែលស្ថានការណ៍នយោបាយអាមេរិកហាក់កាន់តែធ្ងន់ធ្ងរទៅៗ ហើយទំនងលោក Donald Trump អាចពន្យារគោលនយោបាយសេដ្ឋកិច្ចរបស់លោកដោយសារតែស្ថានការណ៍ដ៏តឹងតែងនេះ។

ការតែងតាំងអតីតប្រមុខ FBI ពីក្រសួងយុត្តិធម៌អាមេរិកកាល ពីម្សិលមិញដើម្បីទទួលខុសត្រូវលើការស៊ើបអង្កេតនៅក្នុងសំណុំរឿងរុស្ស៊ីចូលជ្រៀតជ្រែកកិច្ចការបោះឆ្នោតរបស់អាមេរិកកាលពីឆ្នាំ ២០១៦កន្លងទៅ។ ការតែងតាំងនេះបានធ្វើឡើងបន្ទាប់ពីលោក James Comey អតីតប្រមុខ FBI ដែលទើបនឹងបណ្តេញចេញពីតំណែងថ្មីៗបានមានគម្រោងលូកដៃចូលស៊ើបអង្កេតលើសំណុំរឿងនេះ។

នៅក្នុងរយៈពេលជួញដូរ៤ថ្ងៃនេះ ប្រាក់ដុល្លារបានធ្លាក់ថ្លៃដល់តម្លៃទាបបំផុតមិនធ្លាប់មានគិតចាប់តាំងពីខែ វិច្ឆិកាឆ្នាំ ២០១៦មក ពោលគឺបានធ្លាក់ថ្លៃអស់ ២,២%។ សន្ទស្សន៍តម្លៃប្រាក់ដុល្លារធៀបទៅនឹងរូបិយប័ណ្ណទូទៅបានស្ថិតនៅទីតាំងតម្លៃ ៩៧,៤២ ដែលជាតម្លៃមួយប្រហាក់ប្រហែលទៅនឹងតម្លៃនៅមុនបោះឆ្នោតជ្រើសរើសប្រធានាធិបតី។

កាលពីម្សិលមិញនេះ ប្រាក់ដុល្លារបានធ្លាក់ថ្លៃអស់ ២,០៩% បើធៀបទៅនឹងលុយយ៉េន ដែលជាការធ្លាក់ថ្លៃដ៏ច្រើនបំផុតមិនធ្លាប់មានគិតចាប់តាំងពីថ្ងៃទី ២៩ ខែកក្កដាឆ្នាំមុន។ នៅពេលចាប់ផ្តើមជួញដូរភ្លាមៗនៅព្រឹកនេះ វាក៏បានធ្លាក់ថ្លៃដល់ទៅ ១១០,៥៣ យ៉េនដែរ មុននឹងងើបឡើងវិញបន្តិចក្នុងតម្លៃ ១១១,០៩ យ៉េនក្នុងមួយដុល្លារ ឬ ស្មើនឹង ០,៣%។

ការជួញដូរលុយយ៉េនបានបាញ់ឆ្ពោះនៅរកសញ្ញាណវិជ្ជមាន ដោយសារតែមានទិន្នន័យបានបង្ហាញថា កំណើនផលិតក្នុងស្រុកសរុបរបស់ខ្លួន (GDP) បានកើនឡើងដល់ទៅ ២,២% នៅក្នុងរយៈពេល៣ខែដំបូងក្នុងឆ្នាំនេះ ដែលនេះមានចំនួនខ្ពស់ជាងការព្យាករណ៍ដែលថា វាបានត្រឹមតែ ១,៧% តែប៉ុណ្ណោះ។

ងាកទៅមើលការជួញដូរប្រាក់អឺរ៉ូវិញ បានឡើងថ្លៃដល់តម្លៃខ្ពស់បំផុតមិនធ្លាប់មានក្នុងរយៈពេល៦ខែមកនោះ ពោលគឺត្រូវបានជួញដូរក្នុងតម្លៃ ១,១១៧៤ ដុល្លារ។ ចំណែកការជួញដូរប្រាក់ស្វីសហ្វ្រង់វិញ ក៏ឡើងថ្លៃដល់កំណត់ត្រាខ្ពស់ប្រចាំខែរហូតដល់ ០,៩៧៧៤ ដុល្លារកាលពីម្សិលមិញ៕

ប្រភព៖ cnbc