ផ្សារភាគហ៊ុនអាស៊ី មានវាសនាមិនល្អ៣ថ្ងៃមកនេះ

ការជួញដូរនៅលើទីផ្សារភាគហ៊ុនអាស៊ីក្នុងរយៈពេល៣ថ្ងៃកន្លងមក មិនមានសញ្ញាណល្អនោះឡើយ ខណៈដែលតម្លៃប្រេងក៏កំពុងរងសម្ពាធធ្លាក់ថ្លៃមកវិញ និង ភាគហ៊ុនរបស់ក្រុមហ៊ុនប្រេងទាំងនោះកំពុងដាំក្បាលចុះដែរនៅមុនការបោះឆ្នោតជ្រើសរើសប្រធានាធិបតីបារាំងចូលមកដល់នៅថ្ងៃអាទិត្យខាងមុខ។

ផ្សារភាគហ៊ុន MSCI ក្រៅទឹកដីជប៉ុន បានធ្លាក់ថ្លៃអស់ ០,៤% នៅព្រឹកថ្ងៃសុក្រនេះ ហើយកំពុងត្រូវបានជួញដូរនៅក្នុងតម្លៃទាបបំផុតមួយដែលមិនធ្លាប់មានគិតចាប់តាំងពីថ្ងៃទី ២៥ មេសាមកនេះ។ ចំណែកផ្សារភាគហ៊ុនហុងកុង Hang Seng វិញ ក៏ស្ថិតនៅក្នុងស្ថានភាពមិនល្អដែរ ដោយបានធ្លាក់ថ្លៃអស់ ០,៨% នៅពេលចាប់ផ្តើមបើកការជួញដូរ។

ងាកទៅមើលផ្សារភាគហ៊ុនអូស្ត្រាលី ASX 200 វិញ បានធ្លាក់ថ្លៃអស់ ០,៥% ដែលក្នុងនោះភាគហ៊ុនរបស់ក្រុមហ៊ុនដេក និង រ៉ែធ្លាក់ថ្លៃខ្ពស់ជាងគេរហូតដល់ចន្លោះពី ១,៥០% ដល់ទៅ ៣,៥០% ឯណោះ។ សម្រាប់ផ្សារភាគហ៊ុនកូរ៉េខាងត្បូង Kospi និង ផ្សារភាគហ៊ុនជប៉ុន Nikei 225 មិនបានបើកឲ្យជួញដូរនោះឡើយដោយសារតែជាថ្ងៃបុណ្យឈប់សម្រាកប្រចាំឆ្នាំ។

នៅព្រឹកថ្ងៃសុក្រនេះ ការជួញដូរភាគហ៊ុនរបស់ក្រុមហ៊ុនដែកចិន DCIOcv1 បានធ្លាក់ថ្លៃជិត ៧% នៅពេលបើកឲ្យជួញដូរ បន្ទាប់ពីបានធ្លាក់ថ្លៃអស់៨% កាលពីម្សិលមិញ ដោយសារតែមានការបារម្ភទៅនឹងតម្រូវការលើការផ្គត់ផ្គង់នៅលើសាកលលោក ដោយសារតែការផ្គត់ផ្គង់លើសតម្រូវការ។ ក្រៅពីនោះភាគហ៊ុនរបស់ក្រុមហ៊ុនលោហធាតុ ដែក និង ប្រេងជាដើមសុទ្ធតែបានធ្លាក់ថ្លៃទាំងអស់។

នៅក្នុងស្ថានភាពនេះ អ្នកជួញដូរកំពុងតាមដានលើចំណាត់ការថ្មីៗរបស់លោក Donald Trump ទាក់ទងទៅនឹងផែនការសេដ្ឋកិច្ចអាមេរិកនៅក្នុងរយៈពេលចុងក្រោយនេះ។ ក្រៅពីនេះ ការបោះឆ្នោតនៅបារាំងដែលធ្វើឡើងនៅថ្ងៃអាទិត្យនេះ ក៏ជាអ្វីដែលអ្នកជួញដូរយកចិត្តទុកដាក់បំផុតដើម្បីផ្ទៀងផ្ទាត់លើការជួញដូរនៅលើទីផ្សាររូបិយប័ណ្ណ ក្រោយធនាគារកណ្តាលអាមេរិកបានផ្តល់សញ្ញាណមួយដែលថា ការដំឡើង អត្រាការប្រាក់អាចនឹងត្រូវបានធ្វើឡើងនៅខែមិថុនាខាងមុខ៕

ប្រភព៖ Reuters