Wednesday, March 15, 2017

Home Financial News ដុល្លារបិទបញ្ចប់ការឡើងថ្លៃ នៅមុនសេចក្តីប្រកាសរបស់ធនាគារកណ្តាលថ្ងៃនេះ

ដុល្លារបិទបញ្ចប់ការឡើងថ្លៃ នៅមុនសេចក្តីប្រកាសរបស់ធនាគារកណ្តាលថ្ងៃនេះ

ការឡើងថ្លៃប្រាក់ដុល្លារបានបិទបញ្ចប់នៅថ្ងៃនេះនៅលើទីផ្សារ អាស៊ី ខណៈដែលអ្នកវិនិយោគកំពុងរង់ចាំយ៉ាងអន្ទះសាលើសេចក្តីប្រកាសរបស់ ធនាគារកណ្តាលអាមេរិកនូវលទ្ធផលកិច្ចប្រជុំចំនួនពីរថ្ងៃរបស់ ខ្លួននៅថ្ងៃនេះស្តីពីការដំឡើងអត្រាការប្រាក់សម្រាប់ឆ្នាំ ២០១៧។

យោងតាមសន្ទស្សន៍ជួញដូរជាក់ស្តែង និង លទ្ធផលស្ទាបស្ទង់វាយតម្លៃបានបង្ហាញថា ឱកាសដែលធនាគារកណ្តាលអាមេរិកអាចនឹងដំឡើងអត្រាការប្រាក់ជាលើក ដំបូងសម្រាប់ឆ្នាំ ២០១៧ នេះ គឺមានរហូតដល់ ៩០%។

តម្លៃជួញដូរប្រាក់ដុល្លារប្រៀបធៀបទៅនឹងលុយយ៉េន បានធ្លាក់ថ្លៃអស់ ០,១% ត្រូវបានជួញដូរក្នុងតម្លៃ ១១៤,៦៧ យ៉េន ក្រោយឡើងថ្លៃខ្ពស់បំផុតដល់ ១១៥,៥៧ យ៉េនកាលពីសប្តាហ៍មុន ដែលជាតម្លៃឡើងថ្លៃខ្ពស់បំផុតមិនធ្លាប់មានគិតចាប់តាំងពីថ្ងៃទី ១៩ មករាមក។

ក្តីសង្ឃឹមថា ការដំឡើងអត្រាការប្រាក់អាចកើតមានឡើងដោយសារតែ ទិន្នន័យអតិផរណារបស់ខ្លួន និង តម្លៃផលិតកម្មអាមេរិកមានការកើនឡើងហួសការរំពឹងទុក ដែលត្រូវបានចាត់ទុកថា ជាកំណើនដ៏ខ្ពស់បំផុតមួយមិនធ្លាប់មានក្នុងរយៈពេល៥ឆ្នាំ ចុងក្រោយនេះ។

ងាកមកមើលលុយផោនរបស់អង់គ្លេសវិញ បានប្រឈមមុខទៅនឹងការធ្លាក់ថ្លៃជាប់ៗគ្នាក្នុងរយៈពេល៨សប្តាហ៍ ដោយបានស្ថិតនៅក្នុងតម្លៃជួញដូរ ១,២១១០ ដុល្លារ ស្របពេលដែលនីតិវិធីផ្តាច់ខ្លួនរបស់អង់គ្លេសចេញពីសហភាពអឺរ៉ូប កំពុងបង្កភាពស្មុគស្មាញដល់រូបិយប័ណ្ណមួយនេះ។

ងាកមកមើលលុយអឺរ៉ូវិញ មានសញ្ញាណល្អនៅថ្ងៃនេះ ដោយបានឡើងថ្លៃ ០,១% ស្ថិតនៅក្នុងតម្លៃជួញដូរ ១,០៦១៣ ដុល្លារ ប៉ុន្តែនៅតែស្ថិតនៅក្នុងតម្លៃមួយទាបជាងតម្លៃឡើងថ្លៃដល់ទៅ ១,០៧១៤ ដុល្លារកាលពីថ្ងៃច័ន្ទ កន្លងទៅនេះ។

បញ្ហាបោះឆ្នោតនៅហុឡង់ដ៍នៅថ្ងៃនេះ កំពុងធ្វើស្ថានភាពទីផ្សារនៅតំបន់អឺរ៉ុបមានភាពរកាំរកូសបន្តិច ដែលបានដាក់សម្ពាធដល់ធនាគារកណ្តាលរបស់អឺរ៉ុបឲ្យបន្ធូរបន្ថយលើ គោលនយោបាយដំឡើងអត្រាការប្រាក់របស់ខ្លួន៕

ប្រភព៖ cnbc 