ផ្សារភាគហ៊ុនអាស៊ីប្រែប្រួលអ្វីខ្លះក្នុងថ្ងៃនេះ?

ការជួញដូរនៅលើទីផ្សារភាគហ៊ុនអាស៊ីនៅព្រឹកនេះ គឺបានឡើងចុះមិនស្របគ្នា ខណៈដែលអ្នកវិនិយោគកំពុងទន្ទឹមរង់ចាំមើលកិច្ចប្រជុំរបស់ប្រមុខរដ្ឋមន្ត្រីហិរញ្ញវត្ថុកំពូលៗរបស់មហាអំណាចប្រទេស G-20 ដែលនឹងធ្វើឡើងនៅប្រទេសអាល្លឺម៉ង់នៅចុងសប្តាហ៍នេះ។

ផ្សារភាគហ៊ុនដែលធ្លាក់ថ្លៃនៅមុនគេក្នុងថ្ងៃនេះ គឺផ្សារភាគហ៊ុនអូស្ត្រាលី ASX 200 ដែលបានធ្លាក់ថ្លៃអស់ ០,៣៥% ដោយក្នុងនោះគេសង្កេតឃើញថា ភាគហ៊ុនរបស់ក្រុមហ៊ុននានាភាគច្រើនបានធ្លាក់ថ្លៃ។ នៅកូរ៉េខាងត្បូង ផ្សារភាគហ៊ុន Kospi បានធ្លាក់ថ្លៃ ០,៥២% ស្របពេលទិន្នន័យសេដ្ឋកិច្ចបានបង្ហាញថា តម្លៃផលិតប្រចាំខែកុម្ភៈកន្លងទៅបានកើនឡើងខ្លាំងមិនធ្លាប់មានក្នុងរយៈពេល៥ឆ្នាំកន្លងទៅនេះ។

ចំណែកផ្សារភាគហ៊ុនចិនដីគោកវិញ ក៏ឡើងចុះមិនស្របគ្នាដែរនៅព្រឹកនេះ ដោយក្នុងនោះផ្សារភាគហ៊ុន សៀងហៃ បានឡើងថ្លៃ ០,១៣% ខណៈដែលផ្សារភាគហ៊ុន Shenzhen បានធ្លាក់ថ្លៃតិចតួចប៉ុណ្ណោះ។ ចំណែកផ្សារភាគហ៊ុន ហុងកុង Hang Seng បានឡើងថ្លៃ ០,២១%។

ងាកទៅមើលជប៉ុនវិញ ផ្សារភាគហ៊ុនរបស់ខ្លួននៅថ្ងៃនេះមិនបានបើកឲ្យជួញដូរទេដោយសារតែជាថ្ងៃបុណ្យឈប់សម្រាកប្រចាំឆ្នាំ។ កាលពីថ្ងៃសុក្រកន្លងទៅ ផ្សារភាគហ៊ុនជប៉ុន បានធ្លាក់ថ្លៃអស់០,៣៥%។ កាលពីថ្ងៃអាទិត្យម្សិលមិញ នាយករដ្ឋមន្ត្រីជប៉ុន Shinzo Abe បានមានប្រសាសន៍នៅក្នុងប្រទេសអាល្លឺម៉ង់ថា សហភាពអឺរ៉ុប និង ជប៉ុន នឹងជំរុញឲ្យមានកិច្ចព្រមព្រៀងសេដ្ឋកិច្ចដ៏ល្អប្រសើរមួយនៅពេលខាងមុខ។

សម្រាប់ផ្សារភាគហ៊ុនអាមេរិកមិនទាន់បើកដំណើរការឲ្យជួញដូរទេនៅថ្ងៃនេះ៕

ប្រភព៖ cnbc