ថ្ងៃសុក្រចុងសប្តាហ៍នេះប្រាក់ដុល្លារបន្តធ្លាក់ថ្លៃទៀត!

ការជួញដូរប្រាក់ដុល្លារនៅ លើទីផ្សារអាស៊ីនៅព្រឹកនេះ ត្រូវបានគេមើលឃើញថា បានធ្លាក់ថ្លៃ និង ជាការធ្លាក់ថ្លៃជាលើកដំបូងប្រចាំសប្តាហ៍មិនធ្លាប់មានក្នុង រយៈពេល៥សប្តាហ៍កន្លងទៅបើប្រៀបធៀបទៅនឹងរូបិយប័ណ្ណផ្សេងៗទៀត។ ការធ្លាក់ថ្លៃនេះបានកើតមានឡើងបន្ទាប់ពីធនាគារកណ្តាលអាមេរិក បានសម្រេចដំឡើងអត្រាការប្រាក់ក្នុងតម្លៃមួយទាបជាងការរំពឹងទុក របស់អ្នកជួញដូរ។

សន្ទស្សន៍តម្លៃជួញដូរប្រាក់ដុល្លារប្រៀបធៀបទៅនឹងតម្លៃ រូបិយប័ណ្ណទូទៅបានស្ថិតធ្លាក់ថ្លៃ ០,១% ស្ថិតនៅទីតាំងតម្លៃ ១០០,២៥។ ចំនួននេះមិនធ្លាប់មាននោះឡើយគិតចាប់តាំងពីថ្ងៃទី ៩ ខែកុម្ភៈមក ហើយសម្រាប់សប្តាហ៍នេះ វាបានធ្លាក់ថ្លៃអស់ ១%។

បើប្រៀបធៀបទៅនឹងលុយយ៉េនវិញ ប្រាក់ដុល្លារបានធ្លាក់ថ្លៃដែរដោយត្រូវបានជួញដូរមកកាន់តម្លៃ ១១៣,៣៥ យ៉េន និង បានធ្លាក់ថ្លៃ អស់ ១,៣%សម្រាប់សប្តាហ៍នេះ នៅមុនពេលថ្ងៃឈប់សម្រាករបស់ជប៉ុននៅថ្ងៃច័ន្ទសប្តាហ៍ក្រោយនេះ។ កាលពីម្សិលមិញធនាគារកណ្តាលជប៉ុន បានសម្រេចកំណត់រក្សាអត្រាការប្រាក់ឲ្យនៅដដែលក្នុងកម្រិត ០។

នៅអាមេរិកវិញ របាយការណ៍ចុងក្រោយបានបង្ហាញថា សេដ្ឋកិច្ចរបស់ខ្លួនកំពុងស្ថិតនៅក្នុងស្ថានភាពវិជ្ជមានល្អក្នុង នោះ ការសាងសង់លំនៅឋានបានកើនឡើង ៣,០% កាលពីខែមុន និង អត្រាគ្មានការងារធ្វើបានធ្វើបានធ្លាក់ចុះកាលពីសប្តាហ៍មុន។

ផ្ទុយពីប្រាក់ដុល្លារ នៅពេលកំពុងជួញដូរនៅលើទីផ្សារអាស៊ីនេះ ប្រាក់អឺរ៉ូបានឡើងថ្លៃ ០,១% ត្រូវបានជួញដូរក្នុងតម្លៃ ១,០៧៧០ ដុល្លារ ជួយឲ្យវាបានឡើងថ្លៃ ០,៩% សម្រាប់សប្តាហ៍នេះ។ ការបន្តឡើងថ្លៃនេះបានកើតមានឡើងបន្ទាប់ពីលទ្ធផលបោះឆ្នោតនៅ ហុឡង់ដ៍បានបង្ហាញថា នាយករដ្ឋមន្ត្រីបច្ចុប្បន្នបានជាប់ឆ្នោតសាជាថ្មី។

ចំណែកលុយផោនរបស់អង់គ្លេសវិញបានធ្លាក់ថ្លៃទៀតអស់ចំនួន ០,១% ស្ថិតនៅក្នុងតម្លៃ ជួញដូរ ១,២៣៤៩ ដុល្លារក្នុងមួយអោន បន្ទាប់ពីបានហក់ឡើងថ្លៃ២សប្តាហ៍ជាប់ៗគ្នាក្នុងតម្លៃ ១,២៣៧៣ កាលពីយប់មិញ ក្រោយពេលដែលធនាគារកណ្តាលរបស់ខ្លួនបានសម្រេចរក្សាអត្រាការប្រាក់ ឲ្យនៅដដែល៕

ប្រភព៖ cnbc