ប្រាក់ដុល្លារបន្តឡើងថ្លៃ ខណៈដែលតម្លៃមាសកំពុងដាំក្បាលចុះ

ការជួញដូរប្រាក់ដុល្លារកំពុងបង្ហាញសញ្ញាណកាន់តែល្អ ប្រៀបធៀបទៅនឹងលុយយ៉េន និងបានឡើងថ្លៃមួយសប្តាហ៍ពេញ ខណៈដែលមាសកំពុងធ្លាក់ថ្លៃខ្លាំងនៅមុនពេលរបាយការណ៍ការងារអាមេរិក បញ្ចេញឲ្យដឹងនៅថ្ងៃសុក្រចុងសប្តាហ៍នេះ និងមានការរំពឹងទុកជាមុននៃការដំឡើងអត្រាការប្រាក់ពីធនាគារ កណ្តាល។

ការព្យាករណ៍ថា ធនាគារកណ្តាលអាមេរិកនឹងដំឡើងអត្រាការប្រាក់នៅពាក់កណ្តាលខែនេះ បានកើនឡើងដល់ ៩០% ហើយបន្ទាប់ពីក្រុមហ៊ុនរកការងារធ្វើ ADP បញ្ចេញរបាយការណ៍ថា អត្រាមានការងារធ្វើមានកំណើនខ្ពស់ហួសពីការរំពឹងទុក ពោលគឺមានចំនួនប្រមាណ ២៩៨ ០០០ កន្លែងសម្រាប់ខែកុម្ភៈកន្លងទៅ។
សន្ទស្សន៍តម្លៃប្រាក់ដុល្លារប្រៀបធៀបទៅនឹងលុយយ៉េន គឺស្ថិតនៅក្នុងតម្លៃជួញដូរ ១១៥,២៤ យ៉េនដែលជាកំណើនខ្ពស់បំផុតមិនធ្លាប់មានគិតចាប់តាំងពីថ្ងៃ ទី ២៧ មករាមក។ កំណើននេះបានធ្វើឲ្យប្រាក់ដុល្លារឡើងថ្លៃសរុបបានជាង ១% សម្រាប់សប្តាហ៍នេះ។
ចំណែកការជួញដូរលុយអឺរ៉ូវិញ បានឡើងថ្លៃដែរក្នុងតម្លៃ ០,១% ត្រូវបានជួញដូរក្នុងតម្លៃ ១,០៥៩០ ដុល្លារ។ ទោះបីជាបែបនេះក្តី សម្រាប់សប្តាហ៍នេះវានៅតែធ្លាក់ថ្លៃសរុបអស់ ០,៣% បន្ទាប់ពីប្រមុខធនាគារកណ្តាលអឺរ៉ុបគឺលោក Mario Draghi បានបិទប្រជុំរបស់ស្ថាប័ននេះនៅក្នុងអត្រាការប្រាក់ទាបបំផុតមួយ កាលពីម្សិលមិញដើម្បីទុកពេលឲ្យតំបន់អឺរ៉ុបមានសុខភាពសេដ្ឋកិច្ច ល្អប្រសើរវិញ។
ប្រៀបធៀបទៅនឹងលុយយ៉េន លុយអឺរ៉ូបានឡើងថ្លៃ ០,៤% ស្ថិតនៅក្នុងតម្លៃជួញដូរ ១២២,០៣ យ៉េន ជាតម្លៃខ្ពស់បំផុតមិនធ្លាប់គិតចាប់តាំងពីដើមខែកុម្ភៈមក និង បានឡើងថ្លៃសរុប ០,៨% សម្រាប់សប្តាហ៍នេះ។ លទ្ធផលកិច្ចប្រជុំរបស់ធនាគារកណ្តាលអឺរ៉ុបបានដាក់សម្ពាធដល់លុយផោន របស់អង់គ្លេសដែលបានធ្លាក់មកក្នុងតម្លៃ ១,២១៣៤ ដុល្លារ ដែលជាតម្លៃទាបបំផុតមិនធ្លាប់មានគិតចាប់តាំងពីថ្ងៃទី ១៧ មករាមក។ សម្រាប់សប្តាហ៍នេះ វាធ្លាក់ថ្លៃសរុបអស់ជាង ១%។
សន្ទស្សន៍ជួញដូរប្រាក់ដុល្លារប្រៀបធៀបទៅនឹងរូបិយប័ណ្ណសំខាន់ៗ ផ្សេងទៀត បានឡើងថ្លៃ ០,១% ស្ថិតនៅក្នុងតម្លៃជួញដូរ ១០១,៩៤ និងបានឡើងថ្លៃសរុប ០,៤% សម្រាប់សប្តាហ៍នេះ៕
ប្រភព៖ cnbc