ផ្សារភាគហ៊ុនអាស៊ីស្ថិតនៅក្នុងសញ្ញាភ្លើងក្រហមថ្ងៃនេះ

ការជួញដូរនៅលើផ្សារភាគហ៊ុនអាស៊ីនៅថ្ងៃនេះត្រូវបាន គេមើលឃើញថា បានស្ថិតនៅក្នុងសញ្ញាណអវិជ្ជមាន តាមពីក្រោយផ្សារភាគហ៊ុនអាមេរិក ខណៈដែលអ្នកវិនិយោគកំពុងរង់ចាំលទ្ធផលកិច្ចប្រជុំស្តីពីការដំឡើង អត្រាការប្រាក់របស់ធនាគារកណ្តាលអាមេរិក។

ការជួញដូរនៅលើផ្សារភាគហ៊ុនជប៉ុន Nikkei 225 បានធ្លាក់ថ្លៃអស់០,៣% នៅស្របពេលដែលលុយយ៉េនបានឡើងថ្លៃវិញ បើប្រៀបធៀបទៅនឹងលុយដុល្លារអាមេរិក។ ជាទូទៅការជួញដូរផ្សារភាគហ៊ុនរបស់ជប៉ុននឹងធ្លាក់ថ្លៃ ប្រសិនបើតម្លៃរូបិយប័ណ្ណរបស់ខ្លួនឡើងថ្លៃ។

ងាកទៅមើលផ្សារភាគហ៊ុនអូស្ត្រាលី ASX 200 វិញក៏ធ្លាក់ថ្លៃដែរក្នុងតម្លៃ ០,២៩% ខណៈដែលភាគហ៊ុនរបស់ក្រុមហ៊ុនមាសរបស់ខ្លួនបានធ្លាក់ថ្លៃដល់ទៅ ១,៤៦%។ នៅកូរ៉េខាងត្បូង ការជួញដូរមិនមានការប្រែប្រួលខ្លាំងនោះឡើយ ដោយបានងើបចេញពីសម្ពាធធ្លាក់ថ្លៃដ៏ច្រើនប៉ុន្មានថ្ងៃ នេះដោយសារតែស្ថានការណ៍នយោបាយនៅក្នុងប្រទេសនេះមានភាពរង្គោះរង្គើ នៅក្នុងរយៈពេលចុងក្រោយ។

ចំណែកផ្សារភាគហ៊ុនអាមេរិកវិញ បានបិទបញ្ចប់ការជួញដូរក្នុងតម្លៃធ្លាក់ថ្លៃកាលពីយប់មិញ ខណៈដែលភាគហ៊ុនរបស់ក្រុមហ៊ុនបានធ្លាក់ថ្លៃខ្លាំង។ ផ្សារភាគហ៊ុន Dow Jones industrial average បានធ្លាក់ថ្លៃអស់ ០,២១% ផ្សារភាគហ៊ុន S&P 500 បានធ្លាក់ថ្លៃអស់ ០,៣៤% និង ផ្សារភាគហ៊ុន Nasdaq បានធ្លាក់ថ្លៃទាបជាងបន្តិចក្នុងចំនួន ០,៣២%។

នៅសប្តាហ៍នេះ អ្វីដែលជាព្រឹត្តិការណ៍សំខាន់សម្រាប់អ្នកវិនិយោគយកចិត្តទុកដាក់ ជាងគេនោះ គឺការរង់ចាំលទ្ធផលកិច្ចប្រជុំរបស់ធនាគារកណ្តាលអាមេរិក និងការព្រឹត្តិការណ៍បោះឆ្នោតនៅក្នុងប្រទេសហុឡង់ដ៍ក្នុងថ្ងៃនេះ ដែលជះឥទ្ធិពលដ៏ធំធេងដល់ការជួញដូរនៅលើទីផ្សារអន្តរជាតិ៕

ប្រភព៖ cnbc