Friday, March 17, 2017

Home Financial News មាសឆ្មក់ឱកាសឡើងថ្លៃក្នុងសប្តាហ៍ ខណៈដែលប្រាក់ដុល្លារបន្តធ្លាក់ថ្លៃ

មាសឆ្មក់ឱកាសឡើងថ្លៃក្នុងសប្តាហ៍ ខណៈដែលប្រាក់ដុល្លារបន្តធ្លាក់ថ្លៃ

ការជួញដូរមាសនៅថ្ងៃសុក្រនេះ កំពុងស្ថិតនៅក្នុងទិសដៅឡើងថ្លៃទៀត ស្របពេលដែលការជួញដូរប្រាក់ដុល្លារបានធ្លាក់ថ្លៃ បន្ទាប់ពីធនាគារកណ្តាលអាមេរិកសម្រេចដំឡើងអត្រាការប្រាក់ដ៏ខកចិត្ត មួយទាបជាងការរំពឹងទុករបស់អ្នកវិនិយោគ។

ថ្វីត្បិតតែការជួញដូរមាសតាមស្បតក្នុងថ្ងៃនេះបានធ្លាក់ចុះ អស់ ០,១% មកវិញបន្តិចមែន ដោយត្រូវបានជួញដូរក្នុងតម្លៃ ១ ២២៤,៩០ ដុល្លារក្នុងមួយអោន ក៏ហាងឆេងជួញដូររបស់វាប្រចាំសប្តាហ៍នេះ បានឡើងថ្លៃដែរ ពោលគឺបានឡើងថ្លៃក្នុងសប្តាហ៍ដំបូងបន្ទាប់ពីស្ងប់ស្ងាត់ក្នុង រយៈពេល៣សប្តាហ៍កន្លងទៅ។ ចំណែកតម្លៃមាសនៅលើទីផ្សារអាមេរិក បានធ្លាក់ថ្លៃអស់ ០,២% ស្ថិតនៅក្នុងតម្លៃជួញដូរ ១ ២២៤,៦០ ដុល្លារក្នុងមួយអោន។

ក្រុមហ៊ុនមាសលំដាប់ពិភពលោក SPDR Gold Trust បានបង្ហាញថា តម្រូវការមាសបានធ្លាក់ចុះអស់ ០,២៨% ពីចំនួន ៨៣៩,៤៣ តោនមកត្រឹម ៨៣៧,០៦ តោនកាលពីម្សិលមិញ ស្របពេលដែលធនាគារកណ្តាលអាមេរិកប្រកាសដំឡើងអត្រាការប្រាក់ក្នុង ចន្លោះពី ០,៧៥% ទៅ ១%។ ចំនួននេះទាបជាងការរំពឹងទុករបស់អ្នកជួញដូរ ។

ទន្ទឹមនឹងគ្នានេះដែរ ប្រធានាធិបតីអាមេរិកលោក Donald Trump ទើបដាក់ចេញគោលនយោបាយកាត់បន្ថយខ្ទង់ចំណាយរបស់រដ្ឋាភិបាលសហព័ន្ធ ផងដែរដែលជាផ្នែកមួយដើម្បីជួយរក្សាតុល្យការកំណើនសេដ្ឋកិច្ច ដែលរួមមានការកាត់បន្ថយលើជំនួយផ្នែកការទូត និង កម្មវិធីផ្តល់ជំនួយអន្តរជាតិជាច្រើនទៀត៕

ប្រភព៖ cnbc