ស្ថានភាពជួញដូរផ្សារភាគហ៊ុនអាស៊ីប្រែប្រួលអ្វីខ្លះថ្ងៃនេះ?

ការជួញដូរនៅលើផ្សារភាគហ៊ុនអាស៊ីថ្ងៃនេះត្រូវបានគេមើលឃើញថា មានការឡើងចុះមិនស្របគ្នា បន្ទាប់ពីផ្សារភាគហ៊ុន Wall Street របស់អាមេរិកបានធ្លាក់ថ្លៃជុំវិញភាពមិនច្បាស់លាស់ទៅនឹងស្ថានភាពនយោបាយអាមេរិក និង លទ្ធផលកិច្ចប្រជុំរបស់បណ្តាធនាគារកណ្តាលនានានៅទីក្រុង Jackson Hole នៅយប់នេះ។

សន្ទស្សន៍ជួញដូរផ្សារភាគហ៊ុន Nikkei 225 របស់ជប៉ុនបានឡើងថ្លៃ ០,៣៥% ដោយសារតែភាគហ៊ុនរបស់ក្រុមហ៊ុន និង ក្រុមហ៊ុនធនាគារបានឡើងថ្លៃដែរ។ ផ្ទុយទៅវិញ សន្ទស្សន៍ជួញដូរផ្សារភាគហ៊ុនកូរ៉េខាងត្បូង Kospi បានធ្លាក់ថ្លៃអស់ ០,០៣% ខណៈដែលសន្ទស្សន៍ជួញដូរផ្សាភាគហ៊ុន S & P / ASX 200 របស់អូស្ត្រាលីបានធ្លាក់ថ្លៃខ្ពស់ជាងបន្តិចក្នុងចំនួន ០,២៧% ដោយសារតែភាគហ៊ុនរបស់ក្រុមហ៊ុនមកពីវិស័យជាច្រើន ភាគច្រើនបានធ្លាក់ថ្លៃ។

ងាកមកមើលការជួញដូរនៅផ្សារភាគហ៊ុនចិនវិញ សុទ្ធតែស្ថិតនៅក្នុងទិសដៅជួញដូរវិជ្ជមានទាំងអស់។ សន្ទស្សន៍ជួញដូរផ្សារភាគហ៊ុនហុងកុង Hang Seng បានឡើងថ្លៃ ០,២០% ទាបជាងសន្ទស្សន៍ជួញដូរផ្សារភាគហ៊ុនសៀងហៃ ដែលបានឡើងថ្លៃចំនួន ០,៧៧%។ រីឯសន្ទស្សន៍ជួញដូរផ្សារភាគហ៊ុន Shenzhen បានឡើងថ្លៃទាបជាងបន្តិចត្រឹមចំនួន ០,៥០៧% ខណៈដែលផ្សារភាគហ៊ុនឥណ្ឌាផ្អាកការជួញដូរថ្ងៃនេះ ដោយសារតែមានកម្មវិធីបុណ្យឈប់សម្រាកប្រចាំឆ្នាំ។

នៅថ្ងៃសុក្រនេះ អ្នកជួញដូរនៅជុំវិញពិភពលោកកំពុងរង់ចាំសុន្ទរកថារបស់ប្រធានធនាគារកណ្តាលអាមេរិកគឺលោកស្រី Janet Yellen និងប្រធានធនាគារកណ្តាលអឺរ៉ុបលោក Mario Draghi នៅក្នុងកិច្ចប្រជុំប្រចាំឆ្នាំរបស់បណ្តាធនាគារកណ្តាលនានានៅឯទីក្រុង Jackson Hole សហរដ្ឋអាមេរិក ។

បើទោះបីជាមានការចាប់អារម្មណ៍លើសុន្ទរកថារបស់ប្រមុខធនាគារកណ្តាលកំពូលទាំងពីររូបនេះក៏ដោយ ក៏ក្រុមអ្នកជំនាញនិយាយថា ការផ្លាស់ប្ដូរគោលនយោបាយសំខាន់ៗគឺទំនងមិនសូវទទួលបានផ្លែផ្កាច្រើននោះទេ។ នេះគឺដោយសារភាពមិនច្បាស់លាស់នៅក្នុងទីផ្សារសកលលោកទាំងនយោបាយ និងសេដ្ឋកិច្ច ព្រមទាំងការលក់ភាគហ៊ុនថ្មីៗនៅអាមេរិក។

យ៉ាងណាក៏ដោយបើទោះបីជាកិច្ចប្រជុំនេះមិនទាន់ចេញជាលទ្ធផលក៏ដោយ យ៉ាងហោចណាស់វាកំពុងជួយស្តាប្រជាប្រិយភាពប្រាក់ដុល្លារបន្តិចដែរនៅសប្តាហ៍នេះដោយបានឡើងថ្លៃសរុប ០,៣% បើធៀបទៅនឹងលុយយ៉េនរបស់ជប៉ុន។

ចំណែកព័ត៌មានសេដ្ឋកិច្ចជប៉ុនវិញបានបង្ហាញថា ទិន្នន័យទីផ្សារទំនិញប្រើប្រាស់របស់ខ្លួន (CPI) បានមានកំណើន ០,៥% ធៀបទៅនឹងរយៈពេលដូចគ្នានេះកាលពីឆ្នាំមុន នេះបើយោងតាមការចេញផ្សាយរបស់សារព័ត៌មាន Reuters។ នេះចាត់ទុកថា ទីផ្សារទំនិញប្រើប្រាស់របស់ខ្លួន គឺមានកំណើនជាប់ៗគ្នាក្នុងរយៈពេល៧ខែ៕

ប្រភព៖ cnbc