តម្លៃមាសកំពុងឆក់ឱកាសឡើងថ្លៃកាន់តែខ្លាំង

ការជួញដូរមាសនៅលើ ទីផ្សារអាស៊ីព្រឹកនេះត្រូវបានគេមើលឃើញថា កំពុងហក់ឡើងថ្លៃកាន់តែខ្ពស់មិនធ្លាប់មាននៅក្នុងរយៈពេលជាង៩ខែកន្លងទៅ បន្ទាប់ពីភាពតានតឹងនៅឧបទ្វីបកូរ៉េបានកើនកម្តៅឡើងវិញនៅក្រោយពេលមានដំណឹងនៃការបាញ់មីស៊ីលជាថ្មីចេញពីយោធាកូរ៉េខាងជើងហោះឆ្លងកាត់ទឹកដីជប៉ុន។

តម្លៃជួញដូរមាសតាមស្បតនៅព្រឹកនេះបានឡើងថ្លៃ ០,៥% ត្រូវបានជួញដូរក្នុងតម្លៃ ១ ៣១៦,៦៦ ដុល្លារក្នុងមួយអោននៅម៉ោង ៨ព្រឹកនេះដែលជាតម្លៃឡើងថ្លៃខ្ពស់បំផុតមួយមិនធ្លាប់មាននោះឡើយគិតចាប់តាំងពីខែវិច្ឆិកាឆ្នាំ ២០១៦ មក។ ចំណែកទីផ្សារមាសរបស់អាមេរិកវិញ បានឡើងថ្លៃ ០,៥% ដែរត្រូវបានជួញដូរក្នុងតម្លៃ ១ ៣២២,២០ ដុល្លារក្នុងមួយអោន។

កាលពីយប់មិញ ផ្សារភាគហ៊ុនអាមេរិកមានសម្ពាធច្រើន ខណៈដែលផ្សារភាគហ៊ុនអាស៊ីក៏កំពុងត្រដាបត្រដួសខ្លាំងដែរនៅព្រឹកនេះ។ រីឯប្រាក់យ៉េនកំពុងឆ្មក់ឱកាសឡើងថ្លៃជាមួយនឹងប្រាក់ហ្រ្វង់ស្វីសធៀបទៅនឹងប្រាក់ដុល្លារដែលកំពុងរងសម្ពាធខ្លាំងបន្ទាប់ពីលេចឮព័ត៌មានបាញ់មីស៊ីលជាថ្មីរបស់កូរ៉េខាងជើងហោះឆ្លងកាត់ភាគខាងជើងទឹកដីជប៉ុននៅព្រឹកថ្ងៃអង្គារនេះ។

កូរ៉េខាងត្បូង និងជប៉ុនបាននិយាយថា មីស៊ីលដែលកូរ៉េខាងជើងបានចាប់ផ្តើមបាញ់ចេញពីតាំងរបស់ខ្លួននៅព្រឹកថ្ងៃអង្គារនេះ បានហោះធ្លាក់ចូលទៅក្នុងដែនទឹកមហាសមុទ្រប៉ាស៊ីហ្វិកនៅភាគខាងកើតដែនកោះហុកកៃដូ បន្ទាប់ពីបានហោះរំលងភាគខាងជើងដែនដីជប៉ុនរួចមក។ ប្រទេសទាំងពីរបានចាត់ទុកសកម្មភាពរបស់ទីក្រុងព្យុងយ៉ាងនៅពេលនេះថា គឺជាចេតនាបង្កឲ្យមានភាពតានតឹង និង ការប្រឈមមុខដាក់គ្នានៅក្នុងតំបន់។

ងាកទៅមើលស្ថានភាពនយោបាយអាមេរិកវិញ លោកប្រធានាធិបតី Donald Trump បានមានប្រសាសន៍កាលពីថ្ងៃចន្ទម្សិលមិញថា ការបិទទ្វាររបស់រដ្ឋាភិបាលនឹងមិនចាំបាច់ធ្វើឡើងដោយសារតែការទាមទាររបស់លោកដែលបានស្នើឲ្យដាក់កញ្ចប់ថវិកាបន្ថែមសម្រាប់សាងសង់ជញ្ជាំងនៅតាមបណ្ដោយព្រំដែនជាមួយនឹងម៉ិកស៊ិកនោះទេ។

រីឯស្ថានភាពសេដ្ឋកិច្ចវិញ ឱនភាពពាណិជ្ជកម្មរបស់អាមេរិកត្រូវបានគេបញ្ចេញរបាយការណ៍ថា បានកើនឡើងនៅក្នុងខែកក្កដាកន្លងទៅដោយសារការនាំចេញបានធ្លាក់ចុះ។ នេះបានបង្ហាញថា ពាណិជ្ជកម្មរបស់ខ្លួននឹងរួមចំណែកតិចតួចប៉ុណ្ណោះដល់កំណើនសេដ្ឋកិច្ចនៅត្រីមាសទី៣ខាងមុខ។

នៅតំបន់អឺរ៉ុបវិញ ប្រធានទទួលបន្ទុកលើការចរចារបស់សហភាពអឺរ៉ុបលោក Michel Barnier បានមានប្រសាសន៍កាលពីថ្ងៃចន្ទម្សិលមិញថា លោកមានការព្រួយបារម្ភទៅនឹងដំណើរការដ៏យឺតយ៉ាវនៃកិច្ចចរចា ដកខ្លួនរបស់អង់គ្លេស (Brexit) ខណៈសមភាគីរបស់ប្រទេសនេះគឺលោក David Davis បានអំពាវនាវឱ្យមានភាពបត់បែន និងក្តីស្រមៃរួមគ្នាមួយសម្រាប់កិច្ចចរចានេះ៕

ប្រភព៖ cnbc