ផ្សារភាគហ៊ុនអាស៊ីភាគច្រើនមានសម្ពាធ!

ការជួញដូរនៅលើផ្សារភាគហ៊ុនអាស៊ីភាគច្រើនកំពុងស្ថិតនៅក្នុងស្ថានភាពជួញដូរទិសដៅអវិជ្ជមាននៅព្រឹកថ្ងៃចន្ទនេះបន្ទាប់ពីប្រាក់អឺរ៉ូកំពុងជួញដូរឡើងថ្លៃក្រោយកិច្ចប្រជុំរបស់បណ្តាប្រមុខធនាគារកណ្តាលនានានៅ Jackson Hole មិនបានលទ្ធផលផ្លែផ្កាច្រើនជាក្តីសង្ឃឹមដល់អ្នកជួញដូរ។

សន្ទស្សន៍ជួញដូរផ្សារភាគហ៊ុន Nikkei 225 របស់ជប៉ុនបានធ្លាក់ថ្លៃអស់ ០,១៣% ខណៈដែលសន្ទស្សន៍ជួញដូរផ្សារភាគហ៊ុន Kospi របស់កូរ៉េខាងត្បូងបានធ្លាក់ថ្លៃអស់ ០,៤១% ខណៈដែលភាគហ៊ុនរបស់ក្រុមហ៊ុនបច្ចេកវិទ្យាកំពុងថ្លឹងថ្លែងដល់ផ្សារភាគហ៊ុនរបស់ខ្លួន។

មិនខុសពីផ្សារភាគហ៊ុនជប៉ុន និងកូរ៉េខាងត្បូង សន្ទស្សន៍ជួញដូរផ្សារភាគហ៊ុនអូស្ត្រាលី S & P / ASX 200 កំពុងជួញដូរដុនដាបខ្លាំងដែរជាមួយនឹងការធ្លាក់ថ្លៃខ្លាំងរបស់ភាគហ៊ុនក្រុមហ៊ុនហិរញ្ញវត្ថុដែលបានធ្លាក់ថ្លៃដល់ទៅ ១,០១%។ ក៏ប៉ុន្តែ សន្ទស្សន៍ផ្សារភាគហ៊ុនចិនបែរជាឡើងថ្លៃដែលក្នុងនោះសន្ទស្សន៍ផ្សារភាគហ៊ុនហុងកុង Hang Seng ឡើងថ្លៃបាន ០,៥៦% សន្ទស្សន៍ផ្សារភាគហ៊ុនសៀងហៃឡើងថ្លៃបាន ០,៧២% និង សន្ទស្សន៍ផ្សារភាគហ៊ុន Shenzhen ឡើងថ្លៃបាន ០,៨២៣%។

ខណៈដែលលោកស្រី Janet Yellen ប្រធានធនាគារកណ្តាលអាមេរិកមិនបានផ្តល់គន្លឹះណាមួយស្តីពីគោលនយោបាយរូបិយវត្ថុនៅក្នុងសុន្ទរកថារបស់លោកស្រីនៅឯកិច្ចប្រជុំធនាគារកណ្តាលទីក្រុង Jackson Hole លោកស្រីបានលើកឡើងថា កំណែទម្រង់ដែលបានអនុវត្តនៅក្នុងអំឡុងពេលវិបត្តិហិរញ្ញវត្ថុកើតមានឡើងបានជួយជ្រោមជ្រែងរួចហើយដល់សុវត្ថិភាពប្រព័ន្ធហិរញ្ញវត្ថុ។

មិនខុសពីការលើកឡើងរបស់លោកស្រី Yellen ប្រធានធនាគារកណ្តាលអ៊ឺរ៉ុបលោកMario Draghi ឯណេះវិញក៏បានបង្ហាញពីជំហរពីអនាគតគោលនយោបាយរូបិយវត្ថុក្នុងតំបន់ចាយប្រាក់អឺរ៉ូនៅក្នុងសុន្ទរកថារបស់លោកកាលពីថ្ងៃសុក្រកន្លងទៅ។ ក៏ប៉ុន្តែលោក មិនបានអត្ថាធិប្បាយលម្អិតណាមួយនោះឡើយជុំវិញស្ថានភាពទីផ្សារប្រាក់អឺរ៉ូនៅពេលបច្ចុប្បន្ននេះ។

ទីផ្សារជួញដូរក៏កំពុងផ្តោតផងដែរទៅផលប៉ះពាល់ពីព្យុះសង្ឃរា Harvey មកលើឆ្នេរសមុទ្រភាគខាងត្បូងអាមេរិកនៅចុងសប្តាហ៍នេះដែលនាំ មកនូវភ្លៀងធ្លាក់បង្កជាទឹកជំនន់ បំផ្លិចបំផ្លាញលំនៅឋានពលរដ្ឋ និង ប្រព័ន្ធហេដ្ឋារចនាសម្ព័ន្ធជាច្រើនទៀតត្រូវទទួលរងការខូចខាតយ៉ាងធ្ងន់ធ្ងរ។ ទឹកប្រាក់ទំហំខូចខាតមិនទាន់ត្រូវបានបញ្ចេញឲ្យដឹងនៅឡើយទេ ក៏ប៉ុន្តែគេបានព្យាករណ៍ទុកជាមុនថា ផលប៉ះពាល់នៃព្យុះនេះនឹងអូសបន្លាយរយៈពេលវែងសម្រាប់សេដ្ឋកិច្ចរដ្ឋ Texas ទាំងមូល និងសេដ្ឋកិច្ចអាមេរិក៕

ប្រភព៖ cnbc