កម្តៅនយោបាយអន្តរជាតិកំពុងរុញច្រានឲ្យមាសឡើងថ្លៃកាន់តែខ្ពស់

ការជួញដូរមាសនៅថ្ងៃនេះបានស្ទុះឡើងថ្លៃកាន់តែខ្ពស់ បន្ទាប់ពីបានឡើងថ្លៃដល់ទៅ ២% កាលពីម្សិលមិញ ស្របពេលដែលអ្នកវិនិយោគកំពុងស្វែងរកទីតាំងសុវត្ថិភាពសម្រាប់ជួញដូរនៅចំពេលកម្តៅនយោបាយនៃការទំនាក់ទំនងរវាងអាមេរិក រុស្ស៊ី និង កូរ៉េខាងជើងកើនកម្តៅជាថ្មី។

ការជួញដូរមាសតាមស្បតបានឡើងថ្លៃ ០,១% ស្ថិតនៅក្នុងតម្លៃជួញដូរ ១ ២៧៥,២១ ដុល្លារក្នុងមួយអោន បន្ទាប់ពីបានឡើងថ្លៃដល់ទៅ ១ ២៧៦,២៨ ដុល្លារក្នុងមួយអោនកាលពីម្សិលមិញ ដែលជាតម្លៃ ខ្ពស់បំផុតមិនធ្លាប់មានគិតចាប់ទាំងពីថ្ងៃទី ១០ វិច្ឆិកាឆ្នាំ ២០១៦ មក។ ចំណែកឯហាងឆេងមាសនៅអាមេរិកបានឡើងថ្លៃ ០,៣% ស្ថិតនៅក្នុងតម្លៃជួញដូរ ១ ២៧៧,៦០ ដុល្លារក្នុងមួយអោន។

នៅក្នុងខណៈនេះ កម្តៅនយោបាយនៅតំបន់ឧបទ្វីបកូរ៉េកំពុងឡើងកម្តៅកាន់តែខ្លាំង បន្ទាប់ពីអាមេរិកវាយប្រហារដោយមីស៊ីលជាច្រើនគ្រាប់ចូលទៅកាន់មូលដ្ឋានទ័ពជើងអាកាសរបស់ស៊ីរីកាលពីសប្តាហ៍មុន។ បញ្ហានេះ បានធ្វើឲ្យអ្នកវិនិយោគមានការព្រួយបារម្ភយ៉ាងខ្លាំង ហើយកំពុងស្វែងរកទីតាំងសុវត្ថិភាពល្អសម្រាប់ការជួញដូរនៅលើទីផ្សារអន្តរជាតិ។

នៅកូរ៉េខាងជើង សារព័ត៌មានរបស់រដ្ឋមួយបានព្រមានកាលពីថ្ងៃអង្គារម្សិលមិញពីការវាយប្រហារដោយមីស៊ីលប្រឆាំងតបតទៅនឹងភាពគឃ្លើនអាមេរិកដែលបានបញ្ជូននាវាជាច្រើនគ្រឿងមកកាន់ទឹកដីកូរ៉េខាងត្បូង នូវអ្វីដែលខ្លួនបានព័ណ៌នាថា ជាការត្រៀមខ្លួនទុកជាមុនដើម្បីធ្វើសង្គ្រាម៕

ប្រភព៖ cnbc