ផ្សារភាគហ៊ុនអាស៊ីឡើងថ្លៃនៅព្រឹកនេះ

ការជួញដូរផ្សារភាគហ៊ុននៅលើទីផ្សារអាស៊ីនៅព្រឹកនេះ ត្រូវបានគេមើលឃើញថា មានសញ្ញាណវិជ្ជមានភាគ ច្រើនក្រោយផ្សារភាគហ៊ុនអាមេរិកបានបិទបញ្ចប់ទៅក្នុងលទ្ធផលឡើងថ្លៃ ក្រោយមានទិន្នន័យថា ប្រាក់ចំណូលជាតិអាមេរិកមានការកើនឡើង និងការរំពឹងទុកលើគោលនយោបាយពន្ធដាររបស់ប្រធានាធិបតីអាមេរិក។

ផ្សារភាគហ៊ុនដែលឡើងថ្លៃ រួមមាន ផ្សារភាគហ៊ុនជប៉ុន Nikkei 225 បានឡើងថ្លៃ ០,៦២% ផ្សារភាគហ៊ុនកូរ៉េខាងត្បូង Kospi បានឡើងថ្លៃ ០,៣៣% ខណៈដែលផ្សារភាគហ៊ុនអូស្ត្រាលី ASX 200 បានឡើងថ្លៃរហូតដល់ ០,៧២%។

ងាកទៅមើលផ្សារភាគហ៊ុនហុងកុង Hang Seng វិញ ក៏ឡើងថ្លៃដែរក្នុងចំនួន ០,៥៣%។ ចំណែកឯ ផ្សារភាគហ៊ុនចិនដីគោក មិនមានការប្រែប្រួលខ្លាំងនោះឡើយ ដោយក្នុងនោះផ្សារភាគហ៊ុន សៀងហៃ បានឡើងថ្លៃត្រឹមតែ ០,០២% ប៉ុណ្ណោះ ខណៈដែលផ្សារភាគហ៊ុន Shenzhen បានឡើងថ្លៃខ្ពស់ជាងបន្តិចត្រឹមតែ ០,០៦២%។

កាលពីយប់មិញ ផ្សារភាគហ៊ុនអាមេរិកបានបិទបញ្ចប់ទៅក្នុងតម្លៃវិជ្ជមាន ក្រោយមានរបាយការណ៍ល្អពីប្រាក់ចំណូលជាតិរបស់ខ្លួន។ ក្នុងនោះផ្សារភាគហ៊ុន Nasdaq បានឡើងថ្លៃហួស ៦ ០០០ ចំណុចជាលើកដំបូង ខណៈដែលផ្សារភាគហ៊ុន Dow Jones បានឡើងថ្លៃដល់ទៅ ១,១២%៕

ប្រភព៖ cnbc