ទីផ្សារប្រេងឆៅនៅថ្ងៃនេះ ធ្លាក់ថ្លៃវិញ

ការជួញដូរប្រេងឆៅនៅលើទីផ្សារអន្តរជាតិមិនមានសញ្ញាណល្អនោះឡើយក្នុងថ្ងៃនេះ ស្របពេលដែលអ្នកជួញដូរមានទិន្នន័យថា ការផលិតប្រេងមានការកើនឡើងខ្ពស់ហួសពីតម្រូវការ។

ទីផ្សារជួញដូរប្រេងឆៅរបស់អាមេរិក (WTI) ត្រូវបានជួញដូរត្រឹមតែ ៤៩,៣៤ ដុល្លារប៉ុណ្ណោះក្នុងមួយបារ៉ែល ពោលគឺបានធ្លាក់ថ្លៃអស់ ២៨ សេន ឬ ធ្លាក់ថ្លៃអស់ ០,៥៦% នៅពេលបិទការជួញដូរចុងក្រោយ។ គិតត្រឹមខែ មេសានេះ ទីផ្សារប្រេងឆៅរបស់អាមេរិកបានធ្លាក់ថ្លៃអស់ ៨,៥%។

ចំណែកឯការជួញដូរប្រេងឆៅនៅលើទីផ្សារអន្តរជាតិវិញ បានធ្លាក់ថ្លៃអស់ ២៤ សេន ឬ ស្មើនឹង ០,៤៦% ត្រូវបានជួញដូរក្នុងតម្លៃ ៥១,៥៨ ដុល្លារក្នុងមួយបារ៉ែល។ សរុបនៅក្នុងខែមេសានេះ វាបានធ្លាក់ថ្លៃអស់ ៩% បើធៀបទៅនឹងតម្លៃឡើងថ្លៃខ្ពស់បំផុតរបស់វាប្រចាំខែនេះ។

អ្នក ជួញដូរជុំវិញសាកលលោកបាននិយាយថា ការធ្លាក់ថ្លៃនៃតម្លៃប្រេងនេះគឺដោយសារការផ្គត់ផ្គង់ប្រេងនៅតែមានចំនួនច្រើនហួសពីតម្រូវការ បើទោះបីជាអង្គការ OPEC ខិតខំកាត់បន្ថយការផលិតប្រេងរបស់ខ្លួននៅពេលកន្លងមកក៏ដោយ។

ស្របពេលដែលអាមេរិករាយការណ៍ថា ការស្តុកទុកប្រេងរបស់ខ្លួនបានធ្លាក់ចុះកាលពីម្សិលមិញក៏ដោយ ក៏ប៉ុន្តែការចម្រាញ់ប្រេងសាំងរបស់ខ្លួននៅតែមានចំនួនច្រើនលើសលប់ហួសពីតម្រូវការដដែល។ គេជឿជាក់ផងដែរថា បើសិនជាអង្គការ OPEC នៅបន្តអនុវត្តិតាម ផែនការរបស់ខ្លួន នោះតម្លៃប្រេងអាចថែរក្សាស្ថិរភាពស្ថិតនៅក្នុងតម្លៃបច្ចុប្បន្ន៕

ប្រភព៖ cnbc