ដុល្លារបានបន្តធ្លាក់ថ្លៃជាថ្មីទៀត

ការជួញដូរប្រាក់ដុល្លារធៀបទៅនឹងលុយយ៉េននៅថ្ងៃអង្គារនេះវាបានធ្លាក់ថ្លៃជាថ្មីទៀត ស្របពេលដែលការជួញដូរមាសបានហក់ឡើងវិញ ស្របពេលដែលស្ថានការណ៍នយោបាយអន្តរជាតិកំពុងឡើងកម្តៅ។

កាលពីយប់មិញ ការជួញដូរប្រាក់ដុល្លារបានបន្តធ្លាក់ថ្លៃ និង បានធ្លាក់ថ្លៃអស់ ០,១៥% ស្ថិតនៅក្នុងតម្លៃ ជួញដូរ ១១០,៦៨៥ យ៉េនក្នុងមួយដុល្លារ ដែលជាតម្លៃធ្លាក់ថ្លៃប្រចាំសប្តាហ៍ទាបបំផុតមិនធ្លាប់មាន។

ងាកទៅមើលប្រាក់អឺរ៉ូវិញ មិនមានការប្រែប្រួលខ្លាំងនោះឡើយ ពោលគឺវាត្រូវបានជួញដូរក្នុងតម្លៃ ១,០៦៦៦ ដុល្លារ បន្ទាប់ពីបានឡើងថ្លៃបានត្រឹមតែ ០,២% កាលពីយប់មិញ បើធៀបទៅនឹងប្រាក់ដុល្លារ។ ការធ្លាក់ថ្លៃនេះដោយសារតែទិន្នផលមូលបត្របំណុលរបស់អាល្លឺម៉ង់មានការធ្លាក់ចុះ ដោយសារភាពរង្គោះរង្គើក្រោយព្រឹត្តិការណ៍បំផ្ទុះគ្រាប់បែកនៅរុស្ស៊ី។

នៅល្ងាចនេះ អ្វីដែលអ្នកជួញដូរត្រូវតាមដាននោះគឺការរង់ចាំ មើលសេចក្តីសម្រេចរបស់ធនាគារកណ្តាលអូស្ត្រាលីលើគោលនយោបាយហិរញ្ញវត្ថុរបស់ខ្លួន។ អ្នកជួញដូរបានព្យាករណ៍ថា ស្ថាប័ននេះនឹងរក្សាអត្រាការប្រាក់នៅក្នុងកម្រិតទាបមួយត្រឹម ១,៥% ដែលត្រូវពឹងផ្អែកលើសុខភាពសេដ្ឋកិច្ចរបស់ខ្លួន។

ងាកទៅមើលការជួញដូរប្រាក់ដុល្លារអូស្ត្រាលីវិញ ក៏មិនមានការប្រែប្រួលខ្លាំងនោះដែរ ពោលគឺវាត្រូវបានជួញដូរក្នុងតម្លៃ ០,៧៦០៥ ដុល្លារ។ ចំនួននេះបានបង្ហាញថា វាបានធ្លាក់ចុះទាបជាងតម្លៃខ្ពស់ប្រចាំខែមួយកាលពី២សប្តាហ៍កន្លងទៅដែលធ្លាប់ត្រូវបានជួញដូររហូតដល់ ០,៧៧៥០ ដុល្លារ។

ចំណែកលុយផោនរបស់អង់គ្លេសមានការប្រែប្រួលតិចតួចដែរដែលត្រូវបានជួញដូរក្នុងតម្លៃ ១ ២៤៨៩ ដុល្លារបន្ទាប់ពីបានធ្លាក់ថ្លៃអស់ ០,៧% កាលពីយប់មិញ បន្ទាប់ពីទិន្នន័យសេដ្ឋកិច្ចបានបង្ហាញថា ផលិតកម្មរបស់ខ្លួនបានធ្លាក់ចុះកាលពីខែមុន។ នេះបង្ហាញថា សញ្ញាណសុខភាពសេដ្ឋកិច្ចរបស់ខ្លួនមិនល្អនោះឡើយ៕

ប្រភព៖ cnbc