ប្រាក់ដុល្លារនៅតែងើបទៅមុខមិនរួច!

ការជួញដូរប្រាក់ដុល្លារគិតមកត្រឹមថ្ងៃពុធនេះ ត្រូវបានគេមើលឃើញថា បានស្ថិតនៅក្នុងតម្លៃធ្លាក់ថ្លៃអស់រយៈពេល៣សប្តាហ៍មកនេះ ក្រោយពេលនាយករដ្ឋមន្ត្រីអង់គ្លេសលោកស្រី Theresa May អំពាវនាវឲ្យមានការបោះឆ្នោតជាសាកលមួយនៅមុនពេលការចរចាផ្តាច់ខ្លួនចេញពីសហភាពអឺរ៉ុប។

សន្ទស្សន៍តម្លៃប្រាក់ដុល្លារធៀបទៅនឹងរូបិយប័ណ្ណសំខាន់ៗចំនួន៦ផ្សេងទៀត បានឡើងថ្លៃត្រឹមតែ ០,១% ប៉ុណ្ណោះ ស្ថិតនៅក្នុងទីតាំងតម្លៃ ៩៩,៥៤៨ ងើបចេញពីតម្លៃ ៩៩,៤៦៥ កាលពីយប់មិញ ដែលជាតម្លៃទាបបំផុតមិនធ្លាប់មានគិតចាប់តាំងពីថ្ងៃ ទី ២៨ មិនាមក។

ងាកទៅមើលលុយផោនរបស់អង់គ្លេសវិញ បានឡើងថ្លៃបន្តិច បន្ទាប់ពីបានឡើងថ្លៃខ្ពស់ដល់ ១,២៩០៨ ដុល្លារកាលពីម្សិលមិញ ដែលជាតម្លៃខ្ពស់បំផុតមួយមិនធ្លាប់មានគិតចាប់តាំងពីដើមខែតុលាមក។

យ៉ាងណាមិញ បញ្ហាភូមិសាស្ត្រនយោបាយអន្តរជាតិដែលកំពុងឡើងកម្តៅនៅតំបន់ឧបទ្វីបកូរ៉េ គឺជាបញ្ហាដ៏ធំមួយអាចធ្វើឲ្យការជួញដូររូបិយប័ណ្ណទាំងប្រាក់ដុល្លារ និង រូបិយប័ណ្ណសំខាន់ៗផ្សេងទៀតធ្លាក់ថ្លៃ។ បញ្ហានេះ កំពុងធ្វើឲ្យអ្នកជួញដូរមានការភ័យខ្លាច ហើយកំពុងស្វែងរកទីតាំងសុវត្ថិភាពសម្រាប់ការជួញដូរ។

បើធៀបទៅនឹងលុយយ៉េន ប្រាក់ដុល្លារបានឡើងថ្លៃ ០,១% ស្ថិតនៅក្នុងតម្លៃជួញដូរ ១០៨,៥៧ យ៉េនក្នុងមួយដុល្លារ ខណៈដែលប្រាក់អឺរ៉ូហាក់មិនមានការប្រែប្រួលទេ ពោលគឺត្រូវបានជួញដូរក្នុងតម្លៃ ១,០៧៣២ ដុល្លារ៕

ប្រភព៖ cnbc