Wednesday, April 19, 2017

Home Financial News មាសធ្លាក់ថ្លៃបន្តិចវិញក្នុងថ្ងៃនេះ ខណៈស្ថានការណ៍នយោបាយពិភពលោកកំពុងតានតឹង

មាសធ្លាក់ថ្លៃបន្តិចវិញក្នុងថ្ងៃនេះ ខណៈស្ថានការណ៍នយោបាយពិភពលោកកំពុងតានតឹង

ការជួញដូរមាសនៅថ្ងៃពុធនេះត្រូវបានគេមើលឃើញថា បានធ្លាក់ថ្លៃបន្តិចវិញ ខណៈដែលប្រាក់ដុល្លារក៏មិនទាន់ងើបមុខរួចដែរជុំវិញភាពតានតឹងនយោបាយនៅក្នុងតំបន់ឧបទ្វីបកូរ៉េ និង ការបារម្ភទៅនឹងលទ្ធផលមុនការបោះឆ្នោតជ្រើសរើសប្រធានាធិបតីថ្មីរបស់បារាំង។

តម្លៃមាសបានធ្លាក់ថ្លៃអស់ ៩០ សេន ត្រូវបានជួញដូរក្នុងតម្លៃ ១ ២៨៨,៣៩ ដុល្លារក្នុងមួយអោន ក្រោយឡើងថ្លៃដល់តម្លៃមួយខ្ពស់បំផុត ១ ២៩៥,៤២ ដុល្លារក្នុងមួយអោនកាលពីថ្ងៃច័ន្ទកន្លងទៅ មុននឹងធ្លាក់ថ្លៃវិញ។ ចំណែកការជួញដូរមាសនៅលើ ទីផ្សារអាមេរិក បានធ្លាក់ថ្លៃអស់ ០,៣% ស្ថិតនៅក្នុងតម្លៃជួញដូរ ១ ២៩០,១០ ដុល្លារក្នុងមួយ អោន។

ស្ថានការណ៍នយោបាយតានតឹងនៅក្នុងឧបទ្វីបកូរ៉េកំពុងធ្វើឲ្យពិភពលោកមានការចាប់អារម្មណ៍យ៉ាងខ្លាំង ដោយសារតែរដ្ឋាភិបាលកុម្មុយនិស្តមួយនេះបានគំរាមវាយប្រហារដោយអាវុធនុយក្លេអ៊ែរ ប្រសិនបើអាមេរិកហ៊ានវាយប្រហារខ្លួនមែននោះ។

ចំណែកស្ថានភាពមុនពេលបោះឆ្នោតនៅបារាំងដែលនឹងធ្វើឡើងនៅថ្ងៃអាទិត្យចុងសប្តាហ៍នេះ ក៏កំពុងក្លាយជាព្រឹត្តិការណ៍ដ៏សំខាន់មួយ សម្រាប់អ្នកជួញដូរត្រូវតាមដានយ៉ាងយកចិត្តទុកដាក់ ខណៈដែលតំបន់នេះកំពុងផុយស្រួយស្រាប់រឿងអង់គ្លេសផ្តាច់ខ្លួនចេញពីសហភាពអឺរ៉ុប៕

ប្រភព៖ cnbc