ប្រាក់ដុល្លារធ្លាក់ថ្លៃពេលបើកជួញដូរនៅលើទីផ្សារអាស៊ីព្រឹកនេះ!

ការជួញដូរប្រាក់ដុល្លារនៅលើទីផ្សារអាស៊ីនៅព្រឹកនេះ មិនមានសញ្ញាណល្អនោះឡើយ ខណៈដែលអ្នកវិនិយោគកំពុងមានការបារម្ភទៅនឹងការកើនឡើងនៃកម្តៅនយោបាយនៅក្នុងតំបន់ឧបទ្វីបកូរ៉េ ធ្វើឲ្យប៉ះពាល់ដល់ការដំឡើងអត្រាការប្រាក់របស់អាមេរិក។

សន្ទស្សន៍តម្លៃជួញដូរនៃប្រាក់ដុល្លារធៀបទៅនឹងរូបិយប័ណ្ណសំខាន់ៗចំនួន៦ផ្សេងទៀត បានធ្លាក់ចុះអស់ ០,១% ស្ថិតនៅក្នុងតម្លៃ ១០១,៩៥០។ បើធៀបទៅនឹងលុយយ៉េនវិញ ប្រាក់ដុល្លារបានធ្លាក់ថ្លៃអស់ ០,២% ស្ថិតនៅក្នុងតម្លៃជួញដូរ ១១០,៦៨ យ៉េនក្នុងមួយដុល្លារ ពីតម្លៃ ១១១,៥៧ យ៉េនក្នុងមួយដុល្លារកាលពីយប់មិញ។

កាលពីម្សិលមិញ ចិន និងកូរ៉េខាងត្បូង បានព្រមព្រៀងថា នឹងដាក់ទណ្ឌកម្មដល់កូរ៉េខាងជើង ប្រសិនបើរដ្ឋាភិបាលទីក្រុងព្យុងយ៉ាងនៅតែព្យាយាមធ្វើតេស្តសាកល្បងបាញ់មីស៊ីលបំពាក់ក្បាលនុយក្លេអ៊ែររបស់ខ្លួនបន្តទៀត។

ងាកទៅមើលព័ត៌មាននានាចេញពីធនាគារកណ្តាលអាមេរិកវិញ កាលពីម្សិលមិញលោកស្រី Chair Janet Yellen បានលើកឡើងថា ការដំឡើងអត្រាការប្រាក់អាចនឹងធ្វើឡើងនៅពេលដែលសេដ្ឋកិច្ចនិង អត្រាការងារបច្ចុប្បន្នមានសញ្ញាណល្អបន្តទៀត៕

ប្រភព៖ cnbc