ទីផ្សារប្រេងឆៅធ្លាក់ថ្លៃនៅក្នុងទីផ្សារអាស៊ី

ការជួញដូរប្រេងឆៅនៅលើទីផ្សារអាស៊ីព្រឹកថ្ងៃអង្គារនេះបានធ្លាក់ថ្លៃវិញ ដោយសារតែមានដំណឹងថា ការផលិតប្រេងនៅលីប៊ីបានកើនឡើងវិញ ទន្ទឹមនឹងការបូមប្រេងនៅអាមេរិកមានការកើនឡើងដែរ ដែលនាំឲ្យមានការរំពឹងទុកថា ការផ្គត់ផ្គង់ប្រេងបានកើនឡើងលើសតម្រូវការ។

ការជួញដូរប្រេងនៅលើទីផ្សារអន្តរជាតិបានធ្លាក់ថ្លៃអស់ ៣ សេន ស្ថិតនៅក្នុងតម្លៃជួញដូរ ៥៣,០៩ ដុល្លារក្នុងមួយបារ៉ែល បើធៀបទៅនឹងការជួញដូរពេលម្សិលមិញ។ ចំណែកតម្លៃប្រេងនៅលើទីផ្សារអាមេរិកបានធ្លាក់ថ្លៃអស់ ១ សេន ស្ថិតនៅក្នុងតម្លៃជួញដូរ ៥០,២៣ ដុល្លារក្នុងមួយបារ៉ែល។

បើយោងតាមរបាយការណ៍របស់ក្រុមហ៊ុនប្រេងលីប៊ី (NOC) បានឲ្យដឹងថា ការផលិតប្រេងនៅលីប៊ីបានកើនឡើងក្នុងសប្តាហ៍នេះ។ ការកើនឡើងនេះបានកើតមានឡើងស្របពេលដែលទិន្នន័យបូមប្រេងនៅអាមេរិកត្រូវបានគេរាយការណ៍មកដែរថា បានកើនឡើងដែរ។

ក្រៅពីប្រទេសទាំងពីរនេះ អ៊ីរ៉ង់ឯណោះវិញ ក៏ត្រូវបានគេរាយការណ៍មកដែរថា ខ្លួនបាននាំចេញប្រេងឆៅច្រើនបំបែកកំណត់ត្រាផងដែរដែលមានរហូតដល់ ៣,០៥ លានបារ៉ែលក្នុងមួយថ្ងៃគិតត្រឹមថ្ងៃទី ២០ មិនាកន្លងទៅ៕

ប្រភព៖ cnbc