Monday, April 24, 2017

Home Financial News ប្រាក់អឺរ៉ូកំពុងឡើងថ្លៃភ្លាម ក្រោយបារាំងចេញលទ្ធផលបោះឆ្នោតជ្រើសរើសប្រធានាធិបតីថ្មី

ប្រាក់អឺរ៉ូកំពុងឡើងថ្លៃភ្លាម ក្រោយបារាំងចេញលទ្ធផលបោះឆ្នោតជ្រើសរើសប្រធានាធិបតីថ្មី

អ្នកវិនិយោគកំពុងមានទំនុកចិត្តឡើងវិញ ក្រោយលទ្ធផលបោះឆ្នោតជ្រើសរើសប្រធានាធិបតីរបស់បារាំងបានបង្ហាញថា លោក Emmanuel Macron បានក្លាយជាបេក្ខភាពប្រធានាធិបតីមានសម្លេងឆ្នោតដឹកមុខគេនៅក្នុងជុំទី១នេះ។

ស្ថានីយបោះឆ្នោតប្រមាណ ៩៦% នៅទូទាំងប្រទេស បានបង្ហាញសម្លេងឆ្នោតថា លោក Emmanuel Macron ដែលជាអតីតរដ្ឋមន្រ្តីសេដ្ឋកិច្ចបារាំងបានទទួលបានសម្លេងគាំទ្រដឹកមុខគេក្នុងចំនួន ២៣,៧% ខណៈដែលលោកស្រី Marine Le Pen ទទួលបានសម្លេងឆ្នោតគាំទ្រប្រកៀកប្រកិតគ្នាក្នុងចំនួន ២១,៨%។ ការបោះឆ្នោតជុំទី២នឹងធ្វើឡើងនៅថ្ងៃទី ៧ ខែឧសភាខាងមុខនេះ។

បើកការជួញដូរនៅលើទីផ្សារអាស៊ីព្រឹកនេះ ប្រាក់អឺរ៉ូបានឡើងថ្លៃ បើធៀបទៅនឹងប្រាក់ដុល្លារ ខណៈដែលអ្នកវិនិយោគបានព្យាករណ៍ថា ឱកាសនៃក្លាយជាប្រធានាធិបតីរបស់លោកស្រី Le Pen គឺទំនងមិនអាចទៅរួចនោះឡើយ។ លោកស្រី គឺជាបេក្ខភាពប្រធានាធិបតីមួយរូបដែលជារឿយៗបានសន្យាថា បើលោកស្រីឈ្នះឆ្នោត លោកស្រីនឹងដឹកនាំបារាំងឲ្យងាកចេញពីតំបន់អឺរ៉ុប ដូចអង់គ្លេសដែរ។ ការឃោសនារបស់លោកស្រីនេះហើយដែលធ្វើឲ្យអ្នកវិនិយោគមានការបារម្ភទៅនឹងជ័យជំនះរបស់លោកស្រី។

ធៀបទៅនឹងដុល្លារ ប្រាក់អឺរ៉ូត្រូវបានជួញដូរដល់តម្លៃ ១,០៨៣៨ ដុល្លារ ដែលជាតម្លៃមួយល្អបំផុតបើធៀបទៅនឹងថ្ងៃ សុក្រកន្លងទៅដែលវាត្រូវបានជួញដូរត្រឹមតែ ១,០៧២ ដុល្លារប៉ុណ្ណោះ។ បើធៀបទៅនឹងលុយយ៉េនវិញ ប្រាក់អឺរ៉ូត្រូវបានជួញដូរក្នុងតម្លៃឡើងថ្លៃដែរ ពោលគឺ ១១៩,២០ យ៉េន៕

ប្រភព៖ cnbc