ដុល្លារមានសម្ពាធទៀតក្នុងថ្ងៃនេះ

ការជួញដូរប្រាក់ដុល្លារធៀបទៅនឹងរូបិយប័ណ្ណសំខាន់ៗផ្សេងទៀត ត្រូវបានគេមើលឃើញថា បានមានសម្ពាធជាថ្មីម្តងទៀតជុំវិញការបារម្ភទៅនឹងបញ្ហាភូមិសាស្ត្រនយោបាយអន្តរជាតិ និង ជំនួបរវាងប្រធានាធិបតីអាមេរិក និង ប្រធានាធិបតីចិនក្នុងថ្ងៃនេះ។

សន្ទស្សន៍តម្លៃជួញដូរប្រាក់ដុល្លារធៀបទៅនឹងរូបិយប័ណ្ណផ្សេងទៀតបានធ្លាក់ថ្លៃអស់ ០,១៥% ស្ថិតនៅក្នុងទីតាំងជួញដូរ ១០០,៤១០។ ការធ្លាក់ថ្លៃនៃប្រាក់ដុល្លារនេះបានកើតមានឡើងក្រោយពេលដែលធនាគារកណ្តាលរបស់ខ្លួនបានលើកឡើងពីការកាត់បន្ថយតុល្យការទឹកប្រាក់ប្រមាណ ៤,៥ ពាន់ពាន់លានដុល្លារនៅក្នុងឆ្នាំនេះ។

ការធ្លាក់ថ្លៃនៃប្រាក់ដុល្លារគឺកើតមានឡើងដោយសារតែស្ថានភាពភូមិសាស្ត្រនយោបាយអន្តរជាតិបានកើតឡើងភាពតានតឹងជាថ្មី ក្រោយកូរ៉េខាងជើងបាញ់មីស៊ីលចូលទៅកាន់ដែនសមុទ្រជប៉ុនកាលពីថ្ងៃពុធម្សិលមិញ នៅមុនពេលជំនួបរវាងប្រធានាធិបតីអាមេរិក និង ប្រធានាធិបតីចិន។

ការជួញដូរប្រាក់ដុល្លារធៀបទៅនឹងលុយយ៉េនបានធ្លាក់ថ្លៃអស់ ០,៣% ស្ថិតនៅក្នុងតម្លៃ ជួញដូរ ១១០,៣៩០ យ៉េនក្នុងមួយដុល្លារ ពោលគឺបានធ្លាក់ចុះពីតម្លៃ ១១១,៤៥០ យ៉េនក្នុងមួយដុល្លារកាលពីយប់មិញ។ ចំណែកលុយអឺរ៉ូវិញ បានឡើងថ្លៃ ០,២% ស្ថិតនៅក្នុងតម្លៃជួញដូរ ១,០៦៨១ ដុល្លារ។

ងាកទៅមើលលុយផោនរបស់អង់គ្លេសវិញ បានឡើងថ្លៃ ០,១% ស្ថិតនៅក្នុងតម្លៃជួញដូរ ១,២៤៩៤ ដុល្លារ បន្ទាប់ពីបានឡើងថ្លៃកាលពីយប់មិញ បន្ទាប់ពីមានទិន្នន័យបង្ហាញថា វិស័យសេវាកម្មរបស់ខ្លួនស្ថិតនៅក្នុងសញ្ញាណវិជ្ជមាន។ រីឯលុយដុល្លារ អូស្ត្រាលីវិញ មិនមានការប្រែប្រួលខ្លាំងនោះទេ ពោលគឺត្រូវបានជួញដូរក្នុងតម្លៃ ០,៧៥៦៦ ដុល្លារ ខណៈដែលលុយដុល្លារនូវែលហ្សេឡង់បានឡើងថ្លៃ ០,២% ស្ថិតនៅក្នុងតម្លៃជួញដូរ ០,៦០៧៧ ដុល្លារ៕

ប្រភព៖ cnbc