ផ្សារភាគហ៊ុនអាស៊ីធ្លាក់ថ្លៃទាំងអស់

នៅថ្ងៃនេះ ការជួញដូរនៅលើផ្សារភាគហ៊ុនអាស៊ី បានធ្លាក់ចុះបន្ទាប់ពីផ្សារភាគហ៊ុនអាមេរិកបានបិទបញ្ចប់ទៅក្នុងតម្លៃ ធ្លាក់ថ្លៃដែរកាលពីយប់មិញ ក្រោយមានទិន្នន័យបង្ហាញថា ភាគហ៊ុនរបស់ក្រុមហ៊ុនហិរញ្ញវត្ថុធំៗមានការធ្លាក់ចុះដែរ។

ការធ្លាក់ចុះនេះបានកើតមានឡើងនៅស្របពេលដែលភូមិសាស្ត្រនយោបាយនៅក្នុងតំបន់ឧបទ្វីបកូរ៉េមានភាពតានតឹងខ្លាំងនៃការប្រឈមមុខដាក់គ្នារវាងអាមេរិក និងកូរ៉េខាងជើង។ ផ្សារភាគហ៊ុនជប៉ុន Nikkei បានធ្លាក់ថ្លៃអស់០,១៨% ដូចទៅនឹងផ្សារភាគហ៊ុន Topix របស់ខ្លួនដែរដែលបានធ្លាក់ថ្លៃក្នុងចំនួនដូចគ្នា។

នៅអូស្ត្រាលី ផ្សារភាគហ៊ុន S&P/ASX 200 បានធ្លាក់ថ្លៃខ្ពស់ជាងដល់ទៅ ០,៤៣% ខណៈដែលផ្សារភាគហ៊ុនហុងកុង Hang Seng បានធ្លាក់ថ្លៃខ្ពស់ជាងបន្តិចដល់ទៅ ០,៤៧%។ នៅចិនដីគោក ផ្សារភាគហ៊ុន សៀងហៃបានធ្លាក់ថ្លៃអស់ ០,៣៧% និង ផ្សារភាគហ៊ុន Shenzhen បានធ្លាក់ថ្លៃទាបជាងត្រឹម ០,៣៤%។

ងាកទៅមើលកូរ៉េខាងត្បូង ផ្សារភាគហ៊ុន Kospi បានធ្លាក់ថ្លៃអស់០,៣៦% ដោយសារតែអ្នកជួញដូរកំពុងមានការបារម្ភទៅនឹងស្ថានភាពនយោបាយនៅក្នុងតំបន់ដែលកំពុងតានតឹងឡើងវិញ ក្រោយអាមេរិកបានបញ្ជូននាវាចម្បាំងចូលមកក្នុងតំបន់ ដើម្បីត្រៀមទប់ទល់ទៅនឹងការវាយប្រហារណាមួយរបស់កូរ៉េខាងជើង។

នៅក្នុងខណៈនេះ ភាគហ៊ុនរបស់ក្រុមហ៊ុនធនាគារនៅជប៉ុន កូរ៉េខាងត្បូង ហុងកុង ចិន និង អូស្ត្រាលីជាដើម សុទ្ធតែបានបង្ហាញសញ្ញាណអវិជ្ជមានដោយសារតែភាពតានតឹងនៃជម្លោះនយោបាយនៅក្នុងតំបន់។ នៅតំបន់អឺរ៉ុប អ្នកវិនិយោគកំពុងបារម្ភផងដែរលើព្រឹត្តិការណ៍បោះឆ្នោតនៅបារាំងនៅចុងសប្តាហ៍នេះ និង ការចរចាផ្តាច់ខ្លួនរបស់អង់គ្លេសចេញពីសហភាពអឺរ៉ុប ដែលកំពុងបង្កភាពស្មុគស្មាញនៅក្នុងតំបន់៕

ប្រភព៖ cnbc