ប្រេងឡើងថ្លៃវិញ ក្រោយធ្លាក់ថ្លៃ៦ថ្ងៃជាប់ៗគ្នា

ការជួញដូរប្រេងឆៅនៅលើ ទីផ្សារអន្តរជាតិក្នុងថ្ងៃនេះ មានសញ្ញាណល្អឡើងវិញ ក្រោយធ្លាក់ថ្លៃអស់ ៦ថ្ងៃជាប់ៗគ្នានៅពេលកន្លងមក បន្ទាប់ពីមានព័ត៌មានថា ការផ្គត់ផ្គង់ប្រេងនៅលើទីផ្សារសាកលលោកមានការកើនឡើងហួសពីតម្រូវការបើទោះបីជាមានកិច្ចព្រមព្រៀងកាត់បន្ថយការផលិតប្រេងរបស់អង្គការ OPEC ក៏ដោយ។

ការជួញដូរប្រេងឆៅនៅលើទីផ្សារអាមេរិកបានឡើងថ្លៃ ២១ សេន ឬ ស្មើនឹង ០,៤% ស្ថិតនៅក្នុងតម្លៃជួញដូរ ៤៩,៤៤ ដុល្លារក្នុងមួយបារ៉ែល។ យ៉ាងណាមិញ តម្លៃនេះ ស្ថិតនៅក្រោមតម្លៃកាលពីចុងសប្តាហ៍មុនដែលវាត្រូវបានជួញដូរលើសពី ៥០ ដុល្លារក្នុងមួយបារ៉ែល។ ចំណែកទីផ្សារប្រេងឆៅនៅលើទីផ្សារអាមេរិកវិញ បានឡើងថ្លៃ ២៣ សេន ឬ ស្មើនឹង០,៥% ត្រូវបានជួញដូរក្នុងតម្លៃ ៥១,៨៣ ដុល្លារក្នុងមួយបារ៉ែល។

យ៉ាងណាមិញ តម្លៃរបស់វាបានឡើងថ្លៃបន្តិចមែនក្នុងថ្ងៃនេះ ក៏ប៉ុន្តែទីផ្សាររួមបានបង្ហាញថា តម្លៃប្រេងឆៅនៅលើសាកលលោកបានធ្លាក់ចុះអស់ ១០% ចាប់តាំងពីចុងខែធ្នូមក បើទោះបីជាមានការខិតខំប្រឹងប្រែងពីអង្គការ OPEC និង រុស្ស៊ីក៏ដោយ។

ស្របទៅនឹងស្ថានភាពជួញដូរនៅពេលនេះ រុស្ស៊ីបានលើកឡើងកាលពីម្សិលមិញដោយព្រមានថា ការផលិតប្រេងនឹងកើនឡើងខ្ពស់ក្នុងកំណត់ត្រាមិនធ្លាប់មានក្នុងរយៈពេល៣០ឆ្នាំមកនេះ ប្រសិនបើបណ្តាប្រទេសផលិតប្រេងរបស់អង្គការ OPEC និង មិនមែនសមាជិករបស់អង្គការនេះ មិនបន្តអនុវត្តតាមកិច្ចព្រមព្រៀងកាត់បន្ថយប្រេងនៅពេលកន្លងមក។

ទិន្នន័យចុងក្រោយបានបង្ហាញថា ការនាំប្រេងចេញរបស់រុស្ស៊ីទាំងតាមនាវាចរ និង តាមបំពង់បង្ហូរប្រេងគឺបានកើនឡើងជាប់កំណត់ត្រារួចហើយក្នុងចំនួន ៥លានបារ៉ែលក្នុងមួយថ្ងៃនៅក្នុងខែមេសានេះ ពោលគឺបានកើនឡើង ១៧% គិតចាប់តាំងពីខែធ្នូមក មុនពេលកិច្ចព្រមព្រៀងត្រូវបានអនុវត្តជាផ្លូវការ៕

ប្រភព៖ cnbc