Friday, October 20, 2017
ប្រាក់ដុល្លារឡើងថ្លៃជាថ្មីទៀតថ្ងៃនេះ
ការជួញដូរប្រាក់ដុល្លារបន្តឡើងថ្លៃជាថ្មីទៀតនៅថ្ងៃនេះ
បន្ទាប់ពីការវិវត្តនយោបាយចុងក្រោយនៅអាមេរិកបានបើកភ្លើងខៀវមួយលើការរំពឹងទុកនៃការអនុវត្តគោលនយោបាយពន្ធដារថ្មីរបស់លោក
Trump។
ការឡើងថ្លៃប្រាក់ដុល្លារនេះបានកើតមានឡើងស្របពេលដែលស្ថានភាពទីផ្សារភាគហ៊ុនអាស៊ីមានសញ្ញាណវិជ្ជមានច្រើន
បន្ទាប់ពីផ្សារភាគហ៊ុនសាកលលោកបានស្ថិតនៅក្នុងកំណត់ត្រាឡើងថ្លៃសម្រាប់សប្តាហ៍នេះ។
សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណសំខាន់ៗបានស្ថិតនៅក្នុងទីតាំងតម្លៃ
៩៣,១៦៧ នៅម៉ោង ៩ ព្រឹកនេះ។ ធៀបទៅនឹងលុយយ៉េនរបស់ជប៉ុន
ដុល្លារបានឆ្លៀតឡើងថ្លៃទៀតក្នុងចំនួន ០,៥% នៅក្នុងតម្លៃជួញដូរ
១១៣,០៧យ៉េន។ លុយយ៉េនត្រូវបានជួញដូរក្នុងសញ្ញាណមិនល្អនោះឡើយ
ស្របពេលដែលអ្នកជួញដូរកំពុងតាមដានលើស្ថានការណ៍នយោបាយប្រទេសនេះនៅមុនពេលបោះឆ្នោតចូលមកដល់នៅថ្ងៃទី
២២ តុលា ខាងមុខនេះ។
ងាកទៅមើលការជួញដូរលុយដុល្លារនូវែលហ្សេឡង់កំពុងស្ថិតនៅក្នុងការតាមដានរបស់អ្នកជួញដូរ
ខណៈដែលព្រឹកនេះវាបានធ្លាក់ថ្លៃអស់ ០,៧%
ត្រូវបានជួញដូរក្នុងតម្លៃ ៦៩,៨១
ដុល្លារដែលបានបន្ថែមលើការជួញដូរធ្លាក់ថ្លៃស្រាប់អស់ ១,៧%
កាលពីម្សិលមិញ។ ការធ្លាក់ថ្លៃដ៏ច្រើននៃរូបិយប័ណ្ណមួយនេះ
គឺបានកើតមានឡើងបន្ទាប់ពីគណបក្សពលកររបស់ប្រទេសនេះបានប្រកាសថា
នឹងបង្កើតរដ្ឋាភិបាលចម្រុះមួយជាមួយគណបក្សជាតិនិយម។
ចំពោះការជួញដូរប្រាក់អឺរ៉ូវិញ មិនមានការប្រែប្រួលច្រើននោះទេ
ពោល គឺត្រូវបានជួញដូរក្នុងតម្លៃ ១,១៨៣១ ដុល្លារ។ រីឯលុយផោនវិញ
បានធ្លាក់ថ្លៃមកកាន់តម្លៃ ១,៣១៣១ ដុល្លារ៕
ប្រភព៖ cnbc
ផ្សារភាគហ៊ុនអាស៊ីប្រែប្រួលយ៉ាងណាថ្ងៃនេះ?
ការជួញដូរនៅលើផ្សារភាគហ៊ុនអាស៊ីនៅព្រឹកថ្ងៃសុក្រនេះត្រូវបានគេមើលឃើញថា
បានឡើងចុះមិនស្របគ្នានោះឡើយ បន្ទាប់ពីផ្សារភាគហ៊ុន Wall
Street របស់អាមេរិកបានរង្គោះរង្គើ
ខណៈដែលផ្សារភាគហ៊ុនអឺរ៉ុបបានបិទបញ្ចប់ការជួញដូរធ្លាក់ថ្លៃដែរកាលពីយប់មិញ។
សន្ទស្សន៍ជួញដូរផ្សារភាគហ៊ុន Nikkei 225
របស់ជប៉ុនបានធ្លាក់ថ្លៃអស់ ០,៣២%
នៅពេលចាប់ផ្តើមជួញដូរដំបូងព្រឹកនេះបន្ទាប់ពីផ្សារភាគហ៊ុនមួយនេះបានបិទបញ្ចប់ក្នុងតម្លៃឡើងថ្លៃជាប់ៗគ្នានៅក្នុងរយៈពេល
១៣ ថ្ងៃកាលពីម្សិលមិញ។
ចំណែកនយោបាយនៅក្នុងប្រទេសកំពុងស្ថិតនៅក្នុងផ្ទាំងស៊ីបនៃការតាមដានរបស់អ្នកជួញដូរ
ខណៈដែលប្រទេសនេះនឹងរៀបចំការបោះឆ្នោតជាតិមួយនៅថ្ងៃទី ២២
តុលានេះ។
ងាកទៅមើលផ្សារភាគហ៊ុន Kospi របស់កូរ៉េខាងត្បូងវិញ បានឡើងថ្លៃ
០,៣១ ។
ភាគហ៊ុនរបស់ក្រុមហ៊ុនបច្ចេកវិជ្ជារបស់ខ្លួនកំពុងជួញដូរក្នុងទិសដៅវិជ្ជមាន
ដែលបានជួយកាត់បន្ថយការខាតបង់កាលពីថ្ងៃព្រហស្បតិ៍ម្សិលមិញ។
ភាគហ៊ុនក្រុមហ៊ុន Samsung Electronics បានឡើងថ្លៃ ០,៥៣% ភាគរយ
និងក្រុមហ៊ុនរថយន្តផ្សេងៗទៀតសុទ្ធតែឡើងថ្លៃដូចគ្នា។
ចំណែកផ្សារភាគហ៊ុន S & P / ASX 200 របស់អូស្ត្រាលីវិញ
មិនមានការប្រែប្រួលខ្លាំងនោះទេ។ ភាគហ៊ុនរបស់ក្រុមហ៊ុនចម្រុះ
មានសញ្ញាណវិជ្ជមានច្រើននៅព្រឹកនេះ។
ប៉ុន្តែវាបានទៅប៉ះប៉ូវនៃការធ្លាក់ចុះនៃភាគហ៊ុនរបស់ក្រុមហ៊ុនថាមពល
និងក្រុមហ៊ុនប្រេង ដែលកំពុងជួញដូរក្នុងបន្ទាប់ក្រហម។
នៅឥណ្ឌាទីផ្សារភាគហ៊ុនរបស់ខ្លួនមិនបានបើកឲ្យជួញដូរទេ
ដោយសារតែចូលរួមពិធីបុណ្យឈប់សម្រាកប្រចាំឆ្នាំ។
ធ្វើដំណើរទៅមើលការជួញដូរនៅលើផ្សារភាគហ៊ុនចិន សន្ទស្សន៍ភាគហ៊ុន
Hang Seng
របស់ហុងកុងកំពុងជួញដូរទំនោរទៅតាមទិន្នន័យពាណិជ្ជកម្មរបស់ចិន។
កាលពីថ្ងៃព្រហស្បតិ៍ម្សិលមិញ
សន្ទស្សន៍ផ្សារភាគហ៊ុននេះបានបិទការជួញដូរក្នុងតម្លៃធ្លាក់ថ្លៃដល់ទៅ
២% នៅពេលមានព័ត៌មានជាច្រើនស្តីពីស្ថានភាពពាណិជ្ជកម្ម និង
សារចេញពីប្រមុខធនាគារកណ្តាលចិន។
បើតាមប្រមុខធនាគារកណ្តាលចិនលោក Zhou Xiaochuan
បានព្រមានកាលពីថ្ងៃព្រហស្បតិ៍ម្សិលមិញថា
ភាពសុទិដ្ឋិនិយមច្រើនពេកនៅលើអាចនាំឱ្យដួលរលំលើការជួញដូរនៅលើទីផ្សារ។
ងាកទៅមើលផ្សារភាគហ៊ុនអាមេរិកវិញ
បានបិទការជួញដូរក្នុងតម្លៃប្រែប្រួលបន្តិចបន្តួចបន្ទាប់ពីរបាយការណ៍របស់សារព័ត៌មាន
Politico បានចេញផ្សាយថា លោកប្រធានាធិបតី Donald Trump
បានសម្លឹងមើលលោក Jerome Powell
ជាបេក្ខជនលេចធ្លោជាងគេអាចនឹងជំនួសតំណែងលោកស្រី Janet Yellen
ដែលជាប្រមុខធនាគារកណ្តាលអាមេរិកបច្ចុប្បន្ន។
នៅអឺរ៉ុបវិញ
សន្ទស្សន៍ជួញដូរនៅលើផ្សារភាគហ៊ុននានាសុទ្ធតែបិទបញ្ចប់ក្នុងតម្លៃជួញដូរធ្លាក់ថ្លៃទាំងអស់
បន្ទាប់ពីរដ្ឋាភិបាលអេស្ប៉ាញបានលើកឡើងថា
ខ្លួនចង់ពន្យារពេលលើការទាមទារផ្តាច់ខ្លួននៃតំបន់ Catalane
បន្ទាប់ពីមេដឹកនាំតំបន់នេះ
មិនបានបញ្ជាក់ច្បាស់លាស់នៅឡើយពីការប្រកាសឯករាជ្យភាពរបស់ខ្លួន៕
ប្រភព៖ cnbc
Wednesday, October 18, 2017
ទីផ្សារប្រេងឆៅបន្តឡើងថ្លៃខ្ពស់ជាថ្មីទៀត
ទីផ្សារប្រេងឆៅកំពុងមានប្រជាប្រិយភាពកាន់តែខ្លាំងនៅថ្ងៃពុធនេះ
ដោយសារមានការធ្លាក់ចុះនៃការផលិតប្រេងរបស់អាមេរិក
និងការព្រួយបារម្ភថា
ភាពតានតឹងនៅក្នុងតំបន់មជ្ឈឹមបូព៌ាអាចបង្អាក់ដល់ការផ្គត់ផ្គង់ប្រេងនៅលើទីផ្សារអន្តរជាតិ។
តម្លៃប្រេងឆៅនៅលើទីផ្សារអន្តរជាតិបានឡើងថ្លៃដល់តម្លៃ ៥៨,២៧
ដុល្លារក្នុងមួយបារ៉ែល ពោលគឺបានឡើងថ្លៃបាន ៣៩ សេន ឬស្មើនឹង ០,៧%
ពីតម្លៃបិទការជួញដូរចុងក្រោយកាលពីម្សិលមិញ។ តម្លៃនេះ
គឺជាតម្លៃជួញដូរខ្ពស់បំផុតជាលើកទី៣នៅក្នុងឆ្នាំនេះ។
ចំណែកទីផ្សារជួញដូរប្រេងឆៅរបស់អាមេរិក West Texas Intermediate (WTI)
មានតម្លៃ ៥២,០៨ ដុល្លារក្នុងមួយបារ៉ែល ឡើងថ្លៃបាន ២០ សេន
ឬស្មើនឹង ០,៤%។
អ្នកជួញដូរនានាបានលើកឡើងថា
ទីផ្សារប្រេងឡើងថ្លៃនេះគឺដោយសារតែមានការរុញច្រានពីទិន្នន័យធ្លាក់ចុះនៅក្នុងទីផ្សារផលិតប្រេងរបស់អាមេរិក
រួមទាំងទាំងការព្រួយបារម្ភទៅ
នឹងព័ត៌មានវាយប្រយុទ្ធគ្នានៅអ៊ីរ៉ាក់
និងការប្រឈមមុខដាក់គ្នារវាងអាមេរិក
និងអ៊ីរ៉ង់ដែលនឹងអាចប៉ះពាល់ដល់ការផ្គត់ផ្គង់ប្រេងឆៅនៅលើទីផ្សារសាកល។
វិទ្យាស្ថានប្រេងឥន្ធនៈអាមេរិក (API)
បានរាយការណ៍កាលពីថ្ងៃអង្គារម្សិលមិញថា
ការស្តុកប្រេងឆៅរបស់ខ្លួនបានធ្លាក់ចុះអស់ ៧,១
លានបារ៉ែលក្នុងសប្តាហ៍ថ្ងៃទី១៣
ខែតុលាកន្លងទៅនេះមកត្រឹមចំនួនសរុប ៤៦១,៤ លានបារ៉ែលប៉ុណ្ណោះ។
ក្រៅពីនេះ
ទិន្នន័យស្តីពីការស្តុកប្រេងឥន្ធនៈផ្លូវការរបស់អាមេរិកនឹងត្រូវចេញផ្សាយជាសាធារណៈផងដែរនៅយប់នេះ។
បន្ថែមពីលើសម្ពាធផលិតប្រេងឆៅក្នុងទីផ្សារអាមេរិក
ការកើនឡើងនៃភាពតានតឹងនៅតំបន់មជ្ឈិមបូព៌ាមានន័យថា
ជាសញ្ញាណវិជ្ជមានមួយសម្រាប់ធ្វើឲ្យទីផ្សារប្រេងឆៅងើបឡើងវិញ។
កាលពីដើមសប្តាហ៍នេះ
កងកម្លាំងរដ្ឋាភិបាលអ៊ីរ៉ាក់បានដណ្តើមបានទីក្រុងប្រេង Kirkuk
មកវិញ ដែលកាន់កាប់ដោយជនជាតិ
ឃឺដក្រោយពួកគេបានធ្វើប្រជាមតិប្រកាសឯករាជ្យផ្តាច់ខ្លួន
ដែលសកម្មភាពនេះធ្វើឲ្យរាំងស្ទះដល់ការផ្គត់ផ្គង់ប្រេងឆៅ។
ក្រៅពីនេះ
ភាពតានតឹងនៃការប្រឈមមុខដាក់គ្នារវាងរដ្ឋាភិបាលអាមេរិក
និងអ៊ីរ៉ង់បានដាក់សម្ពាធថ្មីកាន់តែខ្លាំងឡើងដល់ទីផ្សារប្រេងឆៅ។
កាលពីថ្ងៃសុក្រកន្លងទៅ លោក Donald Trump
បានបដិសេធមិនព្រមបញ្ជាក់ពីការជំហររបស់អ៊ីរ៉ង់លើការអនុវត្តិកិច្ចព្រមព្រៀងនុយក្លេអ៊ែរដែលបានទុកពេលឲ្យ៦០ថ្ងៃទៀត
ដើម្បីសម្រេចចិត្តថា
នឹងធ្វើសកម្មភាពអ្វីបន្ថែមទៀតប្រឆាំងទៅនឹងប្រទេសនេះ៕
ប្រភព៖ cnbc
ផ្សារភាគហ៊ុនអាស៊ីប្រែប្រួលតិចតួច ស្របពេលដែលអ្នកជួញដូរកំពុងឃ្លាំមើលសមាជជាតិរបស់បក្សកុម្មុយនិស្តចិន
ការជួញដូរនៅលើផ្សារភាគហ៊ុនអាស៊ីព្រឹកនេះមានស្ថានភាពប្រែប្រួលតិចតួចប៉ុណ្ណោះ
ខណៈដែលអ្នកជួញដូរក្នុងតំបន់នេះកំពុងឃ្លាំមើលសមាជជាតិប្រចាំឆ្នាំរបស់បក្សកុម្មុយនិស្តចិនដើម្បីដឹងពីសញ្ញាទិសដៅគោលនយោបាយនាពេលអនាគតរបស់មហាអំណាចសេដ្ឋកិច្ចធំជាងគេបំផុតទី២នៅលើពិភពលោកមួយនេះ។
សន្ទស្សន៍ជួញដូរនៅលើផ្សារភាគហ៊ុនជប៉ុន Nikkei 225
បានធ្លាក់ថ្លៃបន្តិចបន្តួចប៉ុណ្ណោះត្រឹមតែ ០,០០៩%
បន្ទាប់ពីបានឡើងថ្លៃជាប់ៗគ្នានៅ
ក្នុងរយៈពេល១១ថ្ងៃកន្លងទៅគិតត្រឹមថ្ងៃអង្គារម្សិលមិញ។
ភាគហ៊ុនរបស់ក្រុមហ៊ុននាំចូលសំខាន់ៗរបស់ប្រទេស
បានឡើងចុះមិនស្របគ្នា បើទោះបីជា
ភាគហ៊ុនរបស់ក្រុមហ៊ុនបច្ចេកវិទ្យាភាគច្រើនបានឡើងថ្លៃក៏ដោយ។
ឆ្លងពីដែនដីជប៉ុនមកកាន់ទឹកដីកូរ៉េវិញ សន្ទស្សន៍ជួញដូរភាគហ៊ុន
Kospi បានធ្វើផ្លាស់ប្ដូរនៅពេលបើកការជួញដូរដំបូង
ដោយបានធ្លាក់ថ្លៃអស់ ០,១៦%។ ការធ្លាក់ចុះ
នេះគឺដោយសារតែភាគហ៊ុនរបស់ក្រុមហ៊ុន
របស់ក្រុមហ៊ុនបច្ចេកវិទ្យាធំៗបានធ្លាក់ចុះ
បើទោះបីជាភាគហ៊ុនរបស់ក្រុមហ៊ុនរថយន្តធំៗ
របស់ខ្លួនត្រូវបានជួញដូរឡើងថ្លៃក៏ដោយ។
ងាកទៅមើលផ្សារភាគហ៊ុនអូស្ត្រាលីវិញ
សន្ទស្សន៍ជួញដូរផ្សារភាគហ៊ុន S & P / ASX 200 បានឡើងថ្លៃ ០,២៣%
ដោយបានរួមចំណែកពីសញ្ញាណល្អនៃភាគហ៊ុនរបស់ក្រុមហ៊ុនផ្គត់ផ្គង់បរិក្ខារ។
ចំណែកភាគហ៊ុនរបស់ក្រុមហ៊ុនរ៉ែថាមពល និង
ទូរគមនាគមន៍មិនទទួលបានការជួញដូរក្នុងទិសដៅវិជ្ជមាននោះឡើយ។
ត្រឡប់មកមើលការជួញដូរនៅលើទីផ្សារភាគហ៊ុនធំៗរបស់ចិន
ត្រូវបានគេមើលឃើញថា កំពុងមានស្ថិរភាពនៅឡើយ
ពោលគឺមិនមានការប្រែប្រួលច្រើននោះទេ
នៅស្របពេលដែលសមាជជាតិលើកទី១៩ កំពុងរៀបចំឡើងនៅថ្ងៃនេះ។
សន្ទស្សន៍ជួញដូរនៅលើផ្សារភាគហ៊ុន Hang Seng
របស់ហុងកុងបានធ្លាក់ធ្លាក់ថ្លៃបន្តិចត្រឹមតែ ០,០៥%
នៅខណៈដែលសន្ទស្សន៍ជួញដូរផ្សារភាគហ៊ុនសៀងហៃ បានឡើងថ្លៃត្រឹមតែ
០,០១% និងផ្សារភាគហ៊ុនបានឡើងថ្លៃ ០,១៣%។
ទីផ្សារជួញដូរកំពុងឃ្លាំមើលយ៉ាងយកចិត្តទុកដាក់លើការវិវត្តន៍នានានៅក្នុងកិច្ចប្រជុំកំពូលមួយនេះ
នៅពេលសមាជជាតិចាប់ផ្តើមដំណើរការ។ បើទោះបីជាយ៉ាងណាក៏ដោយ
កិច្ចប្រជុំនៅលើកមុន
បានបង្ហាញដល់អ្នកជួញដូររួចមកហើយពីពន្លឺខ្លះៗនៃទិសដៅសេដ្ឋកិច្ចរបស់មហាអំណាចនេះ
ហើយគេជឿថា
ប្រធានបទប្រាក់បំណុលដ៏ច្រើនរបស់ខ្លួននឹងត្រូវលើកយកពិភាក្សានៅក្នុងកិច្ចប្រជុំនេះ។
ក្រៅពីសមាជាតិខាងលើ
អ្នកជួញដូរកំពុងរង់ចាំទិន្នន័យសេដ្ឋកិច្ចសំខាន់ៗរបស់ចិនដែលរួមមាន
ទិន្នន័យផលិតកម្មក្នុងវិស័យឧស្សាហកម្ម និង ទិន្នន័យ GDP
សម្រាប់ត្រីមាសទី៣ប្រចាំឆ្នាំ ២០១៧ដែលនឹងចេញផ្សាយនៅថ្ងៃទី ១៩
តុលាខាងមុខ៕
ប្រភព៖ cnbc
មាសឡើងថ្លៃក្រោយធ្លាក់ថ្លៃខ្លាំងកាលពីយប់មិញ ខណៈដែលទីផ្សារប្រាក់ដុល្លារនៅមានសញ្ញាណវិជ្ជមាននៅឡើយ
ការជួញដូរមាសនៅថ្ងៃអង្គារនេះ
បានងាកចេញពីតម្លៃជួញដូរធ្លាក់ថ្លៃមកកាន់តម្លៃមួយទាបបំផុតក្នុងសប្តាហ៍នេះ
ខណៈដែលទីផ្សារប្រាក់ដុល្លារនៅមានសញ្ញាណល្អនៅឡើយ
ស្របពេលដែលអ្នកជួញដូរនៅលើទីផ្សារអន្តរជាតិកំពុងសម្លឹងមើលពីលទ្ធភាពដែលប្រធានាធិបតីអាមេរិកDonald
Trump នឹងជ្រើសរើសប្រធានធនាគារកណ្តាលថ្មីជំនួសលោកស្រី Janet
Yellen។
ទីផ្សារមាសតាមស្បត បានឡើងថ្លៃ ០,១% ត្រូវបានជួញដូរក្នុងតម្លៃ ១
២៨៧,១០ ដុល្លារក្នុងមួយអោននៅម៉ោង ៩:៣០ នាទីព្រឹកនេះ
បន្ទាប់ពីវាបានធ្លាក់ថ្លៃដល់តម្លៃ ១ ២៨១,៣១ ដុល្លារក្នុងមួយអោន
ដែលជាតម្លៃជួញដូរទាបបំផុតប្រចាំសប្តាហ៍នេះ ។
ចំណែកទីផ្សារមាសរបស់អាមេរិកវិញ បានឡើងថ្លៃ ០,២%
ត្រូវបានជួញដូរក្នុងតម្លៃ ១ ២៨៨,៣ ដុល្លារក្នុងមួយអោន។
អ្នកជួញដូរនៅលើទីផ្សារឃ្លាំមើលថា
តើនរណានឹងក្លាយជាប្រមុខធនាគារកណ្តាលអាមេរិកថ្មីមកដឹកនាំជំនួសលោក
Yellen ដែលបានផុតអាណត្តិនៅក្នុងខែ កុម្ភៈ ឆ្នាំ ២០១៨ ខាងមុខ។
យ៉ាងណាមិញ អ្នកជួញដូរបានរំពឹងទុកថា
ធនាគារកណ្តាលអាមេរិកនឹងដំឡើងអត្រាការប្រាក់ជាលើកទីបីនៅខែធ្នូចុងឆ្នាំ
នេះបន្ទាប់ពីលោក John Taylor
ជាសេដ្ឋវិទូដ៏ល្បីល្បាញមកពីសាកលវិទ្យាល័យ Stanford
ក៏បានក្លាយជាបេក្ខភាពដ៏សំខាន់នៅក្នុងចំណោមបេក្ខភាព៥រូបដែលត្រូវបានជ្រើសរើសនេះ។
លោក John Taylor ត្រូវបានគេស្គាល់ថា
ជាអ្នកគាំទ្រគោលនយោបាយរូបិយវត្ថុដ៏សំខាន់មួយរូប។
វត្តមានរបស់លោក John Taylor
គឺបានផ្តល់ទាក់ទាញអ្នកជួញដូរឲ្យនឹកដល់រូបមន្តគោលនយោបាយហិរញ្ញវត្ថុរបស់លោកដែលថា
អត្រាប្រាក់របស់ធនាគារកណ្តាលត្រូវតែខ្ពស់ជាងគោលដៅអត្រាការប្រាក់បច្ចុប្បន្ន។
ក៏ប៉ុន្តែ លទ្ធផលយ៉ាងណានោះ
គេអាចត្រូវរង់ចាំរហូតដល់ដើមខែក្រោយ ដែលលោក Trump
អាចប្រកាសតែងតាំងជាប្រធានធនាគារកណ្តាលនៅមុនដំណើរទស្សនកិច្ចរបស់លោកទៅ
កាន់តំបន់អាស៊ីនៅដើមខែក្រោយនេះ។
យ៉ាងណាមិញ
បើយោងតាមលទ្ធផលបោះឆ្នោតស្ទាបស្ទង់ធ្វើឡើងដោយសារព័ត៌មាន Reuters
បានបង្ហាញថា លោក Jerome Powell
ដែលជាអភិបាលធនាគារកណ្តាលអាមេរិកបច្ចុប្បន្នទំនងត្រូវបានជ្រើសរើសជាប្រធានស្ថាប័ននេះ។
ទោះបីជាបែបនេះក្តី លោកស្រី Janet Yellen នៅតែមានភាគរយខ្ពស់ដែលថា
លោកស្រីនឹងនៅតែបន្តដឹកនាំស្ថាប័ននេះតទៅទៀត៕
ប្រភព៖ cnbc
