Friday, October 6, 2017

Home Financial News ផ្សារភាគហ៊ុនអាស៊ី ឡើងថ្លៃ ខណៈអ្នកជួញដូរកំពុងរង់ចាំលទ្ធផលរបាយការណ៍ការងារអាមេរិកថ្ងៃនេះ

ផ្សារភាគហ៊ុនអាស៊ី ឡើងថ្លៃ ខណៈអ្នកជួញដូរកំពុងរង់ចាំលទ្ធផលរបាយការណ៍ការងារអាមេរិកថ្ងៃនេះ

ការជួញដូរនៅលើផ្សារភាគហ៊ុនអាស៊ីបានឡើងថ្លៃ នៅព្រឹកនេះនៅមុនពេលដែលទីផ្សារការងាររបស់អាមេរិកសម្រាប់ខែកញ្ញាកន្លងទៅនឹងត្រូវបានចេញផ្សាយជាសាធារណៈនៅយប់នេះ។

សន្ទស្សន៍ជួញដូរនៅលើផ្សារភាគហ៊ុនអូស្ត្រាលី ASX 200 បានឡើងថ្លៃ ០,៧៦% ស្ថិតនៅទីតាំងតម្លៃ ៥ ៦៩៤,៨ បន្ទាប់ពីបានបើកការជួញដូរនៅរយៈពេល៣ម៉ោងមុននៅព្រឹកនេះ ស្របពេលដែលភាគហ៊ុនរបស់ក្រុមហ៊ុននានាត្រូវបានជួញដូរក្នុងទិសដៅវិជ្ជមាន។

នៅជប៉ុន សន្ទស្សន៍ជួញដូរផ្សារភាគហ៊ុន Nikkei 225 បានឡើងថ្លៃទាបជាងបន្តិចត្រឹមចំនួន ០,៣៩% ស្ថិតនៅទីតាំងតម្លៃ ២០ ៧០៩,៦៤ នៅពេលចាប់ផ្តើមជួញដូរភ្លាមៗ ខណៈដែលសន្ទស្សន៍ជួញដូរនៅលើផ្សារភាគហ៊ុនរបស់ខ្លួនមួយទៀតគឺផ្សារភាគហ៊ុន Topix បានឡើងថ្លៃខ្ពស់ជាងក្នុងចំនួន ០,៤៤%។ ចំណែកទីផ្សារជួញដូរនៅលើទឹកដីចិន និង កូរ៉េខាងត្បូង នៅតែបន្តបិទការជួញដូរនៅឡើយទេដើម្បីចូលរួមពិធីបុណ្យឈប់សម្រាកប្រចាំឆ្នាំ។

បន្ទាប់ពីការបំផ្លិចបំផ្លាញដែលបណ្តាលមកពីព្យុះសង្ឃរា Harvey និង Irma នៅលើទឹកដីអាមេរិកនៅពេលកន្លងមក អ្នកឃ្លាំមើលនៅលើទីផ្សារអន្តរជាតិបានលើកឡើងថា ចំនួនការងារ ១២៥ ០០០ ត្រូវបានបាត់បង់នៅក្នុងខែកញ្ញាកន្លងទៅ។

ចំណែកធនាគារវិនិយោគ Goldman Sachs ដ៏ធំរបស់អាមេរិកវិញបានឱ្យដឹងក្នុងសេចក្តីថ្លែងការណ៍មួយដោយរំពឹងថា អត្រាកំណើនការងារអាចធ្លាក់ចុះចំនួន ៥០ ០០០ កន្លែងនៅក្នុងខែកញ្ញាកន្លងទៅ។ ចំនួននេះស្ថិតនៅទាបជាងការព្យាករណ៍នានាដែលថា វាអាចធ្លាក់ចុះដល់ទៅ ៨០ ០០០ កន្លែង ហើយគិតជាមធ្យមសម្រាប់រយៈពេល៣ខែ កន្លងទៅ វាអាចមានចំនួន ១៨៥ ០០០ កន្លែង។

យ៉ាងណាក៏ដោយ នេះគ្រាន់តែជាទិន្នន័យបឋមតែប៉ុណ្ណោះ ហើយលទ្ធផលយ៉ាងណានោះ គេត្រូវរង់ចាំមើលនៅយប់នេះ៕

ប្រភព៖ cnbc