ព័ត៌មាន​សេដ្ឋកិច្ច​សំខាន់ៗ​ចំនួន​៦ កើត​មាន​នៅ​ជុំវិញ​ពិភពលោក​ក្នុង​សប្តាហ៍​នេះ ដែល​អ្នក​ជួញដូរ​ត្រូវ​ដឹង

នៅ​ថ្ងៃ​នេះ Channyfx សូម​​​​ផ្តល់​ព័ត៌មាន​សំខាន់ៗ​ចំនួន​៦​កើត​មាន​នៅ​ជុំវិញ​ពិភពលោក​នៅ​ក្នុង​សប្តាហ៍​នេះ។ ចំពោះ​ប្រិយមិត្ត​ដែល​ប្រឡូក​​ក្នុង​ទីផ្សារ​ជួញដូរ​រូបិយប័ណ្ណ និង​ទីផ្សារ​ភាគហ៊ុន​នានា សូម​កុំ​ភ្លេច​តាមដាន​ព្រឹត្តិការណ៍​សេដ្ឋកិច្ច​ទាំង​នេះ ព្រោះ​​ថា វា​មាន​ឥទ្ធិពល​ដល់​ទីផ្សារ​ជួញដូរ​សាកលលោក។

 ) ទិន្នន័យ​ពាណិជ្ជកម្ម​អាល្លឺម៉ង់ (German Trade Balance)
ថ្ងៃ​ប្រកាស៖ ថ្ងៃ​ពុធ ទី១១ តុលា ម៉ោង ១ យប់​នេះ
ផល​ប៉ះពាល់​ដល់​ការ​ជួញដូរ ​EUR/USD, EUR/GBP

ជាមួយ​នឹង​វិស័យ​ផលិតកម្ម​ដែល​កំពុង​កើន​ឡើង​ កំណើន​នាំចេញ​របស់​​​អាល្លឺម៉ង់​មាន​សន្ទុះ​កើន​ឡើង​ខ្ពស់​ជាង​ចិន និង​ជប៉ុន​ទៅ​ទៀត​ ។ កាល​ពី​ខែ​មុន​តួលេខ​នេះ​បាន​កើន​ឡើង​ដល់​ទៅ ១៩,៥   ពាន់​លាន​អ៊ឺរ៉ូ និង​ការ​នាំចេញ​ត្រូវ​បាន​គេ​រំពឹង​ថា នឹង​អាច​កើន​ឡើង ​៥%​ នៅ​ក្នុង​ឆ្នាំ​នេះ​ធៀប​នឹង​ការ​​វាយតម្លៃ​ដំបូង​ដែល​ថា វា​អាច​មាន​ត្រឹមតែ ១,២% ប៉ុណ្ណោះ។

ទោះជា​យ៉ាងណាក៏ដោយ ខណៈ​​ដែល​អាជីវកម្ម និង​ពលរដ្ឋ​របស់​ខ្លួន​​កំពុង​ទទួល​បាន​អត្ថប្រយោជន៍​ពី​​កំណើន​នេះ បណ្តា​ប្រទេស​នៅ​អឺរ៉ុប​​មួយ​ចំនួន​ទៀត​នៅ​តែ​ព្យាយាម​ដោះស្រាយ​បញ្ហា​វិបត្តិ​សេដ្ឋកិច្ច​​របស់​ខ្លួន ដែល​អាច​ធ្វើ​ឱ្យ​​អាល្លឺម៉ង់​​នៅ​បន្ត​​​រួម​ទុក្ខ​ជាមួយ​នឹង​បញ្ហា​ក្នុង​តំបន់​នេះ​។ 

២) ទិន្នន័យ​​ផលិតកម្ម​របស់​អង់គ្លេស​​ប្រចាំ​ខែ​សីហា (UK Manufacturing Production)
ថ្ងៃ​ប្រកាស៖ ថ្ងៃ​ពុធ ទី១១ តុលា ម៉ោង ៣:៣០ នាទី​​ទៀប​ភ្លឺ​យប់​នេះ​
ផល​ប៉ះពាល់​ដល់​ការ​ជួញដូរ GBP/USD, EUR/GBP

សូចនាករ​សំខាន់​លើ​វិស័យ​ពាណិជ្ជកម្ម និង​ឧស្សាហកម្ម​សំខាន់ៗ​មួយ​ចំនួន​សម្រាប់​ចក្រភព​អង់គ្លេស​​​នឹង​ត្រូវ​ចេញផ្សាយ​ជា​មួយ​គ្នា​នៅ​ម៉ោង ៣​កន្លះ​ទៀប​ភ្លឺ​យប់​នេះ។ គេ​សង្កេត​ឃើញ​ថា ទាំង​​វិស័យ​ផលិតកម្ម និង​ឧស្សាហកម្ម​សុទ្ធតែ​​មាន​​កំណើន​ក្នុង​ឆ្នាំ​នេះ​ ។  

យ៉ាងណាមិញ​ជញ្ជីង​​ពាណិជ្ជកម្ម (Trade Balance) នៅ​តែ​មាន​បញ្ហា​នៅ​ឡើយ​ដោយ​ក្នុង​នោះ ការ​ធ្វើ​ពាណិជ្ជកម្ម​ជា​មួយ​បណ្តា​ប្រទេស​មិនមែន​​សមាជិក​អឺរ៉ុប​បាន​ធ្លាក់​ចុះ​​អស់​ចំនួន ៣,៨៤ ពាន់​លាន​ផោន។  នេះ​បញ្ជាក់​ថា សេដ្ឋកិច្ច​របស់​មហាអំណាច​មួយ​នេះ មាន​ភាព​​ប្រេះស្រាំ​​ក្រោយ​​បោះឆ្នោត​​ផ្តាច់​ខ្លួន​ចេញ​ពី​សហភាព​អឺរ៉ុប  ហើយ​ជា​លទ្ធផល​ធ្វើ​ឲ្យ​រូបិយប័ណ្ណ​ជាតិ​របស់​ខ្លួន​ស្ថិត​នៅ​ក្នុង​ភាព​ត្រដាបត្រដួស​ដូច​សព្វថ្ងៃ។

៣) របាយការណ៍​​កំណើន​អតិផរណា​របស់​អង់គ្លេស​​ (UK  Inflation Report)
ថ្ងៃ​ប្រកាស៖ ថ្ងៃ​ព្រហស្បតិ៍​ ទី១២ តុលា ​
ផល​ប៉ះពាល់​ដល់​ការ​ជួញដូរ GBP/USD, EUR/GB

អង់គ្លេស​មាន​អត្រា​អតិផរណា​ខ្ពស់​បំផុត​ក្នុង​ចំណោម​បណ្តា​ប្រទេស​សេដ្ឋកិច្ច​ធំ​ៗ ​​ទាំង ៧ របស់​​មហាអំណាច​សេដ្ឋកិច្ច G7។  អតិផរណា​បាន​កើន​ឡើង​ដល់​ ២,៩% កាល​ពី​ខែ​សីហា​​កន្លង​ទៅ​ធៀប​នឹង​​អត្រា​កំណើន​ ២,៦% ​កាល​ពី​ខែ​កក្កដា ដែល​នេះ​បាន​ធ្វើ​ឱ្យ​សន្ទស្សន៍​តម្លៃ​ទំនិញ​ប្រើប្រាស់​កើន​ឡើង​ខ្ពស់​មិន​ធ្លាប់​មាន​នៅ​​ក្នុង​រយៈពេល​ ៤ ឆ្នាំ​មក​នេះ​។ ការ​ពឹងផ្អែក​របស់​​ខ្លួន​លើ​ការ​នាំចូល គឺ​ស្ថិតនៅ​ពី​ក្រោយ​​នៃ​កំណើន​អតិផរណា​នេះ ខណៈ​ដែល​​​អ្នក​ប្រើប្រាស់​កាត់បន្ថយ​ការ​ចំណាយ​នៅ​ពេល​លុយ​ផោន​ធ្លាក់​ថ្លៃ​ក្រោយ​បោះឆ្នោត​ផ្តាច់​ខ្លួន​ចេញ​ពី​សហភាព​អឺរ៉ុប​។ 

ចាប់​តាំង​ពី​ការ​បោះឆ្នោត​ប្រជាមតិ​កាល​ពី​ពាក់​កណ្តាល​ឆ្នាំ ២០១៦​មក  លុយ​ផោន​នៅ​តែ​ធ្លាក់​ថ្លៃ​ទាប​ជាង​តម្លៃ​មុន​ការ​បោះឆ្នោត​ដល់​ទៅ ១០% ឯណោះ។ ដោយសារ​តែ​ធនាគារ​កណ្តាល​​នានា​ភាគច្រើន​មាន​បំណង​ចង់​ឲ្យ​​អត្រា​​អតិផរណា ស្ថិត​នៅ​ក្នុង​​អត្រា ២% សម្រាប់​ស្ថិរភាព​នៃ​កំណើន​សេដ្ឋកិច្ច   ធនាគារ​កណ្តាល​អង់គ្លេស​​ទំនង​អាច​នឹង​​ដំឡើង​អត្រា​ការប្រាក់​​ក្នុង​កិច្ច​ខិតខំ​ប្រឹងប្រែង​ដើម្បី​លើក​ស្ទួយ​​លុយ​ផោន​ឡើង​វិញ​។

៤) កំណត់ហេតុ​លើ​កិច្ចប្រជុំ​របស់​​​​ធនាគារ​កណ្តាល​អាមេរិក​​​ (FOMC Meeting Minutes)
ថ្ងៃ​ប្រកាស៖ ថ្ងៃ​ព្រហស្បតិ៍​ ទី១២ តុលា ​ម៉ោង ១:០០ នាទី​ទៀប​ភ្លឺ ​
ផល​ប៉ះពាល់​ដល់​ការ​ជួញដូរ EUR/USD, USD/JPY

​គ្មាន​អ្នកណាម្នាក់​រំពឹង​ថា នឹង​មាន​​ព័ត៌មាន​ដ៏​​ភ្ញាក់ផ្អើល​​មួយ​​​ចេញ​​ពី​សេចក្តី​ថ្លែង​ការណ៍​​នៃ​​កិច្ច​ប្រជុំ​​របស់​ធនាគារ​កណ្តាល​អាមេរិក​  (FOMC) នោះ​ទេ។  ប៉ុន្តែ​អ្វី​ដែល​អ្នក​ជួញដូរ​នឹង​​​ចាប់​អារម្មណ៍​នោះ គឺ​ការ​ផ្តល់​ភ្លើង​ខៀវ​របស់​ស្ថាប័ន​នេះ​សម្រាប់​ការ​ដំឡើង​អត្រា​ការប្រាក់​ដែល​គេ​រំពឹង​ទុក​ថា នឹង​ធ្វើ​ឡើង​នៅ​ពាក់​កណ្តាល​ខែ​ធ្នូ​ឆ្នាំ​នេះ។

៥) ទិន្នន័យ​ទំនុកចិត្ត​របស់​អ្នក​ប្រើប្រាស់​របស់​អូស្ត្រាលី ​(Consumer Confidence)
ថ្ងៃ​ប្រកាស៖ ថ្ងៃ​ព្រហស្បតិ៍​ ទី១២ តុលា ​ម៉ោង ៣:៣០ នាទី​ទៀប​ភ្លឺ ​
ផល​ប៉ះពាល់​ដល់​ការ​ជួញដូរ AUD/USD, AUD/NZD

ជាមួយ​នឹង​ការ​ធ្លាក់ចុះ​ទីផ្សារ​លក់រាយ​ការ​ងើបឡើង​វិញ​នៃ​សេដ្ឋកិច្ច​​របស់​អូស្ត្រាលី​នៅ​តែ​ហាក់​ដូច​ជា​​នៅ​ឆ្ងាយ​ជាង​អ្វី​ដែល​បាន​សង្ឃឹម​ទុក​។ ស្ថានភាព​​លក់រាយ​នៅ​ខែ សីហា​​កន្លង​ទៅ​បាន​ធ្លាក់​ចុះ​​អស់ ០,៦%  ខណៈ​ដែល​​ការ​រំពឹង​ទុក​ថា  ​វា​អាច​កើន​ឡើង ០៣%។  ចំណែក​ទំនុកចិត្ត​អ្នក​ប្រើប្រាស់​​វិញ​ កាល​ពី​ខែ​កញ្ញា​​បាន​ធ្លាក់​ចុះ​អស់ ២,៥% ធ្វើ​ឲ្យ​វា​ជា​ខែ​ទី១០ ​ដែល​​​ធ្លាក់​ចុះ​ជាប់ៗ​គ្នា  ទោះបីជា​វិស័យ​ការងារ​​មាន​លក្ខណៈ​ល្អ​ប្រសើរ​ជាង​មុន​​ក៏ដោយ។ 

៦)  ទិន្នន័យ​វិស័យ​ផលិតកម្ម​នៅ​ក្នុង​តំបន់​ចាយ​ប្រាក់​អឺរ៉ូ​ ​(ECB Industrial Production)
ថ្ងៃ​ប្រកាស៖ ថ្ងៃ​ព្រហស្បតិ៍​ ទី១៣ តុលា ​ម៉ោង ៥:០០ នាទី​​ព្រឹក​​
ផល​ប៉ះពាល់​ដល់​ការ​ជួញដូរ EUR/USD, EUR/GBP

​អគ្គនាយក​នៃ​គណៈកម្មការ​អឺរ៉ុប(Eurostat) នឹង​ចេញផ្សាយ​ទិន្នន័យ​វិស័យ​ផលិតកម្ម​នៅ​ក្នុង​តំបន់​ចាយ​ប្រាក់​អឺរ៉ូ​ទាំងមូល​សម្រាប់​ខែ​សីហា​កន្លង​ទៅ។ ទិន្នន័យ​កន្លង​មក បាន​បង្ហាញ​ថា វិស័យ​ផលិតកម្ម​ក្នុង​តំបន់​នេះ មាន​សញ្ញាណ​ល្អ ដែល​ជា​សញ្ញាណ​មួយ​​ជំរុញ​ឲ្យ​មាន​កំណើន​អតិផរណា និង​ផ្តល់​ក្តី​សង្ឃឹម​ឲ្យ​​ធនាគារ​កណ្តាល​អឺរ៉ុប​ដំឡើង​អត្រា​ការប្រាក់​នៅ​ពេល​ខាងមុខ៕

ប្រភព៖ cnbc