ទីផ្សារមាសនៅបន្តឡើងថ្លៃទៀតថ្ងៃនេះ

ទីផ្សារជួញដូរមាសនៅព្រឹកនេះត្រូវបានគេមើល ឃើញថា នៅបន្តឡើងថ្លៃទៀតពីតម្លៃជួញដូរទាបបំផុតមិនធ្លាប់មានកាលពីសប្តាហ៍ មុន ខណៈដែលហាងឆេងប្រាក់ដុល្លារនៅទ្រឹង ជាមួយនឹងការរំពឹងទុកលើការដំឡើងអត្រាការប្រាក់របស់ធនាគារកណ្តាល បន្ទាប់ពីវាបានធ្លាក់ថ្លៃកាលពីយប់មិញ។

ការជួញដូរមាសតាមស្បត (Spot Gold) បានឡើងថ្លៃ ០,២% ត្រូវបានជួញដូរក្នុងតម្លៃ ១ ២៨៦,៤២ ដុល្លារក្នុងមួយអោននៅ ម៉ោង ៩ ព្រឹកនេះ ពោលគឺបានឡើងថ្លៃដល់តម្លៃជួញដូរដូចកាលពីថ្ងៃទី ២៩ កញ្ញាកន្លងទៅ។ ចំណែកទីផ្សារមាសរបស់អាមេរិកវិញ បានឡើងថ្លៃ ០,៣% ត្រូវបានជួញដូរក្នុងតម្លៃ ១ ២៨៨,៩០ ដុល្លារក្នុងមួយអោន។

នៅថ្ងៃនេះ ទីផ្សារប្រាក់ដុល្លារ បានបញ្ឈប់ការធ្លាក់ថ្លៃមិនដូចកាលពីយប់មិញដែលមិនធ្លាប់មាននៅក្នុងរយៈពេល ១០ សប្តាហ៍កន្លងទៅ។ នេះក៏ដោយសារតែទទួលបានការគាំទ្រពីការរំពឹងទុកលើកំណើនសេដ្ឋកិច្ចអាមេរិកដែលអាចជំរុញឱ្យធនាគារកណ្តាលរបស់ខ្លួនធ្វើការដំឡើងអត្រាការប្រាក់នៅចុងឆ្នាំនេះ។

ទីផ្សារមាសបានឡើងថ្លៃនៅសប្តាហ៍នេះ ដោយសារតែប្រាក់ដុល្លារមានសម្ពាធធៀបទៅនឹងប្រាក់អឺរ៉ូបដែលបានងើបឡើងថ្លៃវិញ បន្ទាប់ពីទិន្នន័យផលិតកម្មក្នុងវិស័យឧស្សាហកម្មរបស់អាល្លឺម៉ង់ បានបង្ហាញក្នុងសញ្ញាណមួយល្អបំផុតមិនធ្លាប់មាននៅក្នុងរយៈពេលជាង៦ ឆ្នាំកន្លងមកនេះសម្រាប់ខែសីហាកន្លងទៅ។ ក្រៅពីនេះ ប្រាក់ដុល្លារទទួលរងផលប៉ះពាល់ពីភាពតានតឹងឡើងវិញនៃភូមិសាស្ត្រនយោបាយក្នុងឧបទ្វីបកូរ៉េ។

ក្រៅពីនេះម្យ៉ាងទៀត ការអំពាវនាវពីលោក Sabine Lautenschlaeger សមាជិកក្រុមប្រឹក្សាភិបាលធនាគារកណ្តាលអឺរ៉ុបមួយរូបដើម្បីរារាំងកុំឲ្យស្ថាប័ននេះទិញមូលបត្របំណុលបន្ថែមទៀតនៅក្នុងឆ្នាំ ២០១៨ ខាងមុខ ក៏បានជួយឲ្យប្រាក់អឺរ៉ូឡើងថ្លៃដែរ។

ចំណែកក្រុមមន្ត្រីរដ្ឋាភិបាលអាល្លឺម៉ង់បានលើកឡើងកាលពីថ្ងៃចន្ទម្សិលមិញថា មូលនិធិរូបិយវត្ថុអន្ដរជាតិ (IMF) ទំនង ជា នឹង បង្កើន ការ ព្យាករណ៍លើកំណើនសេដ្ឋកិច្ចរបស់ខ្លួននៅសប្តាហ៍នេះ។ នេះ មានន័យថា វា គឺជាពេលវេលាដ៏ល្អបំផុតមួយសម្រាប់អ្នកបង្កើតគោលនយោបាយរបស់ខ្លួនត្រលប់មកពង្រឹងរូបិយប័ណ្ណជាតិដែលទន់ខ្សោយឲ្យរឹងមាំ ឡើងវិញ។

នៅអង់គ្លេសវិញ ការចំណាយរបស់ពលរដ្ឋរបស់ខ្លួនត្រូវបានគេមើល ឃើញថា បានកើនឡើងនៅក្នុងខែកញ្ញាកន្លងទៅ។ ប៉ុន្តែនេះមិនទាន់គ្រប់គ្រាន់នោះឡើយដើម្បីបញ្ឈប់ការធ្លាក់ចុះពីមួយឆ្នាំទៅមួយឆ្នាំនៃកំណើនសេដ្ឋកិច្ចរបស់ខ្លួនដែលបានជះឥទ្ធិពលដល់ការចំណាយកាន់តែច្រើនឡើងរបស់ប្រជាជននៅពេលកន្លងមក៕

ប្រភព៖ cnbc