Friday, October 6, 2017

Home Financial News ខណៈទីផ្សារប្រាក់ដុល្លារឡើងថ្លៃ ទីផ្សារមាសនៅទ្រឹងងើបទៅមុខមិនរួច

ខណៈទីផ្សារប្រាក់ដុល្លារឡើងថ្លៃ ទីផ្សារមាសនៅទ្រឹងងើបទៅមុខមិនរួច

ទីផ្សារជួញដូរមាសនៅថ្ងៃសុក្រចុងក្រោយនេះ ហាក់មិនមានការប្រែប្រួលខ្លាំងនោះឡើយបន្ទាប់ពីបានធ្លាក់ថ្លៃខ្លាំងកាលពីយប់មិញ ខណៈដែលទីផ្សារប្រាក់ដុល្លារស្ទុះងើបឡើងវិញនៅមុនពេលរបាយការណ៍ការងាររបស់អាមេរិកចេញផ្សាយនៅយប់នេះ។

តម្លៃជួញដូរមាសតាមស្បតមានការប្រែប្រួលតិចតួច ស្ថិតនៅទីតាំងតម្លៃ ១ ២៦៨,៥២ ដុល្លារក្នុងមួយអោននៅម៉ោង ៩ ព្រឹកកន្លងទៅ។ កាលពីយប់មិញ វាបានធ្លាក់ថ្លៃម្តងរួចមកហើយអស់ ០,៥%។ ចំណែកទីផ្សារមាសរបស់អាមេរិកវិញ បានធ្លាក់ថ្លៃដែរអស់ចំនួន ០,២% ត្រូវបានជួញដូរក្នុងតម្លៃ ១ ២៧០,៩០ ដុល្លារក្នុងមួយអោន។

នៅថ្ងៃនេះ ពោលគឺមុនពេលរបាយការណ៍ការងាររបស់អាមេរិកចេញផ្សាយ ការជួញដូរនៅលើផ្សារភាគហ៊ុនអាស៊ី និងទីផ្សារបានឡើងថ្លៃរួចទៅហើយ។ ក្តីសង្ឃឹមនៃការអនុម័តកម្មវិធីកំណែទម្រង់ពន្ធដារ និងភាពធូរស្រាលឡើងវិញនៃព្យុះ Harvey និងព្យុះ Irma បានជួយឲ្យស្ថានភាពជួញដូរនៅលើទីផ្សារមានភាពប្រក្រតីឡើងវិញ។

យ៉ាងណាមិញ សេដ្ឋកិច្ចអាមេរិកអាចមានកំណើនទាបត្រឹម ១,៥% នៅក្នុងឆ្នាំនេះ នេះបើយោងតាមការលើកឡើងរបស់លោក John Williams ប្រមុខធនាគារកណ្តាលអាមេរិកមកពីទីក្រុង San Francisco កាលពីថ្ងៃព្រហស្បតិ៍ម្សិលមិញ។ ការធ្លាក់ចុះនេះគឺដោយសារតែផលប៉ះពាល់ពីព្យុះធំៗចំនួនពីរកាលពីខែកញ្ញាកន្លងទៅដែលជាផលវិបាកមួយធ្វើឲ្យលោក Trump មានការលំបាកក្នុងកម្មវិធីអភិវឌ្ឍសេដ្ឋកិច្ចរបស់លោក និង ការសម្រេចចិត្តនៃការដំឡើងអត្រាការប្រាក់របស់ធនាគារកណ្តាល។

នៅថ្ងៃនេះ អ្នកជួញដូរនៅលើទីផ្សារអន្តរជាតិកំពុងទន្ទឹងរង់ចាំលើរបាយការណ៍ការងាររបស់អាមេរិកប្រចាំខែកញ្ញាកន្លងទៅ។ ទិន្នន័យបឋមនានាបានលើកឡើងថា កំណើនការងារនឹងធ្លាក់ចុះដោយសារតែផលប៉ះពាល់ពីព្យុះធំៗចំនួនពីរគឺព្យុះ Harvey និងព្យុះ Irma។ យោងតាមការស្ទង់មតិរបស់សារព័ត៌មាន Reutersកំណើនការងារអាមេរិកអាចមានចំនួនត្រឹម ៩០ ០០០ កន្លែងសម្រាប់ខែកញ្ញាកន្លងទៅ ខណៈកាលពីខែសីហាវាបានកើនឡើងដល់ ១៥៦ ០០០ កន្លែង៕

ប្រភព៖ cnbc