Friday, October 6, 2017

Home Financial News ដុល្លារឡើងថ្លៃដល់តម្លៃខ្ពស់បំផុតមិនធ្លាប់មាននៅក្នុងរយៈពេល៧សប្តាហ៍កន្លងទៅនេះ

ដុល្លារឡើងថ្លៃដល់តម្លៃខ្ពស់បំផុតមិនធ្លាប់មាននៅក្នុងរយៈពេល៧សប្តាហ៍កន្លងទៅនេះ

ការជួញដូរប្រាក់ដុល្លារនៅថ្ងៃនេះបានស្គាល់រសជាតិឡើងថ្លៃដល់តម្លៃខ្ពស់បំផុតមិន ធ្លាប់មាននៅក្នុងរយៈពេល៧សប្តាហ៍កន្លងទៅ នៅមុនពេលរបាយការណ៍ការងារប្រចាំខែកញ្ញាត្រូវបានចេញផ្សាយនៅយប់នេះ ជាមួយនឹងក្តីសង្ឃឹមលើការវិវត្តទៅមុខនៃកម្មវិធីពន្ធដារថ្មី។

ការជួញដូរចុងក្រោយបានបង្ហាញថា សន្ទស្សន៍ជួញដូរប្រាក់ដុល្លារគោលធៀបទៅនឹងរូបិយប័ណ្ណសំខាន់ៗចំនួន៦ ត្រូវបានជួញដូរក្នុងទីតាំងតម្លៃ ៩៣,៩៥៥។ យ៉ាងណាក៏ដោយ នៅថ្ងៃសុក្រនេះវាបានហក់ដល់ទីតាំងតម្លៃ ៩៤,០១៦ ដែលជាតម្លៃជួញដូរខ្ពស់បំផុតមិនធ្លាប់មានគិតចាប់តាំងពីថ្ងៃទី ១៧ សីហាមក។

ធៀបទៅនឹងលុយយ៉េន ប្រាក់ដុល្លារបានឡើងថ្លៃ ០,១% ស្ថិតក្នុងតម្លៃជួញដូរ ១១២,៨៩ យ៉េនក្នុងមួយដុល្លារ។ ធៀបទៅនឹងលុយអឺរ៉ូវិញ វាហាក់មិនមានការប្រែប្រួលខ្លាំងនោះទេ ដោយត្រូវបានជួញដូរត្រឹមតម្លៃ ១,១៧០៨ ដុល្លារ បន្ទាប់ពីត្រូវបានជួញដូរក្នុងតម្លៃ ១,១៦៩៥៥ ដុល្លារម្តងរួចមកហើយកាលពីថ្ងៃអង្គារ ដែលជាតម្លៃជួញដូរទាបបំផុតមិនធ្លាប់មានគិតចាប់តាំងពី ខែសីហាមក។

ងាកមកមើលលុយផោនអង់គ្លេសវិញនៅតែមានសម្ពាធ និងធ្លាក់ថ្លៃដល់តម្លៃទាបបំផុតមិនធ្លាប់មាននៅក្នុងរយៈពេល៤សប្តាហ៍កន្លងទៅនៅថ្ងៃសុក្រនេះ។ ការធ្លាក់ថ្លៃដោយសារតែមានភាពចម្រូងចម្រាសនៅក្នុងក្បាលម៉ាស៊ីនដឹកនាំក្នុងជូរនយោបាយរបស់ប្រទេសនេះ ខណៈដែលការចរចាចាកចេញពីសហភាពអឺរ៉ុបនៅតែបន្តជាបញ្ហានៅឡើយ។

នៅព្រឹកនេះ លុយផោនធ្លាក់ថ្លៃអស់ ០,២% ត្រូវបានជួញដូរក្នុងតម្លៃ ១,៣០៩៩ ដុល្លារ។ នៅព្រឹកនេះវាបានធ្លាក់ថ្លៃម្តងដែរទៅកាន់តម្លៃ ១,៣០៨៨ ដែលជាតម្លៃជួញដូរទាបបំផុតមិនធ្លាប់មានគិតចាប់តាំងពីថ្ងៃទី ៧ កញ្ញាមក និងបានធ្លាក់ថ្លៃសរុបអស់ ២,២% នៅ ក្នុងសប្តាហ៍នេះ ដែលជាសប្តាហ៍ជួញដូរធ្លាក់ថ្លៃដ៏ច្រើនបំផុតមិនធ្លាប់មានគិតចាប់តាំងពីខែតុលាឆ្នាំ ២០១៦មក។

ងាកទៅមើលនយោបាយអាមេរិក កាលពីថ្ងៃព្រហស្បតិ៍ម្សិលមិញ សមាជិកសភាគណបក្សសាធារណរដ្ឋបានបង្ហាញជំហានផ្លាស់ប្ដូរមួយដើម្បីពន្លឿនលើក្រមស្ដីពីកំណែទម្រង់ពន្ធដារថ្មី និងទទួលបានការអនុម័តយល់ព្រមរួចមកហើយពីសមាជិកសភាមកពីគណបក្សសាធារណៈរដ្ឋនេះ។ លទ្ធផលនេះ នាំឲ្យមានក្តីសង្ឃឹមសម្រាប់អនាគតដឹកនាំរបស់លោក Trump ដែលតែងតែទាមទារចង់បានជាយូរណាស់មកហើយ។

ចំពោះទីផ្សារប្រាក់ដុល្លារបានទាក់ទាញការគាំទ្របន្ថែមទៀតនៅលើទីផ្សារជួញដូរបន្ទាប់ពីទិន្នន័យបានចេញផ្សាយកាលពីថ្ងៃព្រហស្បតិ៍ម្សិលមិញដែលបានបង្ហាញថា ការបញ្ជាទិញទំនិញសំខាន់ៗរបស់អាមេរិកនៅក្នុងខែសីហា គឺល្អប្រសើរជាងការព្យាករណ៍។ នេះមានន័យថា ក្រោយមានព្យុះ Harvey និង Irma ការជួសជុលឡើងវិញនូវអាជីវកម្ម និងប្រព័ន្ធហេដ្ឋារចនាសម្ព័ន្ធនឹងជួយឲ្យមានតម្រូវការការងារ និងបង្កើនការចំណាយ។

នៅថ្ងៃនេះ អ្នកជួញដូរនៅលើទីផ្សារអន្តរជាតិកំពុងទន្ទឹងរង់ចាំលើរបាយការណ៍ការងាររបស់អាមេរិកប្រចាំខែកញ្ញាកន្លងទៅ។ ទិន្នន័យបឋមនានាបានលើកឡើងថា កំណើនការងារនឹងធ្លាក់ចុះដោយសារតែផលប៉ះពាល់ពីព្យុះធំៗចំនួនពីរគឺព្យុះ Harvey និងព្យុះ Irma។ យោងតាមការស្ទង់មតិរបស់សារព័ត៌មាន Reutersកំណើនការងារអាមេរិកអាចមានចំនួនត្រឹម ៩០ ០០០ កន្លែងសម្រាប់ខែកញ្ញាកន្លងទៅ ខណៈកាលពីខែសីហាវាបានកើនឡើងដល់ ១៥៦ ០០០ កន្លែង៕

ប្រភព៖ cnbc