Wednesday, October 18, 2017

Home Financial News ដុល្លារឡើងថ្លៃជាថ្មីទៀត ខណៈអ្នកជួញដូរកំពុងរង់ចាំមើលការជ្រើសរើសអនាគតប្រមុខធនាគារកណ្តាលអាមេរិក

ដុល្លារឡើងថ្លៃជាថ្មីទៀត ខណៈអ្នកជួញដូរកំពុងរង់ចាំមើលការជ្រើសរើសអនាគតប្រមុខធនាគារកណ្តាលអាមេរិក

ការជួញដូរប្រាក់ដុល្លារធៀបទៅនឹងគូររូបិយប័ណ្ណសំខាន់ៗចំនួន៦ ត្រូវបានគេមើលឃើញថា បានឡើងថ្លៃនៅព្រឹកថ្ងៃពុធនេះ ខណៈដែលអ្នកជួញដូរនៅលើទីផ្សារអន្តរជាតិកំពុងសម្លឹងមើលពីលទ្ធភាពដែលប្រធានាធិបតីអាមេរិកDonald Trump នឹងជ្រើសរើសប្រធានធនាគារកណ្តាលថ្មីជំនួសលោកស្រី Janet Yellen។

នៅព្រឹកនេះ សន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណសំខាន់ៗ បានត្រឡប់ឡើងថ្លៃមកកាន់ទីតាំងតម្លៃ ៩៣,៤៧៥ វិញ ពីតម្លៃធ្លាក់ថ្លៃ ៩២,៧៤៩ កាលពីថ្ងៃសុក្រចុងសប្តាហ៍មុន។ ការឡើងថ្លៃជាថ្មីនេះ បានកើតមានឡើងបន្ទាប់ពីវាបានឡើងថ្លៃ ខ្ពស់ម្តងរួចមកហើយកាលពីម្សិលមិញដែលបានហក់ឡើងដល់ ៩៣៧២៩។

ជាមួយនឹងការរំពឹងទុកថា ធនាគារកណ្តាលអាមេរិកនឹងដំឡើងអត្រាការប្រាក់ជាលើកទីបីនៅខែធ្នូចុងឆ្នាំ នេះ អ្នកជួញដូរនៅលើទីផ្សារឃ្លាំមើលថា តើនរណានឹងក្លាយជាប្រមុខធនាគារកណ្តាលអាមេរិកថ្មីមកដឹកនាំជំនួសលោក Yellen ដែលបានផុតអាណត្តិនៅក្នុងខែ កុម្ភៈ ឆ្នាំ ២០១៨ ខាងមុខ។ លោក Trump បានជ្រើសរើសបេក្ខភាព៥រូបរួចហើយ ហើយគេរំពឹងថា លោកនឹងអាចប្រកាសពីប្រធានធនាគារកណ្តាលថ្មី នេះនៅមុនដំណើរទស្សនកិច្ចរបស់លោកទៅ កាន់តំបន់អាស៊ីនៅដើមខែក្រោយនេះ។

ប្រាក់ដុល្លារបានឡើងថ្លៃនៅសប្តាហ៍នេះ បន្ទាប់ពីទទួលបានព័ត៌មានថា លោក John Taylor ជាសេដ្ឋវិទូមកពីសាកលវិទ្យាល័យ Stanford ក៏បានក្លាយជាបេក្ខភាពដ៏សំខាន់នៅក្នុងចំណោមបេក្ខភាព៥រូបដែលត្រូវបានជ្រើសរើសនេះ។ លោក ត្រូវបានគេស្គាល់ថា ជាអ្នកគាំទ្រគោលនយោបាយរូបិយវត្ថុដ៏សំខាន់មួយរូប ហើយយោងតាមរូបមន្តរបស់លោកដែលត្រូវបានគេស្គាល់ថា ច្បាប់គ្រប់គ្រងរបស់លោក Taylor គឺថា អត្រាប្រាក់របស់ធនាគារកណ្តាលត្រូវតែខ្ពស់ជាងគោលដៅអត្រាការប្រាក់បច្ចុប្បន្ន។

នេះជាមូលដ្ឋានដ៏សំខាន់ធ្វើឲ្យអ្នកជួញដូរគិតថា ធនាគារកណ្តាលនឹងដំឡើងអត្រាការប្រាក់នៅពេលឆាប់ៗខាងមុខ។ ធៀបទៅនឹងលុយអឺរ៉ូ ដុល្លារឡើងថ្លៃបន្តិច ត្រូវបានជួញដូរក្នុងតម្លៃ ១,១៧៧០ ដុល្លារ ពោលគឺបានប្រែប្រួលបន្តិចបន្តួចនៅពេលចាប់ផ្តើមជួញដូរក្នុងទីផ្សារអាស៊ី។ ប៉ុន្តែ សម្រាប់ប្រាក់អឺរ៉ូវិញ បានធ្លាក់ថ្លៃអស់ ០,៥% គិតចាប់តាំងពីដើមសប្តាហ៍នេះ។

ធៀបទៅនឹងលុយយ៉េនវិញ ប្រាក់ដុល្លារក៏មិនទាន់មានការប្រែប្រួលខ្លាំងនោះដែរ ខណៈដែលអ្នកជួញដូរនៅតែមានការព្រួយបារម្ភទៅនឹងព្រឹត្តិការណ៍បោះឆ្នោតជាតិរបស់ជប៉ុនដែលនឹងធ្វើឡើងនៅថ្ងៃអាទិត្យនេះ។ ទោះបីជាគណបក្សកាន់អំណាចរបស់លោកនាយករដ្ឋមន្ត្រី Shinzo Abeត្រូវគេរំពឹងថា នឹងរក្សាសំឡេងភាគច្រើននៅក្នុងសភាក៏ដោយ ក៏ព្រឹត្តិការណ៍នយោបាយនៅក្នុងចក្រភពអង់គ្លេស និងតំបន់ផ្សេងទៀតបានធ្វើឱ្យអ្នកជួញដូរមានការប្រុងប្រយ័ត្ន៕

ប្រភព៖ cnbc