Tuesday, October 3, 2017

Home Financial News មាសបន្តធ្លាក់ថ្លៃកាន់តែខ្លាំងទៀតថ្ងៃនេះ ខណៈដែលទីផ្សារប្រាក់ដុល្លារងើបឡើងវិញ

មាសបន្តធ្លាក់ថ្លៃកាន់តែខ្លាំងទៀតថ្ងៃនេះ ខណៈដែលទីផ្សារប្រាក់ដុល្លារងើបឡើងវិញ

ខណៈដែលទីផ្សារប្រាក់ដុល្លារកំពុងងើបឡើងថ្លៃវិញ ការជួញដូរមាសនៅលើទីផ្សារអន្តរជាតិវិញ បានបន្តធ្លាក់ថ្លៃខ្លាំងទៀតនៅថ្ងៃនេះជាមួយនឹងសញ្ញាណល្អនៃវិស័យផលិតកម្មរបស់អាមេរិក និងការកើនឡើងអត្រាការប្រាក់លើមូលបត្របំណុលរបស់អាមេរិក។

តម្លៃជួញដូរមាសតាមស្បត (Spot Gold) បានធ្លាក់ថ្លៃអស់ ០,១% ត្រូវបានជួញដូរក្នុងតម្លៃ ១ ២៦៩,៥០ ដុល្លារក្នុងមួយអោននៅម៉ោង ៩ ព្រឹកនេះ បន្ទាប់ពីបានធ្លាក់ថ្លៃដល់តម្លៃទាបបំផុតមួយគឺ ១ ២៦៨,៦០ ដុល្លារក្នុងមួយអោនម្តងរួចមកហើយកាលម្សិលមិញ។ តម្លៃធ្លាក់ថ្លៃ នេះ គឺជាតម្លៃជួញដូរទាបបំផុតមួយមិនធ្លាប់មានគិតចាប់តាំងពីពាក់កណ្តាលខែសីហាមក។ ចំណែកទីផ្សារមាសរបស់អាមេរិកបានធ្លាក់ថ្លៃអស់ ០,៣% ត្រូវបានជួញដូរក្នុងតម្លៃ ១ ២៧២,៥០ ដុល្លារក្នុងមួយអោន។

នៅថ្ងៃនេះសន្ទស្សន៍ជួញដូរប្រាក់ដុល្លារបានឡើងថ្លៃ ០,៦២% ធៀបទៅនឹងប្រាក់អឺរ៉ូ ដែលវាត្រូវបានជួញដូរក្នុងតម្លៃ ១,១៧៣៩ ដុល្លារ។ បើធៀបទៅនឹងលុយយ៉េនវិញ ប្រាក់ដុល្លារឡើងថ្លៃបាន ០,១៨% ត្រូវបានជួញដូរក្នុងតម្លៃ ១១២,៦៧ យ៉េនក្នុងមួយដុល្លារ។ ធៀបទៅនឹងរូបិយប័ណ្ណនានា សន្ទស្សន៍ជួញដូរប្រាក់ដុល្លារបានឡើងថ្លៃបាន ០,៣%។

ទិន្នន័យផលិតរបស់អាមេរិកត្រូវបានគេបញ្ចេញឲ្យដឹងថា វាមានកំណើនខ្ពស់មិនធ្លាប់មាននៅក្នុងរយៈពេល១៣ឆ្នាំកន្លងមកនេះ ខណៈដែលឥទ្ធិពលព្យុះ Harvey និង Irma បានធ្វើឲ្យប៉ះពាល់ក្នុងរយៈពេលយូរដល់សេដ្ឋកិច្ចអាមេរិកនៅក្នុងត្រីមាសទី៣ឆ្នាំនេះ។

យោងតាមមន្ត្រីសេតវិមានវិញ កាលពីថ្ងៃម្សិលមិញខ្លួនបានច្រានចោលការចរចាជាមួយកូរ៉េខាងជើងលើកលែងតែការចរចាស្តីពីជោគវាសនារបស់ប្រជាជនអាមេរិកដែលត្រូវបានឃុំខ្លួននៅទីនោះ ព្រមទាំងមានការលេចឡើងនូវការរិះគន់ទៅដល់លោក Rex Tillerson រដ្ឋមន្ត្រីការបរទេសដែលបង្ហាញពីបំណងរបស់រដ្ឋាភិបាលទីក្រុងវ៉ាស៊ីនតោនក្នុងការចរចាជាមួយកូរ៉េខាងជើងលើកម្មវិធីផលិតអាវុធនុយក្លេអ៊ែរ។

ងាកទៅមើលធនាគារកណ្តាលអាមេរិកវិញ ស្ថាប័ននេះកំពុងស្ថិតនៅតាមឃ្លាំមើលយ៉ាងយកចិត្តទុកដាក់ថា ខ្លួននឹងដំឡើងអត្រាការប្រាក់ឬយ៉ាងណានៅខែធ្នូចុងឆ្នាំនេះ។ ភាពស្ទាក់ស្ទើររបស់ធនាគារកណ្តាលនៅតែកើតមានឡើង ដោយសារតែបញ្ហាកំណើនអតិផរណានៅតែចោទឡើងនៅឡើយ បើទោះបីជាស្ថានភាពវិស័យផលិតកម្មមានកំណើនកាលពីខែកញ្ញាក៏ដោយ៕

ប្រភព៖ cnbc