Thursday, October 5, 2017

Home Financial News មាសមានសញ្ញាណល្អបន្តិចក្រោយធ្លាក់ថ្លៃខ្លាំងប៉ុន្មានថ្ងៃជាប់ៗគ្នា

មាសមានសញ្ញាណល្អបន្តិចក្រោយធ្លាក់ថ្លៃខ្លាំងប៉ុន្មានថ្ងៃជាប់ៗគ្នា

ការជួញដូរមាសនៅព្រឹកថ្ងៃព្រហស្បតិ៍នេះត្រូវបានគេមើលឃើញថា មានសញ្ញាណវិជ្ជមានបន្តិចក្រោយធ្លាក់ថ្លៃខ្លាំងមិនធ្លាប់មាននៅក្នុងរយៈពេល៧ សប្តាហ៍កន្លងទៅតាំងពីដើមសប្តាហ៍នេះ ខណៈដែលទីផ្សារប្រាក់ដុល្លារបានស្ងប់ស្ងាត់ឡើងវិញធៀបទៅនឹងរូបិយប័ណ្ណនានា។

ទីផ្សារជួញដូរមាសតាម (Spot Gold) បានឡើងថ្លៃ ០,៣% ត្រូវបានជួញដូរក្នុងតម្លៃ ១ ២៧៥,១០ ដុល្លារក្នុងមួយអោន នៅម៉ោង ៩ ព្រឹកនេះ បន្ទាប់ពីវាបានធ្លាក់ថ្លៃដល់តម្លៃទាបបំផុតមិនធ្លាប់មានគិតចាប់តាំងពីពាក់កណ្តាលខែសីហាមក ពោលគឺ ១ ២៦៧,៧៦ ដុល្លារក្នុងមួយអោនកាលពីថ្ងៃអង្គារកន្លងទៅ។ រីឯទីផ្សារមាសរបស់អាមេរិកវិញ បានឡើងថ្លៃ ០,៣% ដែរ ត្រូវបានជួញដូរក្នុងតម្លៃ ១ ២៧៨ ដុល្លារក្នុងមួយអោន។

ទីផ្សារមាសបានចាប់ផ្តើមធ្លាក់ថ្លៃនៅថ្ងៃទី ៩ កញ្ញា ក្រោយទីផ្សារសន្ទស្សន៍ជួញដូរប្រាក់ដុល្លារធៀបទៅនឹងរូបិយប័ណ្ណនានា បានធ្លាក់ថ្លៃដល់តម្លៃ ៩១។ តម្លៃនេះក៏ជាតម្លៃចុងក្រោយផងដែរនៃប្រាក់ដុល្លារដែលត្រូវបានជួញដូរទាបបំផុតមិនធ្លាប់មានគិតចាប់តាំងពីចុងឆ្នាំ ២០១៦។

មូលហេតុដែលមាសធ្លាក់ថ្លៃនៅសប្តាហ៍ចុងក្រោយនេះគឺដោយសារតែស្ថានភាពនយោបាយអាមេរិកមានការវិវត្តល្អបន្តិច ព្រមទាំងភាពស្ងប់ស្ងាត់ទៅវិញនៃជម្លោះនយោបាយនៅលើឧបទ្វីបកូរ៉េ។ ម្យ៉ាងទៀតសារចុងក្រោយរបស់ធនាគារកណ្តាលដែលហាក់មានបំណងចង់ដំឡើងអត្រាការប្រាក់នៅចុងឆ្នាំនេះ សុទ្ធតែបានជួយជ្រោមជ្រែងប្រាក់ដុល្លារឲ្យឡើងថ្លៃវិញ ដែលជាមូលហេតុធ្វើឲ្យទីផ្សារមាសដាំក្បាលចុះជាបន្តបន្ទាប់តែម្តង៕

ប្រភព៖ cnbc