Wednesday, October 11, 2017

Home Financial News ថ្ងៃនេះ ទីផ្សារមាសប្រែប្រួលបន្តិចបន្តួចក្រោយឡើងថ្លៃខ្ពស់កាលពីយប់មិញ

ថ្ងៃនេះ ទីផ្សារមាសប្រែប្រួលបន្តិចបន្តួចក្រោយឡើងថ្លៃខ្ពស់កាលពីយប់មិញ

ទីផ្សារជួញដូរមាសនៅព្រឹកថ្ងៃពុធនេះមានការប្រែប្រួលបន្តិចបន្តួចតែប៉ុណ្ណោះ បន្ទាប់ពីបានហក់ឡើងថ្លៃ ខ្ពស់បំផុតមិនធ្លាប់មាននៅក្នុងរយៈពេល២សប្តាហ៍កន្លងទៅកាលពីម្សិលមិញ នៅពេលដែលទីផ្សារប្រាក់ដុល្លារធ្លាក់ថ្លៃ វិញ ជុំវិញវិបត្តិមួយចំនួននៅអាមេរិក។

ទីផ្សារជួញដូរមាសតាមស្បតបានឡើងថ្លៃបន្តិចបន្តួចត្រឹម ០,២% ប៉ុណ្ណោះ ត្រូវបាន ជួញដូរក្នុងតម្លៃ ១ ២៩០,៥៦ ដុល្លារនៅម៉ោង ៩ព្រឹកកន្លងទៅបន្ទាប់ពីបានឡើងថ្លៃដល់តម្លៃខ្ពស់បំផុតមិនធ្លាប់គិតចាប់តាំងពីថ្ងៃ ទី ២៧ កញ្ញាមកកាលពីយប់មិញ។ ចំណែក ទីផ្សារមាសរបស់អាមេរិកវិញ ក៏មិនមានការប្រែប្រួលគួរឲ្យកត់សម្គាល់នោះដែរ ដោយត្រូវបានជួញដូរក្នុងតម្លៃ ១ ២៩៣ ដុល្លារក្នុងមួយអោន។

ការឡើងថ្លៃនៃទីផ្សារមាសនេះ គឺកើតមានឡើងស្របពេលដែលទីផ្សារជួញដូរប្រាក់ដុល្លារនៅព្រឹកនេះត្រូវបានគេមើលឃើញថា បានធ្លាក់ថ្លៃជាថ្មីទៀតពីតម្លៃជួញដូរឡើងថ្លៃមិនធ្លាប់មាននៅក្នុងរយៈពេល១០សប្តាហ៍កន្លងទៅ។ នេះបណ្តាលមកពីមានភាពមន្ទិលសង្ស័យទៅនឹងការបរាជ័យនៃគោលនយោបាយពន្ធដាររបស់លោក Trump និងការឡើងថ្លៃនៃប្រាក់អឺរ៉ូបានដាក់សម្ពាធបន្ថែមទៀតដល់ប្រាក់ដុល្លារ។

ងាកមកមើលស្ថានភាពនយោបាយអន្តរជាតិវិញ សារព័ត៌មាន Yonhap របស់កូរ៉េខាងត្បូងបានរាយការណ៍ថា ក្រុម Hacker របស់ប្រទេសកូរ៉េខាងជើងទើបបានលួចយកឯកសារសម្ងាត់ រួមទាំងយុទ្ធសាស្ត្រកងទ័ពអាមេរិក និងកូរ៉េខាងត្បូងបានមួយចំនួនធំ។ ឯកសារដែលកូរ៉េខាងជើងយកបានមានដូចជា គម្រោងការនៃការបញ្ឆេះភ្លើងសង្គ្រាមសាជាថ្មីនៅឧបទ្វីបកូរ៉េ ដែលអាមេរិកនៅពីក្រោយ រួមជាមួយនឹងយុទ្ធសាស្ត្រសំខាន់បំផុតក្នុងការធ្វើឃាតមេដឹកនាំកូរ៉េខាងជើង លោក គីម ជុងអ៊ុន។

នៅតំបន់អឺរ៉ុបកាលពីថ្ងៃអង្គារម្សិលមិញ មេដឹកនាំតំបន់ Catalonia របស់អេស្ប៉ាញដែលបានបោះឆ្នោតទាមទារផ្តាច់ខ្លួននៅពេលកន្លងទៅថ្មីៗនេះបានប្រកាសជាផ្លូវការពីឯករាជ្យភាពរបស់ខ្លួនចេញពីប្រទេសអេស្ប៉ាញ។ យ៉ាងណាក៏ដោយ លោកបានអំពាវនាវឱ្យមានកិច្ចពិភាក្សាជាមួយរដ្ឋាភិបាលទីក្រុងម៉ាឌ្រីដអំពីអនាគតជោគវាសនារបស់តំបន់នេះនៅក្នុងកាយវិការមួយដែលត្រូវបានគេមើលឃើញថា ជាការកាត់បន្ថយភាពតានតឹងនៅក្នុងតំបន់។

នៅអាល្លឺម៉ង់ឯណោះ ប្រភពមួយបានប្រាប់ទៅកាន់សារព័ត៌មាន Reuters កាលពីថ្ងៃអង្គារម្សិលមិញថា រដ្ឋាភិបាលអាល្លឺម៉ង់នឹងបង្កើនការព្យាករណ៍ពីកំណើនសេដ្ឋកិច្ចនៅក្នុងតំបន់អឺរ៉ុបក្នុងអត្រា២% សម្រាប់ឆ្នាំ ២០១៧នេះ។ ការព្យាករណ៍នេះ ខ្ពស់ជាងការព្យាករណ៍មុនៗដែលថា វាអាចមានកំណើនត្រឹមតែ ១,៥% ប៉ុណ្ណោះ ហើយត្រូវបានគេចាត់ទុកថា ជាកំណើនដ៏ខ្ពស់បំផុតមិនធ្លាប់មានគិតចាប់តាំងពីឆ្នាំ ២០១១ មក៕

ប្រភព៖ cnbc