ប្រាក់ដុល្លារបន្តឡើងថ្លៃជាថ្មីទៀតនៅថ្ងៃនេះ

ការជួញដូរប្រាក់ដុល្លារនៅតែបន្តឡើងថ្លៃជាថ្មីទៀតនៅក្នុងថ្ងៃនេះ ធៀបទៅនឹងប្រាក់អឺរ៉ូ និងលុយយ៉េន ខណៈដែលអ្នកជួញដូរកំពុងតាមដានមើលស្ថានភាពនានាលើដំណើរវិវត្តសេដ្ឋកិច្ចអាមេរិក ខណៈដែលប្រាក់អឺរ៉ូទទួលរងសម្ពាធចេញពីការបោះឆ្នោតទាមទារឯករាជ្យនៅក្នុងរដ្ឋ Caltalonia របស់អេស្ប៉ាញ។

នៅថ្ងៃនេះសន្ទស្សន៍ជួញដូរប្រាក់ដុល្លារបានឡើងថ្លៃ ០,៦២% ធៀបទៅនឹងប្រាក់អឺរ៉ូ ដែលវាត្រូវបានជួញដូរក្នុងតម្លៃ ១,១៧៣៩ ដុល្លារ។ បើធៀបទៅនឹងលុយយ៉េនវិញ ប្រាក់ដុល្លារឡើងថ្លៃបាន ០,១៨% ត្រូវបានជួញដូរក្នុងតម្លៃ ១១២,៦៧ យ៉េនក្នុងមួយដុល្លារ។

ការធ្លាក់ថ្លៃនៃប្រាក់អឺរ៉ូគឺដោយសារតែមានភាពចម្រូងចម្រាសលើការបោះឆ្នោតទាមទារផ្តាច់ខ្លួនរបស់ពលរដ្ឋនៅក្នុងតំបន់ Catalonia ចេញពីទឹកដីអេស្ប៉ាញ។ នេះត្រូវបានចាត់ទុកថា ជាវិបត្តិនយោបាយមិនធ្លាប់មាននៅក្នុងរយៈពេលជាច្រើនទសវត្សកន្លងមក ខណៈដែលពលរដ្ឋតំបន់នេះ ៩០% បានបោះឆ្នោតសម្រេចថា នឹងផ្តាច់ខ្លួនចេញ។

ទីផ្សារប្រាក់ដុល្លារបានឡើងថ្លៃខ្លាំង ដោយមានការជ្រោមជ្រែងពីកំណើនផលិតកម្មរបស់អាមេរិកដែលស្ថិតនៅក្នុងអត្រាកំណើនខ្ពស់បំផុតប្រចាំខែកញ្ញាកន្លងទៅដែលវាមិនធ្លាប់មាននោះឡើយនៅក្នុងរយៈពេល១៣ឆ្នាំកន្លងទៅនេះ។ ចំណែកនៅសេតវិមានវិញ បានបង្ហាញពីគម្រោងកំណែទម្រង់ពន្ធដារថ្មីមួយក្នុងការកាត់បន្ថយពន្ធដារលើវិស័យអាជីវកម្ម និង ពលរដ្ឋរបស់អាមេរិកកាលពីថ្ងៃពុធសប្តាហ៍មុន ដែលបង្ហាញពីច្រកផ្លូវថ្មីសម្រាប់ការអភិវឌ្ឍសេដ្ឋកិច្ចជាតិរបស់លោក Trump។

លោក Trump ក៏កំពុងស្វះស្វែងរកបេក្ខភាពថ្មីសម្រាប់មកកាន់កាប់តំណែងជាប្រមុខធនាគារកណ្តាលអាមេរិក ដែលក្នុងនោះលោក Kevin Warsh ក៏ត្រូវបានចាត់ទុកថា ជាឥស្សរជនមួយរូបមានឥទ្ធិពល និងស័ក្តិសមសម្រាប់តំណែងនេះជាងលោកស្រី Janet Yellen ដែលជាប្រមុខធនាគារកណ្តាលអាមេរិកបច្ចុប្បន្ន៕