Monday, October 9, 2017

Home Financial News មាសឡើងថ្លៃ ខណៈអ្នកជួញដូរកំពុងបារម្ភទៅនឹងស្ថានភាពនយោបាយក្នុងឧបទ្វីបកូរ៉េ

មាសឡើងថ្លៃ ខណៈអ្នកជួញដូរកំពុងបារម្ភទៅនឹងស្ថានភាពនយោបាយក្នុងឧបទ្វីបកូរ៉េ

ទីផ្សារជួញដូរមាសបានវិលត្រឡប់មកឡើងថ្លៃសាជាថ្មីហើយនៅព្រឹកនេះពីតម្លៃជួញដូរធ្លាក់ថ្លៃដ៏ទាបបំផុតមិនធ្លាប់មាននៅ ក្នុងរយៈពេល២ខែកន្លងទៅនេះ ខណៈដែលអ្នកជួញដូរកំពុងមានការព្រួយបារម្ភទៅនឹងភាពតានតឹងនៃភូមិសាស្ត្រនយោបាយក្នុងឧបទ្វីបកូរ៉េដែលកំពុងជះឥទ្ធិពលដល់ការជួញដូរប្រាក់ដុល្លារឲ្យធ្លាក់ថ្លៃ វិញ។

តម្លៃជួញដូរមាសតាមស្បត (Spot Gold) បានឡើងថ្លៃ ០,៣% ត្រូវបានជួញដូរក្នុងតម្លៃ ១ ២៧៨,៨១ ដុល្លារក្នុងមួយអោននៅម៉ោង៨:៤០ នាទីព្រឹកនេះ។ តម្លៃនេះ ខ្ពស់ជាងតម្លៃជួញដូរធ្លាក់ថ្លៃដ៏អាក្រក់បំផុតកាលពី ថ្ងៃសុក្រកន្លងទៅដែលមិនធ្លាប់មានគិតចាប់តាំងពីដើមខែសីហាមក នៅពេលដែលទីផ្សារប្រាក់ដុល្លារស្ទុះងើបឡើងថ្លៃខ្លាំង។ ចំណែកទីផ្សារមាសរបស់អាមេរិកវិញ បានឡើងថ្លៃ ០,៥% ត្រូវបានជួញដូរក្នុងតម្លៃ ១ ២៨១,៥០ ដុល្លារក្នុងមួយអោន។

ការជួញដូរប្រាក់ដុល្លារនៅថ្ងៃច័ន្ទនេះ បានធ្លាក់ថ្លៃវិញប្រៀបធៀបទៅនឹងលុយយ៉េនរបស់ជប៉ុនពីតម្លៃជួញដូរខ្ពស់បំផុតមិនធ្លាប់មាននៅក្នុងរយៈពេល១២សប្តាហ៍កន្លងទៅកាលពីថ្ងៃសុក្រសប្តាហ៍មុន។ ការធ្លាក់ថ្លៃនេះគឺដោយសារតែអ្នកជួញដូរកំពុងមានការព្រួយបារម្ភឡើងវិញនូវភាពតានតឹងផ្នែកនយោបាយដែលថា កូរ៉េខាងជើងទំនងត្រៀមខ្លួនបាញ់មីស៊ីលជាថ្មីទៀតនៅពេលខាងមុខ។

ជាមួយគ្នានេះដែរមេដឹកនាំកូរ៉េខាងជើងលោកគីមជុងអ៊ុនបានថ្លែងថា អាវុធនុយក្លេអ៊ែររបស់បានរួមចំណែកយ៉ាងសំខាន់ក្នុងការកសាងសន្តិភាពនៅក្នុងតំបន់ ព្រមទាំងបានធានាអធិបតេយ្យភាពជាតិរបស់លោកផងដែរ។ នេះបើយោងតាមប្រព័ន្ធផ្សព្វផ្សាយរបស់កូរ៉េខាងជើងដែលបានចេញផ្សាយកាលពីថ្ងៃអាទិត្យម្សិលមិញ នៅរយៈពេលប៉ុន្មានម៉ោងបន្ទាប់ពីប្រធានាធិបតីអាមេរិកលោក Donald Trump បានថ្លែងថា មានតែជម្រើសមួយគត់ ក្នុងការដោះស្រាយជាមួយប្រទេសដ៏ឯកោមួយនេះ។ ទោះបីលោកមិនបានបញ្ជាក់យ៉ាងលម្អិតពីជម្រើសនោះ គេសន្និដ្ឋានថា វាអាចជាការវាយប្រហារដោយយោធាទៅកាន់ប្រទេសនេះ។

រីឯយោងតាមអ្នកនាំពាក្យរុស្ស៊ីម្នាក់ដែលបានវិលត្រឡប់ពីដំណើរទស្សនកិច្ចទៅទីក្រុងព្យុងយ៉ាងត្រូវបានដកស្រង់សម្ដីដោយភ្នាក់ងារសារព័ត៌មាន RIA របស់រុស្ស៊ីកាលពីថ្ងៃសុក្របាននិយាយថា កូរ៉េខាងជើងកំពុងរៀបចំសាកល្បងបាញ់មីស៊ីលរយៈចម្ងាយឆ្ងាយដែលខ្លួនជឿថា អាចហោះទៅដល់ឆ្នេរសមុទ្រភាគខាងលិចនៃទឹកដីអាមេរិក។ ស្ថានការណ៍ ទាំងនេះបានរុញច្រានឲ្យឧបទ្វីបកូរ៉េឲ្យមានភាពតានតឹងជាថ្មីទៀត។

ងាកទៅមើលរបាយការណ៍ការងាររបស់អាមេរិកវិញ បានបង្ហាញថា ទីផ្សារការងារប្រចាំខែកញ្ញាកន្លងទៅ បានធ្លាក់ចុះក្នុងអត្រាខ្ពស់បំផុតមួយមិនធ្លាប់មាននៅក្នុងរយៈពេល៧ឆ្នាំកន្លងទៅ ដោយសារតែប្រទេសនេះបានជួបព្យុះធំៗចំនួនពីរកាលពីខែមុន ពោលគឺព្យុះ Harvey និង ព្យុះ Irma។ គ្រោះធម្មជាតិនេះបានធ្វើឲ្យពលរដ្ឋអាមេរិកជាច្រើនបាត់បង់ការងារធ្វើ និង ត្រូវបានពន្យារពេលធ្វើការងារដែលជាសូចនាករមួយបញ្ជាក់ថា សេដ្ឋកិច្ចរបស់ខ្លួននៅត្រីមាសទី៣នឹងជួបបញ្ហាជាមិនខាន៕

ប្រភព៖ cnbc