ទីផ្សារភាគហ៊ុនអាស៊ីប្រែប្រួលអ្វីខ្លះថ្ងៃនេះ?

ការជួញដូរនៅលើទីផ្សារភាគហ៊ុនអាស៊ីនៅព្រឹកនេះ បានត្រូវជួញដូរឡើងចុះ មិនស្របគ្នា ខណៈដែលស្ថានភាពទីផ្សារភាគហ៊ុនអូស្ត្រាលីបានងើបឡើងវិញបន្តិច ក្រោយធ្លាក់ថ្លៃខ្លាំងនៅពេលព័ត៌មានលក់រាយរបស់ខ្លួនបានធ្លាក់ចុះហួសការរំពឹងទុក។

នៅព្រឹកនេះ សន្ទស្សន៍ជួញដូរផ្សារភាគហ៊ុន ASX 200 បានងើបឡើងវិញក្នុងអត្រា ០,២៤% ស្ថិតនៅទីតាំងតម្លៃ ៥ ៦៦៥,៦ ក្រោយជួញដូរធ្លាក់ថ្លៃអស់ ០,២% នៅពេលចាប់ផ្តើមជួញដូរភ្លាមៗ។ ក៏ប៉ុន្តែភាគហ៊ុនរបស់ធនាគារធំៗរបស់ខ្លួនកំពុងស្ថិតនៅទិសដៅអវិជ្ជមាននៅឡើយ។ ស្ថានភាពនេះជំរុញឲ្យរូបិយប័ណ្ណរបស់ខ្លួនត្រូវបានជួញដូរធ្លាក់ថ្លៃដែរ ក្នុងរង្វង់តម្លៃ០,៧៨៦ ដុល្លារ។

ងាកទៅមើលទីផ្សារភាគហ៊ុនជប៉ុនឯណោះវិញ សន្ទស្សន៍ជួញដូរផ្សារភាគហ៊ុន Nikkei 225 បានឡើងថ្លៃ ០,១% ដែលស្ទើរតែមិនប្រែប្រួលអ្វីសោះនៅព្រឹកនេះ ខណៈដែលផ្សារភាគហ៊ុនរបស់ខ្លួនមួយទៀតគឺផ្សារភាគហ៊ុន Topix ធ្លាក់ថ្លៃបន្តិចបន្តួចអស់ត្រឹមតែ ០,០៧% ប៉ុណ្ណោះ។

ទីផ្សារភាគហ៊ុនអាស៊ីមានការប្រែប្រួលថ្ងៃនេះ គឺផ្អែកទៅលើស្ថានភាព ទីផ្សារភាគហ៊ុនអាមេរិក។ ការជួញដូរនៅលើផ្សារភាគហ៊ុនចិន ហុងកុង និងកូរ៉េខាងត្បូង មិនទាន់បើកឲ្យដំណើរការនៅឡើយទេ ដោយសារតែចូលរួមពិធីបុណ្យឈប់សម្រាកប្រចាំឆ្នាំ។

យ៉ាងណាមិញ ទាំងទីផ្សាររូបិយប័ណ្ណ និងទីផ្សារភាគហ៊ុនមានការប្រែប្រួលយ៉ាងណានៅថ្ងៃនេះ ឬ ថ្ងៃស្អែក គឺអាស្រ័យលើទិន្នន័យទីផ្សារការងាររបស់អាមេរិកសម្រាប់ខែកញ្ញាកន្លងទៅ ដែលត្រូវបានគេរំពឹងថា នឹងចេញផ្សាយនៅថ្ងៃសុក្រស្អែកនេះ៕

ប្រភព៖ cnbc