ទីផ្សារប្រាក់ដុល្លារធ្លាក់ថ្លៃបន្តិចវិញ ថ្ងៃនេះ

ទីផ្សារជួញដូរប្រាក់ដុល្លារបានធ្លាក់ចុះនៅព្រឹកថ្ងៃព្រហស្បតិ៍នេះខណៈពេលដែលអ្នកជួញដូរបានប្តូរទីតាំងជួញដូរមុនពេលរបាយការណ៍ការងាររបស់អាមេរិកចេញផ្សាយនៅថ្ងៃសុក្រចុងសប្តាហ៍នេះ។ នៅព្រឹកនេះសន្ទស្សន៍ជួញដូរប្រាក់ដុល្លារបានធ្លាក់ចុះអស់ ០,១៤% ស្ថិតនៅទីតាំងតម្លៃ ៩៣,៤៤ បន្ទាប់ពីបានធ្លាក់ដល់តម្លៃ ៩៣,២៥៩ ម្តងរួចមកហើយកាលពីយប់មិញ។

នៅសប្តាហ៍នេះអ្នកជួញដូរកំពុងមានការប្រុងប្រយ័ត្នក្នុងការជួញដូរប្រាក់ដុល្លារ ត្បិតអីគ្រោះមហន្តរាយដែលបង្កឡើងដោយព្យុះធំៗចំនួនពីរកាលពីខែកញ្ញាកន្លងទៅ នៅតែជាក្តីបារម្ភដ៏ធំមួយសម្រាប់អនាគតសេដ្ឋកិច្ចអាមេរិកនៅក្នុងត្រីមាសទី៣ឆ្នាំ នេះ។

យ៉ាងណាមិញ ការធ្វើឱ្យប្រសើរឡើងនូវវិស័យផលិតកម្មរបស់អាមេរិកជាមួយនឹងការរំពឹងទុកនៃការកាត់បន្ថយពន្ធដាររបស់លោក Trump និងលទ្ធភាពដែលធនាគារកណ្តាលនឹងអាចដំឡើងអត្រាការប្រាក់នៅក្នុងខែធ្នូខាងមុខ បានជួយឲ្យរូបិយប័ណ្ណមួយនេះឡើងថ្លៃខ្ពស់នៅក្នុងរយៈពេលចុងក្រោយនេះ។

យោងតាមវិទ្យាស្ថានគ្រប់គ្រងការផ្គត់ផ្គង់ផលិតកម្មបានបង្ហាញថា ផលិតកម្មវិស័យផ្សេងទៀតដែលមិនមែនជាវិស័យឧស្សាហកម្មមានការកើនឡើងក្នុងកម្រិតខ្ពស់បំផុតមិនធ្លាប់មានគិតចាប់តាំងពីឆ្នាំ ២០០៥ មកនៅក្នុងខែកញ្ញាកន្លងទៅ។ ក្រៅពីនេះទិន្នន័យនានាក៏បានបង្ហាញ ផងដែរថា ទីផ្សារការងាររបស់អាមេរិកសម្រាប់ខែកញ្ញាកន្លងទៅ អាចកើនឡើង ១៣៥ ០០០ កន្លែងទៀត និងភាពធូរស្រាលឡើងវិញនៃគ្រោះមហន្តរាយព្យុះធំៗចំនួនពីរកាលពីពេលថ្មីៗនេះ អាចជំរុញឲ្យធនាគារកណ្តាលដំឡើងអត្រាការប្រាក់បាន។

ងាកទៅមើលលោកស្រី Janet Yellen ប្រធានធនាគារកណ្តាលអាមេរិកបច្ចុប្បន្នវិញ មិនបានធ្វើអត្ថាធិប្បាយអ្វីនោះឡើយស្ដីពីសេដ្ឋកិច្ច ឬ គោលនយោបាយរូបិយវត្ថុនៅក្នុងសុន្ទរកថាដែលបានរៀបចំឡើងនៅឯសន្និសីទធនាគារកាលពីថ្ងៃពុធម្សិលមិញ។ ការមិនធ្វើអត្ថាធិប្បាយរបស់លោកស្រី នៅចំពេលដែលសាធារណៈជននានាបានមើលឃើញថា លោក Trump អាចតែងតាំងលោក Steven Mnuchin ជាបេក្ខភាពប្រមុខធនាគារកណ្តាលថ្មីជំនួសតំណែងលោកស្រី Janet Yellen៕

ប្រភព៖ cnbc