ថ្ងៃច័ន្ទដើមសប្តាហ៍ ទីផ្សារភាគហ៊ុនអាស៊ីភាគច្រើនឡើងថ្លៃ

ការជួញដូរនៅលើទីផ្សារភាគហ៊ុនអាស៊ីនៅថ្ងៃច័ន្ទដើមសប្តាហ៍នេះត្រូវបានគេមើលឃើញថា ភាគច្រើនបានឡើងថ្លៃ ខណៈដែលទីផ្សារភាគហ៊ុនអាស៊ីមួយចំនួនទៀតបានបិទការជួញដូរក្នុងមួយសប្តាហ៍ពេញក្នុងថ្ងៃបុណ្យឈប់សម្រាកប្រចាំឆ្នាំ។

ទីផ្សារភាគហ៊ុនជប៉ុន Nikkei 225 បានឡើងថ្លៃ ០,១% ស្ថិតនៅទីតាំងតម្លៃ ២០ ៣៧៤,៣៦ នៅពេលចាប់ផ្តើមជួញដូរភ្លាមៗនៅព្រឹកនេះ។ ចំណែកផ្សារភាគហ៊ុនជប៉ុនមួយទៀតគឺ ផ្សារភាគហ៊ុន Topix បានធ្លាក់ថ្លៃបន្តិចត្រឹម ០,០៥% ស្ថិតនៅទីតាំងតម្លៃ ១ ៦៧៣,៩៦។

ងាកទៅមើលផ្សារភាគហ៊ុនអូស្ត្រាលី ASX 200 បានឡើងថ្លៃខ្ពស់ដល់ ទៅ ១,១១% ស្ថិតនៅទីតាំងតម្លៃ ៥ ៧៤៤,៧០ នៅព្រឹកនេះ។ ភាគហ៊ុនរបស់ក្រុមហ៊ុនធនាគារ ជាច្រើនសុទ្ធតែបានឡើងថ្លៃ ដូចជាភាគហ៊ុនរបស់ធនាគារ ANZ បានឡើងថ្លៃ ១,០៨% ភាគហ៊ុនធនាគារ Commonwealth Bank បានឡើងថ្លៃ ១,៤៩% និង ភាគហ៊ុនធនាគារ Westpac បានឡើងថ្លៃ ១,២៥%។

ងាកទៅមើលការជួញដូរនៅលើទីផ្សារភាគហ៊ុនចិនវិញ បានបិទការជួញដូរដោយសារចូលរួមក្នុងពិធីបុណ្យឈប់សម្រាកប្រចាំឆ្នាំ ខណៈដែលការជួញដូរនៅលើទីផ្សារភាគហ៊ុនកូរ៉េខាងត្បូងក៏បិទការជួញដូរដែរក្នុងថ្ងៃឈប់សម្រាកប្រចាំឆ្នាំ។ ការជួញដូរនៅលើទីផ្សារភាគហ៊ុននៅហុងកុង និង ឥណ្ឌា គឺសុទ្ធតែបានបិទការជួញដូរទាំងអស់នៅថ្ងៃ នេះ។

សំនួរស្តីអំពីអនាគតរបស់ធនាគារកណ្តាលអាមេរិកដែលមានលោកស្រី Janet Yellen ជាប្រធាន បាននាំឲ្យមានការផ្លាស់ប្ដូរជាច្រើននៅលើទីផ្សារអន្តរជាតិកាលពីថ្ងៃសុក្រកន្លងទៅ និងនាំឲ្យមានភាពសង្ស័យនៅក្នុងការជួញដូរនៅលើទីផ្សារភាគហ៊ុន។ នេះបានជំរុញឲ្យទីផ្សារប្រាក់ដុល្លារបានឡើងថ្លៃខ្លាំងកាលពីសប្តាហ៍មុន៕

ប្រភព៖ cnbc